Recent Posts

السبت، 27 فبراير 2010

قلب كامل... قصة


يستيقظ كامل فى  الصباح على جرس الموبيل الخاص به (تررررررن رن رن ...... تررررررررن رن رن)

يلتقط ساعته من الكومودينو المجاور لسريره فيجد الساعة العاشرة, يمسك بالموبايل فيجد المتصل هو إبنه الكبير محمد

- صباح الخير يا بابا

- صباح النور يا حبيبى.. عامل إيه؟

- تمام يا باشا إنت اللى عامل إيه وإيه النوم دا كله... ما وراناش شغل ولا إيه

- يا حبيبى البركة فيك إنت وأخوك.. مانتو شايلين الشركة على كتافكم

- لا يا عم الحج البركة فيك إنت وإحنا كلنا عايشين بحسك.. ربنا يخليك لينا

- طيب يا سيدى وبعد المحلسة دى كلها عايز إيه؟

- إيه دا... إنت نسيت ولا إيه؟ مش النهاردة عندنا توقيع عقود المشروع الجديد 

- لا باشمهندس مش ناسى.. يس إنت وأخوك أحمد معاكم توكيلات وممكن أى حد يمضى

- لا لا لا لا... مشروع زى ده ماحدش حيملا عينه غير وجود المهندس كامل محمود للتوقيع شخصيا وبعدين بطل كسل وبطل تعيش فى دور الراجل العجوز.. دانت لسه شباب

- ماشى يا سيدى ... أنا عامل حسابى أكون عندكم الساعة3

- مستنيك يا باشمهندس

- مع السلامة يا حبيبى

أثناء مروره من الريسبشن للمطبخ بص على الصورة المعلقة وقالها صباح الخير ياأم العيال وهو اللقب المحبب لزوجته الراحلة

دخل المطبخ وملا ماكينة القهوة.. فتح الثلاجة  وطلع منها شوية جبن وزيتون , صب القهوة فى مج زجاج وخده مع فطاره وخرج فى الريسبشن حط الحاجة و دخل الحمام غسل وشه وسنانه وسرح شعره,خرج تانى على الريسبشن و فتح اللاب توب وبدأ يبص فى الميلات اللى جاتله.

سمع صوت باب الشقة بيتفتح, - إيه يا حبيبى إنت لسه صاحى دلوقتى؟

- أهلاااااا إزيك يا منى وحشانى يا حبيبتى

- إزيك يا بابا.. أنا كنت رايحة أشترى شوية حاجات لاقيت عربيتك قدام العمارة, سألت الأمن قالى إن حضرتك لسه مانزلتش قلت أطلع أصبح عليك

- تنورى فى أى وقت ياحبيبتى .. تفطرى معايا؟

- لا سبقتك مانت عارف بفطر بدرى مع العيال وأبوهم قبل ماينزلوا... أنا حاصب لنفسى قهوة... إيه ده صحيح مش الدكتور قالك قلل منها علشان قلبك؟

-ههههه مانا كده مقلل.. يادوب 3 مرات فى اليوم.. وبعدين هو يعنى حناخد زمنا وزمن غيرنا؟

- بعد الشر عليك يا حبيبى.. إحنا مالناش غيرك فى الدنيا

- لأ يا بكاشة إنت ليكى جوزك ربنا يخليهولك... جوزك ده راجل بمعنى الكلمة.. أوى تزعليه أبدا... عايزك كده تبقى زى مامتك الله يرحمها

- الله يرحمها

- أمك عمرها ما زعلتنى وكانت على طول مستحملانى وبتدور على راحتى

- وإنت يا بابا كمان كنت نعم الزوج.. حضرتك فضلت جنبها فى مرضها ومقصرتش معاها فى أى حاجة

دا حضرتك كنت سايب كل مشاغلك فى مصر وفضلت تسافر معاها أخر سنتين أمريكا وأوروبا علشان علاجها

- دى مش تضحية ولا حاجة أنا شايف إن ده العادى وأقل كمان ....

