Recent Posts

الثلاثاء، 8 فبراير 2011

أنا إسمى على

أنا إسمى على
(كنت) بشتغل عسكرى أمن مركزى
من قرية صغيرة من ريف أو صعيد مصر
مش مهم تعرف بالظبط
فى قرى كتير زى بعضها
وفيها ناس كتير زيى
أنا مادخلتش المدرسة
أبويا فلاح ما إتعلمش
ماصدق ربنا رزقه بصبيان علشان يشتغلوا معاه ويساعدوه
ماعندناش أرض
بنشتغل عند راجل مقتدر
مش حطول عليكم
لما وصلت لسن التجنيد روحت على المركز
والمركز بعتنى لمنطقة التجنيد
دخلت أمن مركزى علشان الباشا
قال عليا أنا واللى دخلوا معايا - لامؤاخذة- بهايم
شوفنا المرمطة والإهانة فى مركز التدريب
بس إحنا إستحملنا
ما إحنا لازم نستحمل وإلا الباشا حيعلقنا
فى زمايلى كانوا مريحين قوى
اللى شغال بيجيب الخضار للهانم مرات الباشا الكبير
واللى بيسيأ لها البيت
واللى بيودى العيال النادى ويستنى لغاية لما يرجعهم البيت تانى
والعيال بصراحة ماكانوش يتخيروا عن أبوهم الباشا فى المعاملة
المهم أنا كنت مثال للعسكرى النموذجى
بسمع الكلام ومابفكرش
والحقيقة كلنا كنا كدة
طيب وأفكر ليه؟
حتقولى إقرا وإعرف
يا بيه قولتلك أنا مادخلتش المدرسة
وبعدين علمونا إن الباشا هو اللى بيفكر
وهو اللى بيفهم
وإحنا -لا مؤاخذة- مواشى بنفذ بس
بس برضه قالولنا إننا بنحمى البلد
من المخربين والجواسيس
يبقى أنا بخدم بلدى... مش كده؟
يوم 25 كنا فى الشارع علشان نحمى البلد من مظاهرات
عاملها شوية عيال عايزين يعصوا كلام الريس
الريس؟
دى عيال فاجرة صحيح
ده الريس!!!!!
دانا ما أقدرش أكسر كلمة أصغر باشا من البشوات اللى عندى
قالولنا إن العيال دى بيخربوا فى البلد ولازم نلمهم
شوفت العيال دى فى المظاهرة
هما مش عيال
شباب قدى وأصغر وأكبر
ورجالة كبيرة وبنات
مش عارف إيه اللى يطلع حرمة لغاية بالليل مع شباب زى دول؟!!!
كلهم شكلهم معاهم فلوس ومبسوطين
طيب الناس دى عايزة إيه
أكيد عايزين يخربوا البلد
ويومها بالليل عرفنا نمشيهم من التحرير
بس بعد ما هلكنا
تصدقوا لو قولتلكم إننا تعبنا أكتر منهم؟
ده إحنا فى الشارع بقالنا 24 ساعة من غير ما نقعد
واللى أكل منا أكل لقمة صغيرة
خلص اليوم بعد ما ضربنا الناس دى ومشيناهم
تانى يوم لقيناهم عاملين مظاهرات تانى
يا دين النبى
العيال دى مابتهمدش؟
عدى اليوم
ويوم الخميس نفس الموال
بس يومها الباشا قالنا إن يوم الجمعة حتبقى فى مظاهرات جامدة جدا
ربنا يستر.. أنا رجليا وجعانى ومش شايلانى
يوم الجمعة كنا فى وسط البلد
بصراحة أنا ما صلتش الجمعة
الباشا كان موقفنا مستعدين علشان المظاهرات بعد الصلاة على طول
يادوب الصلاة خلصت من هنا
والباشا أمرنا نضرب قنابل مسيلة للدموع على الناس
اللى طالعين من الجامع وبدأوا يهتفوا
طيب الناس دى لسه خارجة من بيت ربنا
ينفع كده يخربوا البلد؟
حاولنا نفرقهم بالقنابل
والعصيان وإحنا ماسكين الدروع
الناس عمالة تزيد زى النمل
بييجوا منين دول
والباشا أوامره واحدة
لازم نفض المظاهرة دى بأى تمن
بس فى حاجة غريبة عن يوم 25
الناس دى مش كلها شباب
ومش كلهم شكلهم معاهم فلوس
فى منهم ناس شبهى
طيب دول بيخربوا البلد ليه؟
فضلنا نضرب والناس تزيد
حدفوا علينا طوب ردناهلهم تانى
فى راجل كبير إتعور
شكله كده ممكن يموت
الباشا أمر سواق المدرعة يدخل فى وسط الناس علشان يفرقهم
 العسكرى اللى بيسوق قاله يا باشا ممكن حد يموت
الباشا قاله إخرس يا حيوان.. يموتوا ولا يولعوا بجاز
وفعلا
المدرعة خبظت كام واحد وموتتهم
بصراحة أنا وقفت وبطلت ضرب
زميلى محمد قالى اليوم مش معدى على خير
الناس كترت على المدرعة
وواحد حدف جواها إزازة مولوتوف
الباشا كان فى المدرعة
أنا محمد زميلى لقيته بيقلع بدلته وبيجرى
أنا فضلت واقف ومش عارف أعمل إيه
وفجأة ما حستش بحاجة
------------------------------------------
أنا عرفت إن الناس دى مش وحشة
هما عايزين حقهم وحقى
عرفت إن فى شباب وبنات ماتوا
أنا ماكنتش أقصد أموت حد
أنا قالولى إنى بحمى البلد
سامع الناس بيقولوا على اللى ماتوا دول شهداء
وبيصلوا عليهم
وبيدعولهم
وحيكرموهم وبيواسوا أهاليهم
طيب أنا مين حيواسى أمى
ومين حيساعد أبويا بعد ما نظره راح
--------------------------
أنا إسمى على
(كنت) عسكرى أمن مركزى
أنا عارف إن ربنا هو الحكم العدل
وهو الرؤوف الرحيم 
وهو كان عارف نيتى
أنا كنت بحمى البلد
الباشا هو اللى قالى كده 
 ------------------------------------
حينفع تدعيلى أنا وزمايلى
إحنا كنا عارفين إننا بنحمى البلد
إدعى للشهدا
بس ما تنساش تدعيلى  
-------------------------------------
أنا إسمى على
(كنت) عسكرى أمن مركزى 

