Recent Posts

الأحد، 30 أكتوبر 2011

عيد وبؤجة ودم

أولاً كل سنة وإنتم طيبين بمناسبة عيد الأضحى
(قولت أعيد بدرى لأنى مابدخلش كتير) 


ثانياً يوم 11 نوفمبر إن شاء الله تعالى
حيكون العيد عيدين
عندنا مناسبتين خيريتين
البؤجة الشتوية
والتبرع بالدم
التفاصيل عند أهل الخير هنا

يارب دايما متجمعين فى الخير 

أخوكم
أحمد عبد الحميد 

الأربعاء، 5 أكتوبر 2011

المؤامرة الكبرى.... قصة... الحلقة رقم (1)

الموقع: بقعة ما بالولايات المتحدة الأمريكية
الزمان: أوائل 2010
وصف عام للمكان: قاعة كبيرة مليئة بالشاشات التى تظهر بقع عديدة من العالم
الحضور: عدد كبير من رؤساء الدول والزعماء والشخصيات العامة الشهيرة
الجميع يلفه الصمت التام حتى بدأ رئيس الولايات المتحدة بالكلام:
- أظن أن الوقت قد إقترب 
ملكة إنجلترا: نعم يا سيدى لم تتبق إلا سنتين فقط لإستكمال المخطط
رئيس روسيا: أخيرا!!!
رئيس الولايات المتحدة مشيرا لرجل أصلع الرأس تحتوى صلعته على وحمة كبيرة: 
-عزيزى جورباتشوف.. إقترب موعد العودة للوطن
جورباتشوف ضاحكا... سيدى هذا هو الوطن حاليا
وإرتج الجميع بضحكة كبيرة يملؤها بعض التوتر
رئيس الولايات المتحدة: إتصلوا حالا بعملائنا فى الوطن العربى
ظهرت على الشاشة التى إنقسمت لإتنى عشر جزءا صور حية لإثنى عشر شاب وفتاة
أحنوا رؤسهم جميعا غحتراما للحضور فبادلهم الحاضرون نفس التحية
سأل أحد الشباب وكان فى حوالى الثلاثين من عمره ويرتدى نظارة:
سيدى.. هل هذا الإتصال مؤمن؟
أجاب احد الحضور بإبتسامة ساخرة: لا تخشى شيئا.. فالجميع عندك أغبياء لن يستطيعوا فهم هذه التكنولوجيا الحديثة فى الإتصال
ضحك الجميع وكان لضحكهم رنين عجيب
قال رئيس الولايات المتحدة: هذا أكبر إجتماع نقوم به سرا منذ سقوط الإتحاد السوفيتى
أومأ الحضور برأسهم موافقة فأضاف:
سوف نراجع ماتم حتى الأن وما سيتم بسرعة شديدة
أولا إستطعنا أن نزرع رجالنا فى كل أنحاء العالم وإيصالهم للحكم
ثانيا البلد التى لم نستطيع الوصول لحكمها إختطفنا رئيسها ووضعنا مكانه شبيهه من رجالنا
ثالثا من لم نستطع إختراقه قمنا بتدميره ليسهل علينا إختراقه
رابعا إقترب اليوم الموعود فقد جاءتنى رسالة اليوم تفيد بضرورة الإسراع بتنفيذ المخطط
فلم يتبق أمامنا إلا سنتين فقط وإلا........