محاولة للتغلب على دموعها قالت مغيرة للموضوع

- مش حتسمع كلامى بقى ونشوف حد يخدمك ويشوف طلباتك؟ ينفع واحد فى مركز حضرتك وبيته مافيهوش خدم وحشم؟؟

- يا حبيبتى قلتلك مية مرة إنى ماحبش حد غريب يبقى موجود فى البيت.. وإحنا طول عمرنا كده ولا نسيتى؟

- صحيح الواد محمود أخباره إيه؟

- إيه؟ هو إنت مابتسأليش على أخوك ولا إيه؟

- يا باشا براحة عليا.. أنا لسه مكلماه من كام يوم

- الحمد لله هو زى الفل فاضله شهر ويخلص الدكتوراة ويرجع يمسك فرع الشركة الجديد

- الواد ده شكل ألمانيا حتعجبه ومايرضاش يرجع

- لأ يا دكتورة حيرجع.. داإبنى وأنا عارفه ..دا تربيتى أنا وأمك زيكم بالزبط

- والله أنا بهزر.. أنا لازم ألحق أنزل علشان أخلص اللى ورايا وأرجع قبل الولاد ما يرجعوا من المدرسة

- مع السلامة يا حبيبتى , سلمى على جوزك وبوسيلى الولاد

- مع السلامة يا بابا... وطبعت بوسة على خده

..................................................

طول عمر كامل حامد ربنا على نعمه عليه, لأنه فعلا يتقال عليه بدأ من الصفر إلى أن أصبح صاحب واحدة من أكبر المجموعات الهندسية فى البلد, ربنا رزقه بثلاثة أولاد وبنت يمكن وصفهم بأنهم فعلا ذرية صالحة , زوجته الراحلة كانت نعم الزوجة ولكنه رغم كل ذلك كان يشعر أن قلبه (ناقص حتة أو مش كامل) وكان الموضوع ده دايما بيحسسه إنه مقصر فى مشاعره ناحية زوجته .. مع إنه عمره ماقصر معاها فى أى شىء مادى أو معنوى وكان دايما بيسمعها كلام حب وغزل بس مش من قلبه كله لأن قلب كامل كان غير كامل. 

كان دائما ما يشعر أن جزء من قلبه قد فارقه مع حبيبة الصبا والشباب, تلك الفتاة الرائعة التى أحبها من كل قلبه وكان يشعر بحبها له, كانت الوحيدة من وسط شلة الأصدقاء التى تستطيع قراءة أفكاره بدون أن يتكلم, كان كلا منهما عندما يتحدث مع الأخر يشعر كأنه يتحدث مع نفسه, لم يستطع مصارحتها بحبه بسبب عدم مقدرته المادية, فقد كان مؤمن بأن الحب لابد أن تكون نهايته الزواج, وقد كانت هى من أسرة ميسورة الحال لذلك قرر أن يعمل بجد وإجتهاد بعد تخرجه ليستطيع التقدم لمحبوبته ولكن بعد سنة واحدة سمع خبر خطبتها ثم زواجها. حزن كامل بعض الشىء ولكنه إستمر فى عمله بنفس العزيمة, فقد كان مؤمن بان الإنسان لا ينال إلا نصيبه.. ولكن رغم مرور الأيام كان لا يزال يشعر أن جزء من قلبه قد فارقه للأبد.

.................................................

يتبع

ملحوظة مهمة: حسب التعليقات حكمل أو مش حكمل

العصا السحرية والأمنيات الممكنة


إزيكم ياجماعة

أنا فى البوست اللى فات كنت بتكلم عن العصايا السحرية

وعن الأمنيات الخاصة والعامة اللى حنطلبها تحققهالنا

لو كانت معانا

وكانت الردود عن الأمنيات الخاصة أغلبها

1- النجاح فى الحياة العملية

2- تغيير الصفات الشخصية السيئة

وكانت الردود عن الأمنيات العامة أغلبها

1- نمسح أدمغة الناس من الحاجات السيئة

1- مصر تبقى دولة عظمى ومتقدمة

دى كانت أغلب الردود وكان فى شوية أمنيات تانية (منها حاجات مستحيلة ومحتاجة العصايا بهارى بوتر شخصيا)

طيب

هى الأمنيات دى مستحيلة قوى كده لدرجة إحتياجنا لمعجزة خارقة لتحقيقها؟

لأ طبعا

مش مستحيلة

طيب نشوفهم واحدة واحدة

النجاح فى الحياة العملية

ده ممكن وممكن قوى وممكن خالص ويتطلب الأتى:

