Recent Posts

الأحد، 28 مارس، 2010

صداقة من نوع مختلف


السؤال اللى ناس كتير مختلفة على إجابته

هو فى صداقة بين ولد وبنت؟

ناس كتير بتقول أه طبعا وإيه المشكلة؟

وظهرت موضة صاحبتى الأنتيم للولاد

وصاحبى الأنتيم للبنات

طيب هو الكلام ده ينفع؟

يعنى مثلا الشاب يحكى لصاحبته الأنتيم عن حبيبته

أو بعد المحاضرة أو الشغل ينزلوا مع بعض علشان تشترى هدوم جديدة

أو هى تكون نفسيتها تعبانة شوية بسبب قصة الحب اللى عايشاها

فتجرى تقابل صاحبها وتقعد تحكيله وتفضفض وتعيط 

وهو قاعد جنبها يمسح دموعها ويطبطب على ضهرها

طيب دول الشباب اللى لسه مش مرتبطين

طيب ينفع مثلا إن واحد يقول لمراته:

معلش يا حبيبتى أنا النهارده حتأخر شوية

حنزل مع سوسو صاحبتى تشترى شوية حاجات

فهى ترد وتقوله: وماله يا روحى أنا كمان حقابل ميدو صاحبى

أصل ياعينى حالته صعب خالص ومراته منكده عليه عيشته

طيب يعنى ما ينفعش يكون فى صداقة بين الرجل والمرأة؟

رايى الشخصى إن كل شىء لازم يكون له حدود

أنا ليا زميلات كتير من أيام الجامعة ومن الشغل

وبنتقابل فى مناسبات كتير

لكن العلاقة بينا لازم يكون ليها حدود

ودلوقتى أعرف ناس كتير من عالم التدوين وليا شرف معرفتهم

واتمنى أقابلهم فعليا واتواصل معاهم

لكن أنا مش مع الرأى اللى بيقول إن عادى يبقى فى صداقة بين الجنسين

يعنى ماينفعش إتنين يخرجوا لوحدهم يروحوا السينما مثلا

تحت أى مسمى إننا زى الإخوات

أو إن الولد ده زى إبنى

أو إنه فى عمر أبويا

كل ده فى رأيى الشخصى حجج فارغة

الرجل والمرأة مثل قطبى المغناطيس 

يجب أن تكون بينهما دائما مسافة كافية

وإلا سيحدث إنجذاب لا إرادى لقطبى المغناطيس

بس خلاص

السبت، 27 مارس، 2010

حاجتين


حاجتين 

أغلب المصريين

شايفين إنهم خبراء

وبيفتوا فيهم

الكورة

وللأسف

.

.

الدين

الخميس، 25 مارس، 2010

برج دبى

برج دبى

مفخرة الإمارات

أعلى بناء فى العالم

تشاهده من أى مكان فى دبى

دليل حضارة وعلو شأن الإمارات

يدل على .........

ستوووووووووووووب

إيه يا عم خير فى إيه؟

لا أبدا أنا عايز أقول رأيى فى الموضوع ده بس

رأى إيه خير اللهم أجعله خير.. مش عاجبك البرج ولا إيه؟

لأ طبعا عاجبنى ونفسى أزوره كمان

أمال إيه؟

كل اللى حضرتك بتقوله ده صح ميه فى الميه بس إحنا إستفدنا إيه بالبرج ده؟

بقى عندنا أعلى برج فى العالم .. مش كفاية دى؟

أنا كان عندى إقتراح تانى ممكن يتعمل بالفلوس دى

؟؟

كنا نزرع أكبر مزرعة فى العالم

ودى فين دى إن شاء الله؟

السودان.. شوف بقى الحلم ده.. كنا بالفلوس دى وشباب كتييييييير مش لاقى شغل وبأرض خصبة مش محتاجة مجهود كبير كنا زرعنا اللى يكفى الوطن العربى كله وعملنا مزارع ماشية وكنا أكلنا الوطن العربى كله لحمة ورخيصة كمان

وإيه المشكلة إحنا بناكل اللحمة دى كل يوم

أه طبعا.. بس فى ناس عندنا فى مصر بيشوفوها من العيد للعيد ودول يحمدوا ربنا

لأن فى ناس فى السودان والصومال ودول تانية بيموتوا من الجوع

وده بجد مش مبالغة 

:(

طيب شوف كمان ممكن نعمل إيه.. ممكن نعمل مراكز أبحاث ونشجع العلماء والمخترعين ونديهم فلوس تخليهم مايطفشوش على بلاد بره.. ونعمل عندنا نهضة علمية وتكنولوجية