يتبع


الأحد، 25 سبتمبر 2011

عم عبده والثورة

عم عبده راجل غلبان
عايش فى منطقة (س) العشوائية
عم عبده موظف بسيط
يادوب اللى جاى على قد اللى رايح
بس بيربى ولاده بالحلال
قبل 25 يناير سمع الناس بتحكى إن حيبقى فيه مظاهرات
قرر ماينزلش
دول تلاقيهم عيال فاضية وأنا مش وش بهدلة
يوم 28 يناير شاف المظاهرات مالية الدنيا
نزل يتفرج
لقى نفسه وسط المعمعة
ضرب وخبط وطاخ طيخ
بس هو بصراحة كان شايل ومعبى جواه على الأخر
وراح اخر اليوم حدف القسم بالطوب وإتفرج عليه وهو بيتحرق
رجع أخرالليل 
لقى الناس بتتكلم إن لازم نشكل لجان شعبية وكده
بيقولوا البلطجية ملوا البلد
بس بما إنه فى منطقة عشوائية
ماجالهمش بلطجية
والناس كانوا واقفين جنب بعض
عم عبده بدأ يفهم من بعض الشباب اللى حصل
طبعا هو كان طول عمره راضى
بس برضه حاسس بالظلم والقهر
ويوم ورا يوم كان شايف إن مبارك لازم يمشى
ولما مشى خرج هيص مع الناس
وهتف الجيش والشعب إيد واحدة
طيب العيال اللى فى التحرير دى ماتمشى بقى
كفاية وقف حال
واحد من شباب الحتة فهمه إن المطالب لسه ماخلصتش
عم عبده قال طيب 
وفضل يتابع يوم بعد يوم المطالب وتحقيقها
وكان عنده أمل كييييييييييير فى بكره  
بس كان حماسه للثورة بيقل
بس يوم الإستفتاء كان مبسوط
أول مرة يحس إن ليه قيمة
ورأيه مهم
راح وقال نعم لأن شيخ الجامع قاله إن ده الصح
فضل يتابع شوية
يسمع ناس يقولوا عليهم ليبراليين
دول مين دول؟
وبعدين يلاقى خناقة الإنتخابات ولا الدستور
وكل شوية يلاقى جمعة مش عارف إيه
طيب ياجدعان أنا مش شايف تغيير فى حياتى
وبعديها جمعة مش عارف إيه التانية
طيب يا جدعان لسه الأسعار بتغلى
ويتابع يلاقى أخبار عن بلطجة وسرقة وقتل
طيب ربنا يستر
ولما لقى الريس اللى مشى بيتحاكم 
أول يوم كان متسمر قدام التليفزيون
وعمال يقول سبحان المعز المذل
ويوم ورا يوم متابعته قلت
ما الأسعار زى ماهى
ومافيش حاجة إتغيرت
بالعكس
الزبالة كترت فى الشوارع
والناس بقت بتتخانق مع بعضها أكتر
وهو قاعد على القهوة مع جماعة صحابه
إتنين شباب قاعدين جنبهم بيتكلموا
وفتحوا معاهم الكلام
والشباب قالولهم إن الثورة دى خربت البلد
وإن اللى عملوها متدربين بره
قالهم أنا كنت مشارك
قالوله مش إنت إحنا بنتكلم عن اللى خطط وقبض
والبلد رايحة فى داهية
عم عبده صدقهم
وهو مروح كان بيلوم نفسه على الخروج فى الثورة
وكان شايف إن الناس اللى لسه بتتظاهر بيخربوا البلد 

الخميس، 22 سبتمبر 2011

يا مدونين القاهرة

أيها الأخوة والأخوات
فى هذه الظروف العصيبة
التى تمر بها البلاد
أود أن أسأل مدونى ومدونات القاهرة

مين رايح المنصورة يوم 30-9
علشان نرتب مع بعض

والله الموفق والمستعان 

 

الاثنين، 22 أغسطس 2011

تدوينة قديمة بسبب حلم إمبارح


بالتأكيد يمتلك كل شخص صندوق ذكريات

يحتوى على صور, قصاصات , زهور , هدايا تذكارية

نضع هذا الصندوق داخل الدولاب أو تحت السرير

نشارك بعض الناس هذه الأشياء او نحتفظ بها لأنفسنا

فى الغالب تكون هذه الذكريات سعيدة

نفتح هذه الصناديق ونغلقها وقتما نريد

أما العقل فيحتوى على العديد من صناديق الذكريات

بعضها سعيد

وبعضها حزين

بعض هذه الصناديق نفتحها حينما نريد

وغالبا تكون بدون أقفال

أما البعض الاخر فنضع عليها العديد من الأقفال والسلاسل

وتقوم بإخفاء أو رمى المفاتيح

على أمل ألا يتم فتحها على الإطلاق

ولكن.....