1- الإخلاص والجدية فى العمل

2- حب ما تعمل ولو مابتحبوش حب إنك بتبذل أقصى جهدك علشان تحلل أجرك

3- ضع أمامك هدف دائما وهو أن تقدم هذه الأمة لن يأتى إلا بالجد والعمل

4- راعى الله دائما وتأكد أنه لايضيع أجر من أحسن عملا

لأن ربنا دايما بيوفق المجتهد الاَخذ بالأسباب

يعنى لو واحد متدين ومهمل فى عمله وواحد لا يفقه شىء فى الدين ومجتهد تماما فى عمله

ربنا حيوفق المجتهد غير المتدين أكتر بكتير من المهمل المتدين

تغيير الصفات الشخصية السيئة

ده كمان ممكن من غير معجزات خارجية بس المهم:

1- الإعتراف بهذه الصفات.. يعنى الواحد مايضحكش على نفسه

2- عدم تضخيم هذه الصفات لأن تضخيمها حيصور للشخص إنها مستحيلة الحل

3- التأكد من أنها فعلا صفات سيئة

يعنى مثلا تلاقى واحدة شايفة مشكلتها إنها طيبة

أو واحدة تانية قلبها روهيف

أو واحد شايف إنه طيب ومتسامح مع الناس كلها

بمعنى اخر ممكن تكون مميزات وشايفينها عيوب

4- عدم اليأس من التغيير .. يعنى نحاول مرة وإتنين وعشرة ومية

5- التأكد من إمكانية التغيير

ولنا قدوة ومثل فى صحابة النبى صلى الله عليه وسلم قبل وبعد الإسلام

نمسح أدمغة الناس من الحاجات السيئة

دى بجد صعبة قوى

محتاجة توعية للناس الكبار

وتربية منهجية للأطفال

(أنا يتكلم عن النظام والنظافة وإحترام المواعيد وهكذا

يعنى مابتكلمش عن الصفات الشخصية زى الحقد والحسد والغيرة )

مصر تبقى دولة عظمى ومتقدمة

ده بقى موضوع كبير كنت عايز أتكلم عنه بسبب كذا حاجة

منها الإنتخابات والرئيس القادم من وجهة نظر الناس

وسلوك الناس اللى بشوفه كل يوم

والكلام عن الديمقراطية

والإزمات النتتالية اللى عايشيين فيها

وكاس العالم اللى بقى هدف قومى

وحقيقة هى الناس عايزة إيه

ولذلك حخلى الموضوع ده فى بوست لوحده

أشوفكم على خير

الأربعاء، 24 فبراير 2010

العصا السحرية


كنت بسمع برنامج الصبح على نجوم إف إم

كان بيتكلم عن الأتى:

لو معاك عصاية سحرية

تعمل بيها إيه؟

الشوية اللى سمعتهم من البرنامج

كانت أغلب الأمنيلت الشخصية هى

الجواز

أما أغلب الأمنيات العامة فكانت

أوصل مصر كاس العالم

عااااااااااااااااااااا

.

يعنى خلاص كل حاجة تمام

ماناقصش غير الوصول لكاس العالم

؟

؟

طيب السؤال ده لكل واحد حيقرا البوست ده

لو معاك عصاية سحرية

إيه الحاجات الشخصية اللى حتغيرها

وإيه الحاجات العامة (أبوس إيديكم غير الوصول لكاس العالم)

الاثنين، 22 فبراير 2010

كفاااااااااااااية


مافيش شغل عايز يخلص

حراااااااااااااااااام

.

.

أنا خدت راحة 10 دقايق

.

.

كنت حاسس إنى حانفجر

.

.

أنا راجع أكمل شغل

الأحد، 21 فبراير 2010

الفريق العربى والفريق اليابانى


الميل ده جانى وعجبنى قوىىىىى لأنه حقيقي وبيعكس الفرق بينا وبين اليابانيين

ذات مرة كان هناك سباق تجديف بين فريقين

((عربي)) و ((ياباني))

كل قارب يحمل على متنه تسعة أشخاص


وفي نهاية السباق وجدوا أن


الفريق الياباني انتصر بفارق رهيب جداً


وبتحليل النتيجة


وجدوا أن
الفريق الياباني يتكون من


1 مدير قارب و8 مجدفين

الفريق العربي يتكون من


8 مديرين و1 مجدف

حاول الفريق العربي تعديل التشكيل ليتكون من


مدير واحد .. مثل الفريق الياباني


وتمت إعادة السباق مرة أخرى


وفي نهاية السباق وجدوا أن


الفريق الياباني انتصر بفارق رهيب جداً


تماماً مثل المرة السابقة


وبتحليل النتيجة


وجدوا أن


الفريق الياباني يتكون من


1 مدير قارب و8 مجدفين


والفريق العربي يتكون من


1 مدير عام و3 مديري ادارات و4 مدراء أقسام و1 مجدف


فقرر الفريق العربي محاسبة المخطئ


فتم فصل المجدف!!!