همممم ممكن

طيب بلاش دى.. إحنا بالفلوس دى نعمل مصانع كتير كبيرة ونعمل مصانع أكتر صغيرة ونشارك بيها ألاف الشباب .. نخليهم يشتغلوا ويكسبوا ويكسبونا ويتجوزوا ويتحولوا لناس منتجة يرفعوا بلدهم فوق ويرفعونا كلنا معاهم.

إيه يا عم الحقد ده.. كل ده علشان بنينا البرج اللى بنفتخر بيه كلنا كعرب؟

لأ ده مش حقد ولا حاجة بس ممكن تجاوبنى على الكام سؤال دول

- الفلسطينيين المحتلين اللى مش عارفين ياخدوا حقوقهم بيفتخروا بالبرج ده كعرب؟

- السودانيين اللى بعضهم عندهم مشاكل وبيعانوا من المجاعة  بيفتخروا بالبرج ده كعرب؟

- الصوماليين..  بيفتخروا بالبرج ده كعرب؟

- الموريتانيين....  بيفتخروا بالبرج ده كعرب؟

- أى مواطن فى أى دولة عربية مش لاقى قوت يومه  بيفتخر بالبرج ده كعرب؟

إستنى شوية.. وأنا مالى بكل اللى بتقوله ده؟

أومال إيه كعرب دى؟.. طيب سايبنى ورايح فين؟

رايح أبدأ فى بناء مدينة دبى الرأسية اللى قد البرج ده مرتين

إنا لله وإنا إليه راجعون

ملحوظة مهمه: أنا بحب الشعب الإماراتى جدا جدا يعنى البوست ده مش هجوم عليهم بس هما ممكن مايكونوا مش واخدين بالهم لأنهم عايشين فى عالم تانى وممكن لو كنا مكانهم كنا عملنا كده وأكتر

وأنا بعبر عن مجرد أحلااااااااااااااااااام

سؤال مش عارف إجابته: هى ليه دول كتييييير أغنى وأكثر تقدما مابتحاولش تبنى أعلى برج فى العالم؟!!

الاثنين، 22 مارس، 2010

حكم


يوجد دائماً من هو أشقى منك ، فابتسم

إذا طعنت من الخلف فاعلم أنك في المقدمة

الكلام اللين يغلب الحق البين

كلنا كالقمر .. له جانب مظلم

لا تطعن في ذوق زوجتك، فقد اختارتك أولا

لن تستطيع أن تمنع طيور الهم أن تحلق فوق رأسك ولكنك تستطيع أن تمنعها من أن تعشش في راسك

من العظماء من يشعر المرء فى حضرته أنه صغير ولكن العظيم بحق هو من يشعر الجميع في حضرته بأنهم عظماء

من يطارد عصفورين يفقدهما معاً

المرأة هي نصف المجتمع ، وهي التي تلد و تربي النصف الآخر

لا تجادل الأحمق ، فقد يخطئ الناس في التفريق بينكما

قد يجد الجبان 36 حلاً لمشكلته ولكن لا يعجبه سوى حل واحد منها وهو .. الفرار

منقول من بريد إلكترونى 

الأربعاء، 17 مارس، 2010

العاقل


-يا إبنى حرام عليك اللى بتعملوه فيا وفى نفسك ده

- فيه إيه بس يا أمى.. حياتى وأنا حر فيها

-الكلام ده كان زمان قبل ما تتجوز وتخلف وتبقى فى ناس مسؤلة منك

-معلش .. دى حياتى وأنا عارف مصلحتى

-يعنى عايز تطلق مراتك وإنتم معاكم تلت عيال وتتجوز غيرها وتقول مصلحتك؟

- هى اللى طلبت الطلاق لما عرفت إنى عايز أتجوز

-حقها طبعا .. (باكية) أنا مش عارفة إيه اللى جرالك دا إنت طول عمرك عاقل

**********

- حسبى الله ونعم الوكيل فيك

- ..........