قد تشاهد شخص,

تحلم أثناء نومك,

تزور مكان ما,

تقرأ موضوع أو قصة

وفجأة

تنكسر كل السلاسل وتفتح كل الأقفال

وتجد جميع هذه الذكريات وقد خرجت من محبسها

تلملم ذكرياتك وتحاول وضعها ثانية فى الصندوق

إذا نجحت فى ذلك تحاول إقفال الصندوق

إذا نجحت فى ذلك أيضا لن تضع أقفال

وإذا وضعت لن

ترمى أو تضيع المفاتيح

بل ستحتفظ بها

لأن بعض ما خرج من الصندوق أعجبك

وأعاد لك بعض الذكريات والأحاسيس

وأدركت بعد مرور الزمن انها لم تكن بهذا السوء

أو هذه القسوة


الجمعة، 5 أغسطس 2011

رمضان كريم

كل سنة وإنتم طيبين
وتقبل الله منا ومنكم الصيام والقيام
وصالح الأعمال 

الثلاثاء، 28 يونيو 2011

التبرع بالدم


يوم الجمعة 1-7-2011 إن شاء الله
التفاصيل 
و
جزاكم الله كل خير

الأحد، 19 يونيو 2011

طول ما انت بخير



طول ما انت بخير 
أنا بخير
أنا مطمن عليك
أنا شايفك سنة والتانية
بتكبر
وبشوف روحى فيك

بتمنالك عيشة حلال
ستر وصحة وراحة بال
عين مليانة ورضا بالحال

بدعى تكون بعدى وحياتك
سند فى الدنيا لإخواتك
ويقولوا إبنى راجل عال

تعبك دمعك نقط ضعفى
عايزك جد مستعفى
حبيبى ماتنكسرش فى يوم

مش إنت طول عمرك بتقلدنى
عايزك تبقى زيى إوعدنى
فى عز ضعفك شد وقوم

وطول ما انت بخير أنا بخير
أنا مطمن عليك
أنا شايفك سنة والتانية بتكبر
وبشوف روحى فيك

أغنية هشام عباس دى بحبها قوى.. 

الأربعاء، 15 يونيو 2011

بفكر

بفكر أرجع أكتب تانى
بس مش عارف أكتب عن إيه
عن اللخبطة اللى عايشين فيها
ولا عن الثورة اللى بقى أكبر أعدائها الشعب المصرى
ولا عن عجلة الإنتاج والعجلاتى
ولا عن الشرطة المقموصة من الشعب
ولا عن لعبة الدين والسياسة 
ولا
ولا
ولا
ولا أكتب عن الحاجتين اللى بعرف فيهم بس
الهندسة
وكرة القدم؟؟؟

الأحد، 8 مايو 2011

مغلق مؤقتاً

المدونة مغلقة مؤقتا بسبب:
1- وجود مشاكل فنية تمنع ظهور تعليقاتى على أى بوست
2- إنشغالى الشديد حاليا
3- الأحداث الجارية التى لا تسر عدو ولا حبيب  

السبت، 23 أبريل 2011

شوية هلاوس 1

بقالى كتير مادونتش
مشغول أو ماليش نفس أو بتابع الأحداث
أفكار كتير بتتصارع فى نافوخى وحاسس إنى بهلوس
قولت أهلوس هنا

1- قنا
ماعنديش أى مشكلة إن الناس تعترض على المحافظ ويعبروا عن رأيهم
لكن عندى مشكلة إنهم يقطعوا شريط القطر والخطوط البرية
شايفها بلطجة... ولو نفعت كله حيبلطج
نقطة شاغلة تفكيرى... مش الحكومة والمحافظين دول كلهم مؤقتين لغاية الإنتخابات
يعنى الرئيس الجديد حيشكل حكومة جديدة ويغير المحافظين؟ طيب لازمتها إيه دلوقتى؟
وحازز فى نفسى قوى إن الموضوع ليه أبعاد طائفية