الجمعة، 19 فبراير 2010

إبداع

أنا لما شوفت اللوحات دى إنبهرت

حقيقي إنبهرت

وعرفت إن العالم خسر فنان عبقرى زى ده

أنا مش عارف أسامى اللوحات

علشان كده سميتها حسب فهمى ليها

إنفرجوا وإنبسطوا وخمنوا مين اللى رسم اللوحات.............قصدى الإبداعات دى


قارة أمريكا الجنوبية من منظور حلزونى


أحدث خطوط الموضة من NIKE (شايفين علامة صح الصغننة دى؟)


الأهرامات من منظور واحد واقف على دماغه والرملة السخنة لحست مخه


سطوع قمر كوكب حلبسه من خلال الطين الأسمر فى السماء الصفراء


سائح أخضر ينظر مندهشا إلى الأهرامات السوداء رافعا حواجبه الحمراء

علبة سجاير ومغازلة تحت المطر

لوحة أبيحة

تليفزيون وشباك وحوض سمك 3 فى 1

لأ... دى االلى كان بينضف الفرش عليها

فعلا إبداااااااااااااااااع

حد عارف مين ده؟

الأربعاء، 17 فبراير 2010

أفتار.... كلمنى شكرا


فى السنة اللى قدمت فيها السينما الأمريكية

أفاتار

,

,

,

,

,

,

قدمت السينما المصرية

كلمنى شكرا

أفلام عربى

طز فى الأجنبى

(ومشوها طز علشان الرقابة)

الجمعة، 12 فبراير 2010

الزلانطين داى


أولا الصورة دى عجبانى قوى

ثانيا أنا كنت ححط صورة ساخرة

بس للأسف الصورة دى عجبانى قوى

ثالثا أموت وأعرف مين اللى دخل الزلانطين ده مصر؟

لغاية من حوالى 10 سنين فاتوا (فاتوا هوا والله)

ماكانش ناس كتير تعرف يوم الفلانتين ده

أنا عجبتنى قوى كلمة زلانطين من شوقية (ست كوم تامر وشوقية)

أنا أول معرفتى بيه كانت من 9 سنين

كنت خاطب ماكملتش سنة

ومراتى اللى كانت خطيبتى (نفسى أعرف إزاى استحملتنى وكملت وإتجوزتنى)

كانت مصرة إنى أروح لها اليوم ده

ياستى أنا عندى شغل

-ماليش دعوة

طيب مانا باجيلك الجمعة (كانت بتشوفنى يوم واحد فى الأسبوع

ربنا يكون فى عونها البنية دى)

-ماليش دعوة لازم تيجى النهاردة

المهم ......ماكدبتش خبر وطلعت من الشغل عليها

قعدنا شوية وبعدين لاقيتها بتدينى ظرف

بفتحه (للأسف ماطلعش فيه فلوس)

لاقيت كارت شكله جميل وبيتفتح

فتحته ... أتاريه بيعمل موسيقى ومرسوم فيه قلوب

وكاتبالى فيه كلمتين حونينين

ولاقيتها بتقولى : كل سنة وانت طيب

هه

-كل سنة وانت طيب (بنبرة غيظ)

وانت طيبة بس أنا عيد ميلادى كان الشهر اللى فات

-عيد ميلاد ايه بس ... دا علشان الفلانتين

وده مين ده؟!!

طبعا هى ماستحملتش وانفجرت فيا

-كل صحباتى النهاردة عمال يجيلهم فى ماسجات

واللى خطيبها يعدى عليها جايب لها ورد

واللى خطيبها عازمها بره

وأنا ماعبرتنيش حتى بكلمة.