- ده أنا كنت بعاملك زى إبنى وأكتر تقوم تبهدل بنتى كده

- أستغفر الله العظيم.. بهدلة إيه بس؟

بنتك واصلها حقها تالت ومتلت وحتوصلها نفقتها ومصاريف العيال أول كل شهر

وأى حاجة تلزمهم أنا كفيل بيها

عايز إيه تانى

- يعنى إنت مش شايف إن الطلاق وعيشيتها ببنتين وولد لوحدها مش بهدلة

وكل ده علشان عايز تتجوز تانى .. يا أخى إتقى الله فى ولادك

- اللهم طولك يا روح.. يا عمى كل شىء قسمة ونصيب

أشوف وشكم بخير

- مش عايزين نشوف خلقتك خالص

- لأ.. دا غصب عن التخين علشان أشوف ولادى

**********

بعد 15 سنة

- ماما أنا فى واحد كده...

- واحد ماله ياختى

- بصراحة زميلى فى الشغل وعاوز يتقدملى

- كويس

- قوى قوى يا ماما

- طيب إحكيلى كل حاجة عنه

- ماشى

**********

- أختك جايلها عريس

- إيه ده ..داحنا كبرنا أهو وبنتخطب

- أومال.. المهم عايزين نرتب علشان عايز يتقدملها

- ماشى .. نكلم خالو علشان يجى يحضرويتفق معاه

- لأ طبعا أبوك هو اللى لازم يحضر

- مين؟ وهو أبويا ده يعرف إيه عننا غير إنه بيشوفنا مرة ولا مرتين فى الشهر

- الأصول كده.. وبعدين ده أبوكم وهو راجل طيب ومحترم

مش معنى إننا إختلفنا زمان وإنفصلنا يبقى هو وحش

-  زى مانتى عايزة ...(وقام غاضبا)

********** 

بعد أن عاد إلى منزله الذى يعيش فيه وحيدا

كان سعيدا جدا بعد أن قابل عريس إبنته ووافق عليه عن إقتناع

كان سعيدا لسعادة إبنته

وسعادة إخوتها

وتذكر ماضيه وتضحيته من أجل أبنائه وخاصة البنات

تذكر حين عاد مرة من عمله فى منتصف اليوم

وشاهد زوجته بين أحضان رجل غريب

وهاج وماج

وكاد أن يفتك بهما

لولا تذكره لأبنائه

لم يخشى على نفسه من السجن أو الفضيحة

ولكنه خاف على أبنائه وخاصة البنات

بكت زوجته وقبلت قدماه لكى يسامحها وهو جالس صامت تماما

بكت وأقسمت أنها أول وأخر مرة

صدقها ولكنه لم يتحمل أن يعيش معها بعد أن شاهدها هكذا

أخبرها أنه سيطلقها وسيخبر الناس ان سبب ذلك هو رفضها لزواجه من أخرى

توسلت إليه ألا يتركها

ولكنه لم يستطيع.. وطلقها

إبتسم بعد قراءة الفاتحة مع عريس إبنته

لأنه كان يعلم من زماااان أن هذا اليوم كان من الصعب أن يأتى

إذا قام بفضح أمها أو أعلن اسباب الطلاق الحقيقية

إبتسم وترحم على أمه ودعا الله أن تسامحه

فقد ظلت حزينة بعد طلاقه لزوجته

وكانت دائما ما تقول له

نفسى أعرف إيه اللى جرالك... دا إنت طول عمرك عاقل

الثلاثاء، 16 مارس، 2010

القدس..من قناة طيور الجنة

حلوة جدا


شوفوها وفرجوا ولادكم عليها


وفهموهم بتتكلم عن إيه


وإيه هى القدس


ملحوظة: اللى حيقول إن اللحن والكلمات مسروق من اغنية عن مصر


أقول له: وماله.. فرجوا ولادكم على الإتنين وعرفوهم قيمة الإتنين وخلوهم يحبوا الإتنين



الاثنين، 15 مارس، 2010

أخيرا تحرك أعضاء المجلس


الحمد لله

أخيرا أفاق أعضاء مجلس الشعب

وإلتفتوا إلى مشاكل الشعب

أخيرا هناك من يلتفت إلى قضايانا المهمة

فنحن نعانى من مشاكل كثيرة

ولكن هناك أولويات 

فتوجد مشكلة خطيرة ولكن هناك الأخطر

وتوجد أزمة كبيرة ولكن هناك الأكبر

فنحن نعانى من مشاكل فى

التعليم 

الرعاية الصحية

العنوسة

الفساد

المرور

الأخلاق

فتنة طائفية

فقر

مرض

جهل

إهدار مال عام

سرقة

رشوة

.