 

11 التعليقاااااااات:

أبو حميد يقول...

على وكتير زيه ماتوا من غير ما يعرفوا السبب
أو كانوا فاهمين إنهم بيحموا البلد
حسابهم دلوقتى عند ربنا
بس يارب ما ننساش ندعيلهم لأن الذنب الأكبر على رؤسائهم

reem يقول...

باشمهندس احمد
عجبنى جدا انك افتكرت ناس ممكن فعلا في وسك الزحمة ننساهم مع انهم نيتهم كانت مش وحشة ومتوقعين انهم بيقوموا بواجب وطني

اعتقد والله اعلم انهم كمان ممكن يكونوا في منزلة الشهداء لان نيتهم كان الدفاع عن الوطن والارض حتى وان فقدوا حياتهم مقابل ذلك

رحمهم الله

فاتيما يقول...

:(


للأسف يا أبو حميد
اللى طلع يتظاهر ..كان طالع عشان البلد
وعشان اهله وناسه

والناس دول
على كان منهم

والموجع ان تنتهى حياة
هذا المظلوم
وهذا المخدوع
ويبقى المجرم الحقيقى على قيد الحياة
عشان يبقى ذنب الجوز ف رقبتنا
ويخلينا نصر على مطالبنا
ف الحرية والكرامة

عشان اللى زى على
يتعلم كويس
ويعيش مستور
وميتذلش لحد
وأى رتبة تتحكم فيه
ولما ييجى وقت اسود زى دا
يعرف يختار ..هيقف مع مين
ويتراجع عن إيه


ربنا يرحم الشهداء
ويسكنهم رحاب جناته


اما الطغاة فبئس المصير
ان شاء الله


حلو البوست جدا
يسلم لسانك

Montana Master Of Love يقول...