طبعا أنا أزبهليت 

وقعدت أهدى فيها 

وقلتلها نتكلم بعدين تكون راقت

تانى يوم لفيت على أصحابى كلهم فى الشغل

وسألتهم عن الزلانطين

لاقيت تلات تربعهم ماسمعش عنه ولا حتى فى طبق اليوم

فعلا المهنسين دول مالهمش غير فى الشغل

سألت إخواتى وأهلى وحبايبى (والمجتمع والناس)

لاقيت أربع تخماسهم مايعرفوش حاجة عنه

فرحت جدا لأنى كنت متأكد كنت متأكد مع إنى كنت شاكك

إن الزلانطين ده مش كل الناس عارفاه

المهم دورت ورا الموضوع

وعرفت إنه عيد القديس فالانتين

ففهمت مراتى لما كانت خطيبتى

إنى لأسباب دينية ماحبش أحتفل بالعيد ده

وكنت سألت وقرأت وكونت رأيى فى الموضوع

وهى فهمت وإحترمت رأيى

ولغاية النهاردة ماشيين على إتفاقنا (ربنا يستر ونكمل كده)

بس للامانة هى مرة جابتلى هدية كنت حموت عليها

حاجة من الحاجات اللى بعشقها

الكلام ده من سنتين أو تلاتة

وقولتلها إحنا مش متفقين؟

-لا والله بس هما عاملين عرض جامد علشان الزلانطين

وأنا برضه فى خلال أسبوع قبل أو أسبوع بعد الزلانطين

باجيبلها بوكيه ورد معتبر

ومن غير نق وقر أنا بجيب ورد كل كام إسبوع كده

بيعمل جو رومانتيكى فى البيت

وللحديث عن الزلانطين بقية

الأربعاء، 10 فبراير 2010

دى بلد تستاهل إننا نشجعها؟


السؤال ده سأله واحد من أصحابى

بعد ماتش مصر وموزمبيق فى بطولة أفريقيا الماضبة

كنت بتفرج على الماتش مع 2 أصحابى فى كوفى شوب

الماتشات دى فرصة إننا نشوف بعض ونتكلم

المهم

لما سأل السؤال ده إحنا بلمنا شوية وبعدين فلناله

طبعا لازم نشجع فريقنا حتى لو كان وحش

قال: أنا مابتكلمش على الفريق أنا بتكلم عن البلد

قلتله مش فاهم؟؟!!

قالى : شايف الزحمة والتلوث والفساد اللى عايشين فيه؟

فلت: ماشى بس دى برضه بلدنا

قالى: الواحد ليه فى بلده أهله وصحابه

يعنى لو أعرف أخدهم وأعيش فى أى بلد تانى

حتبفى بلدى ومش عايز من البلد دى حاجة

صاحبى التانى قال لأ طبعا الكلام ده غلط

يعنى أنا من الإسماعيلية ومهما عشت فى القاهرة بحن للإسماعيلية

وببقى فرحان جدا لما برجعلها

صاحبى الأول فاله: علشان الإسماعيلية أروق وأنضف من القاهرة

المهم إتناقشنا شوية وبعديها غيرنا الموضوع ورجعنا للكرة

بس الكلام ده فضل فى دماغى

وفكرت فيه كتير مع إنى عارف الإجابة

أكيد بلدنا مش أهلنا وصحابنا وبس

لأ

دى الشوارع والحوارى

محلات الأكل وعصير القصب

القهاوى البلدى

زينة رمضان وكحك العيد

الصعايدة والفلاحين

الوجوه السمرا الطيبة

إسكندرية وريحة البحر

ريحة المطر فى الشتا

أغنية فريد الأطرش فى الربيع أدى الربيع عاد من تانى

البيض الملون والفسيخ فى شم النسيم

الناس العواجيز وهما نازلين يصلوا الفجر

دعاء أمهاتنا من على سجادة الصلاة

التمشية فى وسط البلد

أكل الترمس والدرة المشوى على الكورنيش

.

.

.

.