.

إلخ

ولكن هناك ما هو اكبر من ذلك

فقد تقدم بعض أعضاء مجلس الشعب

وخصوصا من محافظة الدقهلية

ب18 طلب إحاطة

حول

إحتساب هدف مشكوك فى صحته

فى مباراة كرة القدم

بين المنصورة والشرطة

.

.

يا عالم يا تييييييييييييييييييييييييييت

ياولاد التييييييييييييييييييييييييييييت

.

.

حسبى الله ونعم الوكيل

الأحد، 14 مارس، 2010

حلوة الصورة دى


مين شاف الصورة دى قبل كده؟

تحديث

الصورة متصورة من الجو

لمجموعة جمال (باللون البيض)

وظلها (باللون الأسود)

الخميس، 11 مارس، 2010

عملتها فيا ال........


أنا تعمل فيا كده؟

بعد العشرة دى كلها

أنا اللى عمرى ماقصرت فى حقها

ولا خليتها ناقصها حاجة

طيب ليييييييييه؟

كل ده علشان فكرت فى واحدة تانية

إيه المشكلة

طالما عندى المقدرة

يبقى ليه لأ

أنا برضه بنى أدم

وبشوف ديه وديه

وعينى بتطلع عليهم

ومن حقى إن أختار

اللى تسعدنى وتريحنى

وتدينى برستيجى قدام الناس

صحيح إنت إستحملتينى كتير

وشيلتينى كتير

وأنا ساعات كنت ببقى مشغول عنك

وعلشان العشرة اللى بينا 

أنا رافض أفرط فيكى

برضه القديمة تحلى

وأنا شوفت معاكى أيام حلوة

كتيييييييير

بس برضه كل ده مش مبرر

للى عملتيه

.

.

.

.

يعنى تعطلى بيا فى طريق الواحات

وأجيبك مرفوعة على ونش

فى يوم تراب وزعابيب

وأتعطل عن شغلى

لأ

لأ

حجيب الجديدة

أما حضرتك فمستنيكى مصير تانى

.

.

حتروحى لمراتى تتعلم فيكى السواقة

ومافيش عقاب أكتر من كده

تستاهلى يا من كنت عربيتى

الثلاثاء، 9 مارس، 2010

يا ترى الجواز وهم كبير؟


وأنا بدور على حاجة فى إميلاتى القديمة خبطت فى الميل ده 
شايفين الصورة حلوة إزاى؟ ياترى حتفضل كده؟
طيب تعالوا نشوف بعد كام سنة جواز كده:
و كا ن حلم و لا و هم كبير

 المصايف 

الرجل ينبهر بهذا الممثل الأجنبي الذي يحتضن زوجته على الشاطئ وهي ترتدي مايوه قطعتين

ثم يرتميا سويا على الرمال ويتدحرجا إلى أن يصلا إلى البحر

ثم يعودا ويتدحرجا بالعكس على الرمال على الشاطئ الهادئ الخالي من أي بني آدم،

ولذلك يحلم الرجل بأن يكون هو هذا الممثل صاحب العضلات والذي يرتدي البوكسر

وأن تكون معه هذه الفتاة الرشيقة الجميلة التي ترتدي هذا الكاش مايوه وتضع 'صن بلوك' على يديها،

ولكن في الزواج يا عزيزي انسى كل هذه الخيالات تماما،

فسوف تذهب إلى شاطئ يعج بآلاف المواطنين الذين يبحلقون لأي دراع معدي أمامهم،

كما أنك لن تأخذ راحتك معها لأنها مشغولة بإعداد الساندويتشات وكأنها في الجونينة يوم شم النسيم،

بالإضافة إلى أن الكرش الذي سيظهر لك بسبب أكلاتها سيمنعك من ارتداء البوكسر،

فضلا عن أنها سوف تتحول إلى كائن غير متناسق التضاريس

يجبرها على ألا ترتدي الاختراع الذي يسمى كاش مايوه

وستكتفي بجلابية مليئة بالتطريز إذا كانت حالتها مستعصية،

أو ترتدي بنطلون برمودا ضيق إذا كانت روشة طحن ومعه شبشب بلاستيك بصباع

وعادة ما يكون بمبي أو لبني وستجلس على كرسي صغير على الرمل أمام البحر مباشرة

وتدلدل رجليها وترفعهما مع كل موجة ببلاهة غريبة وستكون في قمة السعادة ثم تلف وتنظر لك وتقول

' المية حلوة قوي النهاردة .. تعالى خد شاندوشت بلوبيف'
 
كل هذا وأنت جالس خلفها على الكرسي الأخضر الكبير تحت الشمسية وتنظر لها من فوق الجورنال

وتتحسر على الكاش مايوه والكرة الشاطئية لأن الوضع أصبح حلل محشي وطاولة وجلابية. 