2- د.عصام شرف
شايف إن الراجل ده مخلص وبيشتغل بجد وبيعمل اللى عليه وزيادة
هو بشر يصيب ويخطئ
مش عاجبنى الناس اللى بتهاجمه وتقول عليه بيمثل التواضع
ياجماعة هو لما نزل ياكل مع ولاده ماراحش نشر الكلام ده
الشباب اللى قابلوه وإتصوروا معاه حطوا الصورة على الفيسبوك وكتبوا الخبر 
والصحافة كتبت بناءا على كده
ولما جاب الجزمة للست الفلاحة الحاضرين هما اللى حكوا الموقف
هو إحنا ليه مستخسرين فى نفسنا بنى أدم متواضع ومحترم؟

3- السلفيين
قالوا الأول إن المظاهرات حرام والخروج على الحاكم حرام
وقالوا إحنا بتوع دين ودعوة مالناش فى السياسة
هى ليه دلوقتى السياسة بقت حلوة والمظاهرات مش حرام؟

4- المطالب الفئوية وإعتصامات العمال
الناس دول بيقولوا دلوقتى يا إما فلا
كل واحد بيدور يزود مرتبه قرشين زيادة وخلاص
بقاله سنين بياخد على دماغه وساكت وأول ماجاله حد محترم بدأيتمرد
يا جدعان طيب إشتغلوا وطالبوا بحقوقكم
لو الدنيا إتظبطت كلنا كسبانين
يعنى مرتبك يزيد دلوقتى ويفضل التعليم بايظ وماعندكش رعاية صحية وشوارعنا زبالة
ولا تصبر شوية وتشوف إحنا رايحين على فين؟

5- الزغلول الكبير.. الجيش
الجيش جميله على راسنا من فوق
الجيش رفض يضرب المتظاهرين
ناس كتير بيهاجموا المجلس العسكرى
وماله ماهم أكيد مش أنبيا وأكيد الفساد طايل البلاد طولها وعرضها
بس مش وقته أى صدام مع المجلس والجيش
دول إعتقلوا الضباط المعتصمين فى التحرير بالقوة... يا سلام؟ المفروض يعتقلهم بالراحة.. صح؟
وياسلام بقى على الناس اللى بتحسد ليبيا وبيقولوا إن الثورة فى ليبيا أحسن من ثورة مصر..!!!!
وبيقولوا كمان الثورة فى مصر فشلت علشان الجيش هو اللى مسك

كفاية هلوسة بقى.. كفاية

الجمعة، 15 أبريل 2011

يا مدونين

أخباركم إيه يا مدونين مصر ؟
مافيش لقاءات تدوينية أو غير تدوينية قريب ولا إيه؟
حد كده يتبرع وينظملنا لقاء قريب

السبت، 26 مارس 2011

عمرو موسى رئيس مصر القادم

عمرو موسى رئيس مصر القادم
بنسبة 80% حتى الأن
دى مش رغبتىأنا لغاية دلوقتى حرشح البردعى
بس مستنى أسمع كل المرشحين وأشوف برامجهم
ليه بقى بقول كده على عمرو موسى؟
علشان أنا سألت ناس كتيييييير من ثقافات مختلفة 
وسمعت ما يلى:
ده راجل
إسرائيل كانت بتخاف منه
اللى نعرفه أحسن من اللى مانعرفوش
طول عمره عايش فى مصر
سياسى محنك
وبالنسبة للبرادعى:
ده عميل
طول عمره عايش بره مايعرفش عننا حاجة
بنته متجوزة نصرانى
هو فى رئيس بيتهته فى الكلام؟
يعرف إيه عن السياسة
ده بتاع ذرة