وحاجات تانية كتير

وإذا كان فى حاجات وحشة

أكيد فى حاجات حلوة كتير

ممكن أكون متفائل زيادة عن اللزوم

بس أنا بحب البلد دى

 

الثلاثاء، 9 فبراير 2010

أاااااااه يانى


الإنفلوانزا تعبانى من يوم السبت

بعد ما رجعت من المعرض

حاليا أنا ملازم الفراش

إدعولى بالشفاء

السبت، 6 فبراير 2010

زيارة معرض القاهرة الدولى للكتاب 2010

أمس 6-2-2010 كانت زيارتى الثانية السنة دى للمعرض

الزيارة كانت مميزة جدا جدا بالنسبة لى

ليييييييه؟

1- أخذت توقيع سحر غريب على كتابها الجديد

تعيش وتاخد غيرها

سألتنى عن أسمى علشان تمضيلى 

قولتلها أنا فى عالم التدوين بكتب أبوحميد

لاقيت حد بيقولى 

إنت بقى أبو حميد؟

أن أن أن أاااااان

إيه ياجدعان هو حد يعرفنى هنا؟

لاقيت واحدة بتبتسم ليا وبتمد إيدها تسلم عليا وتقولى

أنا فاتيما

سلمت عليها وأنا مبسوط جدا إنى قابلتها (وإنى بقيت مشهور كده :)  )

2- أخدت توقيع أحمد الصباغ على كتابه

الضرب فى الميت

ومضالى على نسخة لأختى الصغيرة

وأختى دى سبب معرفتى بعالم التدوين وبالصباغ

لأنها كانت زميلته فى كلية زراعة 

3- أخدت توقيع مصطفى ريان على كتابه

إعترافات رئيس سابق

وكنت مبسوط جدا إنى شوفته

إنطباعاتى عن الناس اللى شوفتهم النهارده

أحمد الصباغ: مهذب جدا وخجول وكان فرحان قوى 

سحر غريب: واثقة من نفسها وكانت عينيها فرحانة

فاتيما: طيبة خالص ومجاملة وكانت واقفة كأن كتابها هو اللى بيتوقع

مصطفى ريان: شاب مهذب و طيب وخجول

ألف مبروك لينا كلنا إن عندنا شباب زى دول

الأربعاء، 3 فبراير 2010

السر؟


كل واحد عنده سر
جوا منه ومداريه
طبعا كلنا سمعنا الأغنية دى
وأكيد كل واحد فينا عنده
سر مش عادى
1- بنحكى أسرارنا لمين؟
2- ينفع نخبى عن شريك حياتنا سر مش عادى من الماضى؟
3- ينفع نخبى عن شريك حياتنا سر عادى فى الحاضر؟
4 - ينفع نخبى عن شريك حياتنا سرمش عادى فى الحاضر؟
5- هو من حقنا أصلا يكون فى أسرار مستخبية عن شريك حياتنا؟
6- حد فيكم عنده سر مضايقه ممكن يقوله لينا ومايبقاش سر؟

الاثنين، 1 فبراير 2010

صندوق الذكريات

بالتأكيد يمتلك كل شخص صندوق ذكريات

يحتوى على صور, قصاصات , زهور , هدايا تذكارية

نضع هذا الصندوق داخل الدولاب أو تحت السرير

نشارك بعض الناس هذه الأشياء او نحتفظ بها لأنفسنا

فى الغالب تكون هذه الذكريات سعيدة 

نفتح هذه الصناديق ونغلقها وقتما نريد

أما العقل فيحتوى على العديد من صناديق الذكريات

بعضها سعيد

وبعضها حزين

بعض هذه الصناديق نفتحها حينما نريد

وغالبا تكون بدون أقفال

أما البعض الاخر فنضع عليها العديد من الأقفال والسلاسل

وتقوم بإخفاء أو رمى المفاتيح

على أمل ألا يتم فتحها على الإطلاق 

ولكن.....

قد تشاهد شخص,

تحلم أثناء نومك,

تزور مكان ما,

تقرأ موضوع أو قصة

وفجأة

تنكسر كل السلاسل وتفتح كل الأقفال

وتجد جميع هذه الذكريات وقد خرجت من محبسها

تلملم ذكرياتك وتحاول وضعها ثانية فى الصندوق

إذا نجحت فى ذلك تحاول إقفال الصندوق

إذا نجحت فى ذلك أيضا لن تضع أقفال

وإذا وضعت لن

ترمى أو تضيع المفاتيح

بل ستحتفظ بها

لأن بعض ما خرج من الصندوق أعجبك

وأعاد لك بعض الذكريات والأحاسيس

وأدركت بعد مرور الزمن انها لم تكن بهذا السوء

أو هذه القسوة