زوجته في المطبخ 

يستيقظ الرجل صباحا على السرير الأبيض النظيف وشعاع الشمس ضارب في عينيه،
 
ويمسح وجهه بيده استعدادا للفوقان ثم ينزل من على السرير وهو يرتدي التي شيرت البادي الأبيض

مع شورت كاروه قصير ويبحث عن زوجته ليجدها في المطبخ تجهز التوست والجبن المطبوخ

وترتدي فقط تيشيرت أبيض طويل يصل حتى فوق الركبة بعشرين سنتيميتر وترتدي فوقه

مريلة مطبخ ربما أطول من التيشيرت الأبيض من الأمام ثم يقف الرجل خلفها مباشرة ويقبلها

ويرمي نفسه على الكرسي المجاور لترابيزة المطبخ ليصنع الكابتشينو حتى يصحصح. 

كل هذا بالطبع لا يحدث في الواقع، ولكن يحدث فقط في الأفلام والمسلسلات الأجنبية

التي يتربى عليها الرجل ويعتقد أنه فور زواجه سيفعل ذلك وستكون زوجته على هذه الشاكلة،

ولكن الصورة الواقعية ستختلف تماما عن الصورة السابقة،

فسوف يستيقظ الرجل من تحت اللحاف المشجر ويجد الحجرة ضلمة كحل لا داخلها شمس ولانور

لأن زوجته مقفلة الشبابيك عشان محدش يجيله نزلة برد رغم أن نزلة البرد مكمكمة في المنزل

ونفسها تلاقي باب شباك اتفتح عشان تخرج منه،

ثم يمسك الرجل أنفه بسبب ريحه البصل وغلي اللحمة وهبو المطبخ

ثم ينزل من على السرير وهو يرتدي ترينج التوحيد والنور ليذهب إلى زوجته في المطبخ

لتنظر له نظرة الضحية للذئب البشري وكأنه السبب في العيشة الضنك،

ثم تحدف له الفوطة المتسخة المصرية الشهيرة وتقول له ارفع اللحمة من ع النار

فهي تجهز طعام الغداء منذ الصباح،

وبالطبع كل ذلك وهي ترتدي جلابية وتحتها بنطلون وتيشيرت هاي كول صوف
.
.
.
طبعا الموضوع فيه شوية مبالغة لكن ماحدش يقدر ينكر إن الأحلام والأمنيات حاجة والواقع حاجة تانية خاااااااااااااااااااااااااااالص
وطبعا أنا بحمد ربنا وببوس إيدى شعر ودقن إن مراتى مابتقراش مدونتى  :)

الأحد، 7 مارس، 2010

63 جنيه


يوم الجمعة اللى فات كنت فى بيت العيلة

وكانوا بيتفرجوا على برنامج على قناة المحور أظن إنه 48 ساعة... مش عارف بصراحة

المهم جت فقرة عن مواطن مصرى رب أسرة معاشه

63 جنيه

الست المذيعة إتكلمت مع الراجل اللى بصراحة حاله يصعب على الكافر

المعاش ده بيكفى الإيجار والكهربا والمياة

اما الأكل فده اليوم بيومه

علشان يدبر مصاريف الأكل

بيجيب أنبوبة البوتاجاز ويعبى منها أنابيب صغيرة

وده شىء فى منتهى الخطورة ممكن تنفجر وتموته هو وكل اللى فى البيت

وده كلام الراجل نفسه.. بس يعمل إيه؟

الست مراته بتقول إن لما بيجيلهم تلاتة جنيه فى اليوم بتفرح

بتشترى بجنيه عيش وجنيه فول وتشيل جنيه

وقالت إن عندها نص كيلو سبانخ مش و مش عارفه تطبخه

عاشان مافيش طماطم وبصل

الراجل ده عنده ولد صغير وبنت كبيرة حوالى 18 سنة

كل اللى فات ده كوم وسؤال المذيعة للبنت كوم تانى

بتسألها : والدك ووالدتك بيقولولى إن نفسيتك تعبانة.. ممكن تقوليلى ليه؟

عاااااااااااااااااااااااااااااااااااااااااااااااااااا

ده سؤال ياناس يا تييييييييييييييييييييييييييييييييييييييت

طيب...