والكلام ده سمعته من ناس كتير للأسف
مفيش حد بيسمع ولا عايز يسمع
ماحدش مستنى يشوف البرامج الإنتخابية بتاعة الناس
كله عايز يخلص وخلاص
وكله بيسمع من كله

لذلك عزيزى قارئ المدونة
أحب أقولك إنه لغاية النهارده
عمرو موسى شكله اللى حيكسب
للأسف
وحنبقى شيلنا مبارك وجبنا مبارك تانى

أتمنى من الله أن يخلف ظنى وكلامى ده مايتحققش 
 

الثلاثاء، 1 مارس 2011

التبرع بالدم

ما تنسوش التبرع بالدم الجمعة الجاية
التفاصيل عند خيخة
 

الاثنين، 14 فبراير 2011

حلمى حاليا... مصر دولة متقدمة فى 2020

بحلم حاليا بمصر دولة عطمى
سنة 2020
حلم إننا دولة عظمى ده بحلم بيه من وأنا طفل صغير
ربنا بقى يسامحه نبيل فاروق وملف المستقبل
بس دلوقتى أنا متفائل جدا
وخايف جدا
خايف لأنى شايف بعض الناس فاكرين 
إنه بسقوط النظام كل حاجة حتبقى زى الفل
لازم نشتغل
ونشتغل
ونشتغل
ونصلح من نفسنا
ونحب بلدنا ونعلم ولادنا يحبوها
 
المهم
 
أنا بكتب البوست ده علشان أسمع إقتراحات الناس
 
أنا عن نفسى بقترح:
1- إحياء المشاريع الكبرى مثل توشكا مع تمليك الأراضى للشباب
2- تجريم البناء على الأراضى الزراعية
3- تنمية مواردنا من الثروة السمكية
أصل حرام يبقى عندنا بحرين ونهر وعندنا مشكلة فى الثروة السمكية 
 