الله جميله اوي بجد علي وكتير زيه بيختاروهم ع الفرازه يا بو حميد
بعد ما علي بيفقد حقه ودوره في التعليم
بسبب الظروف اللي في البلد ال مخالتوش يتعلم بيبتدي يهيء نفسه انه انسان عايش بدون هدف معين رسالته في الدنيا بسيطة ورغم كونه مهم مبيحسش بقيمته و الكل بيعامله كأنه مش بشر ..
في اختبار الجيش بيختاروا علي جندي الامن المركزي بطريقه مختلفه عن اي جندي تاني عشان يقد ينفذ الاوامر اسرع
------------------
زي ما قال من قلب الحياه
بص يا سيدى ... بيوقفوهم فى ساحة كبيرة وينادى واحد فى الميكرفون بصوت عالى جدا
( اللى مبيعرفش يقرا ويكتب يقف فى الجنب اليمين... واللى بيعرف يقرا ويكتب يقف على الجنب الشمال ) ويستنى دقيقة كده...بيفضل شوية كده واقفين فى النص ...........................00
هما دول بقى اللى بيبقوا عساكر الأمن المركزى
--------------------------------------------
حد بيتحكم عليه انه ينفذ المر قبل ما يفكر .. ومش هو وبس الحكايه دي ميري من الكبير للصغير .. نفذ وبعدين فكر .. وهو من الاول ماخدش حقه في انه يفكر .. يعني علي كويس اوي وكتر خيره انه وقف وفكر في لحظة قبل ما يضرب اخواته ..
انا سامع علي كويس و بقول يارب علي يتعلم و يبتدي يفكر ويفرق بين عدوه وحبيبه
عشان يقدر يعيش حياة كريمة من غير ما يشيل زنب واحد اتعلم و تهب وكبر وفكر و يموت برصاصه من غير تفكير طلعت من علي .. وكل زنبه انه كان بيقول لأ .. انا عاوز حقي بكل ادب .. خد اتعلم عشان يفيد بلده .. و انتهت حياته برصاصه من علي .. يا علي نسفي من النهارده تبتدي تتعلم و دا حقك لما يتقالك يمين تفكر و تقف و تقول حقي حقي .. تحب بجد و تحس انك ليك كرامه تهادي حبيبتك بورد وتعرف تكتبلها علي الكارت كلمه حلوه تفتكرهالك وانت في الجهاديه .. ومتحتاجش لصاحب يكتبلك رساله تقولها وحشتيني وانت ف غربتك .. انا نفسي تبقي انت كدا يا علي انت وكل المصريين و الناس الطيبة .. تعرفوا قيمتكوا و دوركم لبلدكم و يعرف الظابط انه اخوك و اولاده انك اخوهم ..ومتنجرحش ابدا يا علي ولا تجرح مخلوق غير عدوك ال انت عارفه وبس
ربنا يحفظ مصر .. ويسلم ايديك يا ابو حميد

sbarny_yarb يقول...

انت متخيل ان احنا لما نقول شهداء الثوره مش من ضمنهم العساكر الغلابه الى زجوا بيهم لمعركه زي دي ومش دي بس كل حاجه

يا احمد الناس الى طلعت بالثوره دي طلعت عشان كل الناس تاخد حقها حتى عسكري امن الدوله يتعامل كبنى ادم

الله يرحمه ويحرم كل الشهدا ويخلصنا من الظالمين

حفيدة عرابى يقول...

وبعدين فى وجع القلب ده على الصبح
الله يرحم على ويرحم كل أمواتنا ويرحمنا
الحمد لله ان ربنا سبحانه وتعالى بس هو اللى هيحاسبنا بعدله ورحمته
ومش قادرة اتخيل اننا كان ينفع نحاسب بعض ..كانت هتبقى الغابة ملاذ آمن عن مصيرنا

فاتيما عملت وش مكشر اللى كان نفسى اعمله
وكتبت هى وصبرنى عن رأيى من هدف الثورة
بس بجد تسلم الايادى

لاننا فعلا الحماس بياخدنا كتير والمعسكر التانى وقت الحماس والغضب بيبقى كله أعداء وبننزع عنهم حتى صفاتهم الانسانية

زى على كده مقال قرأته ووقفنى مش عارفة اتكلم عن ولد من نزلة السمان من محاربى معركة الخيول والجمال واتقتل ضرب
وهو مش فاهم الحال وقف ليه وراح التحرير ليه وضربوه ليه


أنا بدأت أخاف ومش عايزة فى غمرة الحماس نبقى من الظالمين
ربنا يلهمنا الرشد

صيدلانيه طالعه نازله يقول...

قريتها بالليل وبكيت
و قريتها الصبح مرتين تانى وبكيت اكتر
عارف من اول ما قريته افتكرت احمد سبع الليل فى فيلم البرىء اما اقنعوه ان المعتقلين دول اعداء الوطن
و ما فاقش غير اما لقى صاحبه و المثقف اللى فى بلدهم معتقل معاهم
للاسف الناس دى مستضعفه و مستعبده جامد اوووى
و مش ب
ايديهم اللى بيعملوه
ربنا يرحم الكل و هو وحده الحكم العدل و المطلع على ذات الصدور
وافتكرت اوووى اغنيه عمار الشريعى

الدم اللى فى ايديا
بالليل يشهد عليا
و يقوللى قتلت مين

ربنا يرحمنا جميعا و يعديها على خير

خواطر شابة يقول...

عارف فيلم البرئ لآحمد زكي أرى فيه التجسيدالحرفي و الواقعي لما ذكرته
وأخير أقول عاشت مصر دوما عزيزة بأهلها

الطائر الحزين يقول...

مبروك مبروك مبروووووووووووك
مبروك مبروك مبروووووووووووك
مبروك مبروك مبروووووووووووك
مبروك مبروك مبروووووووووووك

حنعيش يعنى حنعيش يقول...

قولت انت لازم تحترف برة محدش صدقنى .... تسلم ايدك

مونتي يقول...

صديقي العزيز .. استاذنك هتكلم عن علي في حلقة خاصه جدا وهقول اراء اجمل مدونين فيها .. جه في بالي كلامك و اسلوبك و حبيت اشارك بيه ربنا يوفقكم

إرسال تعليق