ياترى ذنب الناس دى فى رقبة مين؟

- الحكومة اللى بتدفعلهم معاش 63 جنيه بالتمام والكمال

- المليارديرات اللى فى البلد وشايلين فلوسهم ومحدش بيسأل عن الغلابة اللى زى دول؟

- أصحاب الأعمال اللى مفروض يكون عندهم فى مؤسساتهم جزء إجتماعى ويشغلوا الناس اللى زى دول

- الناس اللى مابتدفعش زكاتها أو لو بتدفع مابتتحراش الدقة علشان توصل للى يستحقها

- إحنا اللى الحمد لله ربنا ساترها معانا وكتير بنفنطظ وندفع فلوس فى كلام فارغ

- جميع ماسبق
- جميع ماسبق بنسب متفاوتة

فى النهاية نقول

اللهم إرفع مقتك وغضبك عنا

ولا تؤاخذنا بما فعل السفهاء منا

قلب كامل... قصة

سيتم نشر باقى أجزاء القصة فى بوست واحد بعد الإنتهاء منها وذلك لظروف العمل... 
شكرا

الاثنين، 1 مارس، 2010

قلب كامل..(2) ..قصة


تم توقيع عقود المشروع الجديد وسط أجواء رائعة لأنه أول مشروع كبير بعد وفاة زوجة كامل أو أم العيال وهو اللقب الذى كانت تفرح به كثيرا.. بعد التوفيع عاد كامل إلى بيته لتغيير ملابسه إستعدادا لحفلة العشاء أو عشاء العمل .. حاول كامل التملص من الذهاب ولكن أبنائه أصروا على حضوره

محمد: لا يا بابا ماينفعش.. الناس حيفتكروا إنك مش مهتم بيهم

أحمد: أو ممكن يفتكروا إنك لسه تعبان وده ممكن يأثر على سمعتنا فى السوق 

محمد: أحمد عنده حق إنت عارف الإشاعات فى بلدنا عامله إزاى

كامل: إنتوا عارفين أنا ماكونتش عايز أجى ليه؟ عايزكم إنتوا اللى تظهروا فى الصورة والناس يعرفوا إن الشركة ماشية بمجهودكم إنتم

أحمد: بص يا باشا.. حتيجى يعنى حتيجى.. دا غير إن الفندق ده مليان قطط

كامل: طيب تصدق لنا قايل لمراتك؟

أحمد: يا باشا إنت ماحدش يعرف يهزر معاك كده.. وبعدين إيه اللى يدخل الحكومة بينا.. دانتا حبيبى

محمد: سيبك منه يا بابا, أعدى عليك بدل ماتسوق؟

كامل: لأ أنا حاجى بعربيتى ... على فكرة, بكرة كل واحد يختار عربية جديدة مكافأة المشروع... و على حسابى الشخصى مش من حساب الشركة

أحمد: أيوة كده يابو الكماميل هو ده التظبيط المظبوط

كامل: الواد ده بيجيب الألفاظ دى منين.. يالا يابنى منك له كل واحد على بيته خلونى أفرد ضهرى ساعة وواقوم ألحق العشا.. سلمولى على مراتتكم والولاد.

محمد: سلام يا بابا

أحمد: سلام يا ياشا

......................................................................

إرتدى كامل ملايسه وعدل رباط العنق أمام المراة فبدا وسيما. كان كامل فى الستين من عمره ممتلىء الجسم إلى حد ما , إختلط شعره الأبيض بالأسود بنسبه متساوية فيخيل للناظر أن شعره (رمادى), يمتلك يشرة قمحية وإن كانت أقرب للبياض. حينما تراه تشعر أنك أمام باشا وحينما تتكلم وتتعامل معه تتأكد أنك أمام إبن بلد جدع وشهم.