أنا إتكلمت عن حاجة واحدة بس وهى الخاصة بالزراعة أو الطعام بصفة عامة 

الثلاثاء، 8 فبراير 2011

أنا إسمى على

أنا إسمى على
(كنت) بشتغل عسكرى أمن مركزى
من قرية صغيرة من ريف أو صعيد مصر
مش مهم تعرف بالظبط
فى قرى كتير زى بعضها
وفيها ناس كتير زيى
أنا مادخلتش المدرسة
أبويا فلاح ما إتعلمش
ماصدق ربنا رزقه بصبيان علشان يشتغلوا معاه ويساعدوه
ماعندناش أرض
بنشتغل عند راجل مقتدر
مش حطول عليكم
لما وصلت لسن التجنيد روحت على المركز
والمركز بعتنى لمنطقة التجنيد
دخلت أمن مركزى علشان الباشا
قال عليا أنا واللى دخلوا معايا - لامؤاخذة- بهايم
شوفنا المرمطة والإهانة فى مركز التدريب
بس إحنا إستحملنا
ما إحنا لازم نستحمل وإلا الباشا حيعلقنا
فى زمايلى كانوا مريحين قوى
اللى شغال بيجيب الخضار للهانم مرات الباشا الكبير
واللى بيسيأ لها البيت
واللى بيودى العيال النادى ويستنى لغاية لما يرجعهم البيت تانى
والعيال بصراحة ماكانوش يتخيروا عن أبوهم الباشا فى المعاملة
المهم أنا كنت مثال للعسكرى النموذجى
بسمع الكلام ومابفكرش
والحقيقة كلنا كنا كدة
طيب وأفكر ليه؟
حتقولى إقرا وإعرف
يا بيه قولتلك أنا مادخلتش المدرسة
وبعدين علمونا إن الباشا هو اللى بيفكر
وهو اللى بيفهم
وإحنا -لا مؤاخذة- مواشى بنفذ بس
بس برضه قالولنا إننا بنحمى البلد
من المخربين والجواسيس
يبقى أنا بخدم بلدى... مش كده؟
يوم 25 كنا فى الشارع علشان نحمى البلد من مظاهرات
عاملها شوية عيال عايزين يعصوا كلام الريس
الريس؟
دى عيال فاجرة صحيح
ده الريس!!!!!
دانا ما أقدرش أكسر كلمة أصغر باشا من البشوات اللى عندى
قالولنا إن العيال دى بيخربوا فى البلد ولازم نلمهم
شوفت العيال دى فى المظاهرة
هما مش عيال
شباب قدى وأصغر وأكبر
ورجالة كبيرة وبنات
مش عارف إيه اللى يطلع حرمة لغاية بالليل مع شباب زى دول؟!!!
كلهم شكلهم معاهم فلوس ومبسوطين
طيب الناس دى عايزة إيه
أكيد عايزين يخربوا البلد
ويومها بالليل عرفنا نمشيهم من التحرير
بس بعد ما هلكنا
تصدقوا لو قولتلكم إننا تعبنا أكتر منهم؟
ده إحنا فى الشارع بقالنا 24 ساعة من غير ما نقعد
واللى أكل منا أكل لقمة صغيرة
خلص اليوم بعد ما ضربنا الناس دى ومشيناهم
تانى يوم لقيناهم عاملين مظاهرات تانى
يا دين النبى
العيال دى مابتهمدش؟
عدى اليوم
ويوم الخميس نفس الموال
بس يومها الباشا قالنا إن يوم الجمعة حتبقى فى مظاهرات جامدة جدا
ربنا يستر.. أنا رجليا وجعانى ومش شايلانى
يوم الجمعة كنا فى وسط البلد
بصراحة أنا ما صلتش الجمعة
الباشا كان موقفنا مستعدين علشان المظاهرات بعد الصلاة على طول
يادوب الصلاة خلصت من هنا
والباشا أمرنا نضرب قنابل مسيلة للدموع على الناس
اللى طالعين من الجامع وبدأوا يهتفوا
طيب الناس دى لسه خارجة من بيت ربنا
ينفع كده يخربوا البلد؟
حاولنا نفرقهم بالقنابل
والعصيان وإحنا ماسكين الدروع
الناس عمالة تزيد زى النمل
بييجوا منين دول
والباشا أوامره واحدة
لازم نفض المظاهرة دى بأى تمن
بس فى حاجة غريبة عن يوم 25
الناس دى مش كلها شباب
ومش كلهم شكلهم معاهم فلوس
فى منهم ناس شبهى
طيب دول بيخربوا البلد ليه؟
فضلنا نضرب والناس تزيد
حدفوا علينا طوب ردناهلهم تانى
فى راجل كبير إتعور
شكله كده ممكن يموت
الباشا أمر سواق المدرعة يدخل فى وسط الناس علشان يفرقهم
 العسكرى اللى بيسوق قاله يا باشا ممكن حد يموت
الباشا قاله إخرس يا حيوان.. يموتوا ولا يولعوا بجاز
وفعلا
المدرعة خبظت كام واحد وموتتهم
بصراحة أنا وقفت وبطلت ضرب
زميلى محمد قالى اليوم مش معدى على خير
الناس كترت على المدرعة
وواحد حدف جواها إزازة مولوتوف
الباشا كان فى المدرعة
أنا محمد زميلى لقيته بيقلع بدلته وبيجرى
أنا فضلت واقف ومش عارف أعمل إيه
وفجأة ما حستش بحاجة
------------------------------------------
أنا عرفت إن الناس دى مش وحشة
هما عايزين حقهم وحقى
عرفت إن فى شباب وبنات ماتوا
أنا ماكنتش أقصد أموت حد
أنا قالولى إنى بحمى البلد
سامع الناس بيقولوا على اللى ماتوا دول شهداء
وبيصلوا عليهم
وبيدعولهم
وحيكرموهم وبيواسوا أهاليهم
طيب أنا مين حيواسى أمى
ومين حيساعد أبويا بعد ما نظره راح
--------------------------
أنا إسمى على
(كنت) عسكرى أمن مركزى
أنا عارف إن ربنا هو الحكم العدل
وهو الرؤوف الرحيم 
وهو كان عارف نيتى
أنا كنت بحمى البلد
الباشا هو اللى قالى كده 
 ------------------------------------
حينفع تدعيلى أنا وزمايلى
إحنا كنا عارفين إننا بنحمى البلد
إدعى للشهدا
بس ما تنساش تدعيلى  
-------------------------------------
أنا إسمى على
(كنت) عسكرى أمن مركزى 

