Recent Posts

الأربعاء، 30 يونيو، 2010

مراحل تطور الرجل


الرجل
قبل الخطوبة مرحلة القرد عمال يتنطط هنا وهنا علشان يعجب دى و دى
فى فترة الخطوبة مرحلة الطاووس معجب بنفسه ومهتم بشكله وشياكته
فى أول سنة جواز مرحلة الأسد.. أوعى وشك من سى السيد الجامد
بعد أول سنة مرحلة (لامؤاخذة) الحمار طالع شايل نازل شايل
بعد تلاتين سنة جواز (ربنا يدينا طولة العمر) مرحلة الشوال يشيلوه من هنا يحطوه هنا

الاثنين، 28 يونيو، 2010

إفتكرت نكتة

النهاردة فى الشغل 
حصل موقف فكرنى بنكتة عجبانى قوى
لأننا كنا فى إجتماع مهم مع ناس كبار
ولقيت واحد كبير سايب الموضوع الأساسى
وماسك فى حاجة هايفة خالص

واحد بيقول لصاحبه: بصراحة فى موضوع 
عايز أقولهولك بس محرج منك
- خير؟
-مراتك بتخونك مع الكهربائى اللى على أول الشارع
- يا راجل ده ولا كهربائى ولا بيفهم حاجة فى الكهربا

الثلاثاء، 22 يونيو، 2010

مواقف

** إمبارح وأنا مروح بالليل تاكسيين زنقوا على بعض
واحد أبيض والتانى أبيض فى إسود
المهم مسكوا فى بعض والناس حاشوا بينهم
بس سواق التاكسى الأبيض وقف عربيته قدام التاكسى الأبيض فى إسود
وطلع محموله وطلب نمره وقال للسواق التانى
أنا حوريك إنت بتكلم مين يا إبن ال..تييييييييت


** أول إمبارح بالليل (برضه) روحت أنا ومراتى والعيال سوبر ماركت
خلصنا وخرجت أنا والعيال بالمشتريات قبل مراتى
لقيت واحدة ست منقبة مستنية جنب العربية (الساعة كانت 12)
وطلبت مساعدة قولتلها ربنا يسهلك يا أمى
قالت تانى فرديت بنفس الرد
لقيتها بتقولى ربنا يسهلك ربنا يسهلك
ودى أعمل بيها إيه؟ هو إنتوا دايما تيجوا على الغلبان
تشتروا حاجات قد كده وتستخسروا فى الغلابة
و...... كلام كتيييييييييييير
المهم ركبت العربية وكانت مراتى وصلت
إديتها فلوس وقولتلها إديها للست دى
إديتهم لها بس لما رجعت قالتلى دول كتير
قولتلها لأ عادى
بصراحة أنا كنت خايف موووووت من كلام الست
مع إنى ما عنديش ثقة فى شحاتين الشارع
وبحب أدفع فلوس فى مكان مضمون
يوصلهم لمحتاجين حقيقيين

** من فترة كان جماعة أصحابى قاعدين على قهوة جديدة وماكانتش لسه شغالة قوى
واحد صاحبنا طلب من الواد اللى جالهم شيشة
(الواد ده عنده 9 أو 10 سنين)
الولد ده بقى قال إيه؟
شوفلك يا باشا طلب تانى
الفحم لسه حولع عليه والمعلم حيبعتنى أجيب معسل
صاحبى حب يدى الولد درس
قاله أومال إنت شغلتك إيه؟ مش تولع على الفحم وكده يعنى
الولد شاور بإيده على دماغه وقال
يا باشا أنا هنا مقضييييها

الخميس، 17 يونيو، 2010

لماذا بكى لاعب كوريا الشمالية؟


بكى اللاعب الكورى الشمالى (تاى سى) 

أثناء عزف السلام الوطنى لبلاده 

قبل مباراة منتخبه مع منتخب البرازيل

ولما سألوه بعد الماتش عارفين قال إيه؟

 لقد شعرت بالفخر وأنا أردد السلام الوطني لبلادي

في كأس العالم وبل أمام منتخب كبير هو البرازيل

 أنا سعيد لهذا الإنجاز العظيم لوطني

ولما سألوه هو بكى ليه تانى بعد الماتش قال:

 كنت أريد أن أفعل أي شيء من أجل بلادي

إلا أنني حزين لعدم قدرتنا على إسعاد بلادنا بالمباراة

حد فهم الناس دى بتتقدم ليه؟

فى حد عندنا  حاسس بقيمة بلده

وممكن يبكى لما يسمع السلام الوطنى بيتعزف

فى أى مناسبة؟



الأحد، 13 يونيو، 2010

حالة زهق


عندى حالة زهق فظيعة

مع إنى مش من النوع اللى بيزهق بسرعة

بس الجو العام مش مساعد

نفسى أشوف الأخبار ألاقى خبر يفتح النفس

طيب أدخل أى مدونة وألاقى موضوع يفرح

مافيييييييييييييش

طيب انا مش زعلان علشانى

قد ما أنا زعلان علشان ولادى

ياترى لما يكبروا

حيدعولنا ولا حيدعوا علينا؟


الخميس، 3 يونيو، 2010

سؤال على السريع

 

لو المصريين ماشجعوش الجزائر فى كأس العالم

والجزائريين ما فرحوش بتشجيع المصريين

تفتكروا حنعرف نحرر الأقصى وفلسطين؟