وصل كامل إلى الفندق المطل على النيل حيث حفل العشاء وكان باقى على الموعد حوالى 15 دقيقة, ركن سيارته وإتصل بإبنه محمد فأكد له أن الأمور على مايرام وأن الضيوف بدأوا فى الوصول فعلا..أثناء دخوله كانت هناك زفة عروس, ألقى عليها نظرة سريعة وإبتسم متمنيا زواج إبنه الأخير محمود بعد عودته من الخارج, وقف كامل برهة وإستدار مرة أخرى فهناك وجه مألوف... هل هى فعلا.. المرأة الواقفة بجوار العروس وتبدو على وجهها ملامح السعادة.. عقله يقول إنها هى, نفس الملامح مع ظهور أثار الزمن عليها.. نفس الرشاقة.. نفس الإبتسامة..أما قلبه.................. فيؤكد أنها هى.

فجأة وجد يد توضع على كتفه

أحمد: إيه يا باشمهندس حنسيب ضيوفنا ونتفرج على الزفة دى ولا إيه؟ طيب لو نفسك فى فرح قولى وأنا اتجوز من بكره

كامل: ......................

أحمد: هى الزفة عجباك قوى كده؟ هى بصراحة العروسة قمر ... تجنن

كامل وقد أفاق من شروده: تصدق أنا لازم أقول لمراتك .. ثم إبتسم إبتسامة خفيفة.

أحمد: يا باشا مراتى مين بس , تعالى زمان ضيوفنا كلهم وصلوا

ذهب كامل مع أحمد إلى قاعة العشاء ورحب بالحاضرين...وجلس على مائدة مع ولديه وكبار المسؤلين عن المشروع من باقى أطراف التعاقد وأخذوا يتجاذبون أطراف الحديث حول المشروع وأمورالعمل وحول السياسة وأمور عامة كثيرة.. لم يسمع الكثير مما قيل فقد كان باله مشغول بما رأى فى بهو الفندق.. لم يفيق إلا على صوت محمد فى أذنه: بابا الدور عليك تقول كلمتك, فوقف وسط تصفيق الحاضرين ورسم على وجهه إبتسامةواثقة وقد كان يملك من الحنكة والخبرة ما يجعله يلقى بكلمة بسيطة جدا ولكن معبرة ورائعة ثم جلس مرة أخرى وما هى إلا دقائق وعاد إلى شروده .

محمد: مالك يا بابا تعبان ولا حاجة؟

كامل: لا خالص أنا زى الفل.. أنا خارج 5 دقايق أشم هوا وراجع على طول.. بعد إذنكم يا جماعة ديقتين وراجع

خرج كامل وهو لا يدرى ما الذى يفعله؟ هل يدخل قاعة أفراح لا يعرف فيها احد للبحث عن إمرأة قد لا تعرفه؟

وإن وجدها ماذا يقول؟ وما هو رد فعل زوجها؟

فى أثناء مروره بالقاعة المجاورة وجدها أمام باب القاعة تتحدث فى الموبيل.. وقف متسمرا أمامها وكانت لا تلاحظه وما أن إنتهت من المكالمة حتى لاحظت ان هناك من يقف على بعد خطوات منها فنظرت إليه فرسم على وجهه إبتسامة حاول جاهدا ان يجعلها طبيعية

كامل: المهندسة أمنبة؟

أمنية: معقول؟..  المهندس كامل؟

كامل: إيه ده دا إنت عرفتينى

أمنية: طبعا المهندس كامل محمود.. أشهر من نارعلى علم غير إنه زميل الدفعة القديم.

كامل: إزيك يا أمنية عاملة إيه؟ ماتغيرتيش

أمنية: حرام عليك.. دانا عجزت خالص

كامل ( كان نفسه يقولها إنت لسه زى القمر) : عجزتى؟ أمال أنا اقول إيه؟ عجوز وبشعر أبيض وبكرش.. إنت معزومة فى الفرح ده؟

أمنية: لا يا سيدى دا فرح بنتى الصغيرة

كامل: ماشاء الله ماشاء الله ... سلمى عليها وباركلها

أمنية: لأ تعالى سلم عليها بنفسك

كامل: طيب بس بسرعة علشان معايا ضيوف.. وكمان أسلم على باباها وأباركله

أمنية: باباها تعيش إنت من خمس سنين

كامل: أسف.. البقية فى حياتك والبركة فيكي

.................................................................................

يتبع