 

أطهر دموع فيكى يا مصر

وائل غنيم
أنا فخور إنك من بلدى

وائل غنيم
أنا نفسى ولادى يطلعوا زيك

وائل غنيم
مصر فعلا ولادة

الاثنين، 7 فبراير 2011

إسلمى يا مصر

أنا حاسس النشيد ده بجد

الأربعاء، 26 يناير 2011

هما قفلوا الفيسبوك ولا إيه؟

مش عارف أدخل على الفيسبوك بقالى شوية حلوين
هو حصل تويتر ولا إيه؟

الاثنين، 17 يناير 2011

36


النهارده عيد ميلادى ال36
بجد بجد
مش عارف 36 ده رقم صغير ولا كبير
بس اللى أنا عارفه 
إن سنة كامل عدت من عمرى
وفى السنة دى حصلت حاجات حلوة وحاجات مش حلوة
يعنى عمر دخل أولى إبتدائى
ونور بقى لمض زيادة
وجبت عربية جديدة
وفى الشغل الناس مبسوطين منى أكتر
بس فى الشغل أنا مش مبسوط 
لأنى شايف إن السنة دى مافيهاش أى جديد

أكتر حاجة مش حلوة
إن ده أول عيد ميلاد ليا
أبويا مايتصلش بيا
ويقولى كل سنة وإنت طيب يا أبو حميد
وعقبال ميت سنة

نست أقولكم إن إسم المدونة وإسمى ده (أبو حميد)
كان دلع أبويا ليا
رحمة الله عليه

الاثنين، 10 يناير 2011

الهلال


الهلال 
هل هو رمز للإسلام؟
أصل من يوم مذبحة كنيسة القديسيين
لعن الله فاعلها
والناس حاطين صورة الهلال والصليب
طيب الصليب هو أساس عقيدة المسيحيين
طيب الهلال أساس عقيدة المسلمين؟
أساس عقيدتنا هو
لا إله إلا الله
محمد رسول الله
وأبوس إيديكم كفاية خلط للأوراق

مافيش حاجة عندنا إسمها هلال

الأربعاء، 5 يناير 2011

منوعات

بكرة إن شاء الله مدونتى المتواضعة تتم سنة واحدة
أنا ولا شاعر ولا أديب
ولا ليا توجهات سياسية ولا حزبية
أنا إنسان مصرى عادى
وبكتب كلام أقل من العادى
-------------------------------------------
أحسن حاجة حصلت من التدوين
معرفتى بأشخاص كتير رائعين
من أعمار وثقافات مختلفة
وطبعا المشاركة فى أعمال الخير
------------------------------------------
فى ناس كتير قابلتهم على الحقيقة
وناس ماحصليش الشرف
بس فعلا كل الناس اللى عرفتهم أضافولى كتير
غير إنى طلعت بأصدقاء محترمين
مش حقول أسامى بس أكيد الناس بتحس ببعضها
=====================================
مش عايز أتكلم عن أحداث إسكندرية
الواحد فعلا حزين لأقصى درجة
وحزين كمان لخلط الأوراق بسبب الحادثة دى
=====================================
لقاء المنصورة يوم الجمعة الماضية كان أكثر من رااااائع
إتبسط جدا جدا من اليوم ده
علشان عمل الخير
وعلشان الناس الجميلة اللى قابلتهم واللى إتعرفت عليهم
======================================