Recent Posts

الخميس، 25 مارس، 2010

برج دبى

برج دبى

مفخرة الإمارات

أعلى بناء فى العالم

تشاهده من أى مكان فى دبى

دليل حضارة وعلو شأن الإمارات

يدل على .........

ستوووووووووووووب

إيه يا عم خير فى إيه؟

لا أبدا أنا عايز أقول رأيى فى الموضوع ده بس

رأى إيه خير اللهم أجعله خير.. مش عاجبك البرج ولا إيه؟

لأ طبعا عاجبنى ونفسى أزوره كمان

أمال إيه؟

كل اللى حضرتك بتقوله ده صح ميه فى الميه بس إحنا إستفدنا إيه بالبرج ده؟

بقى عندنا أعلى برج فى العالم .. مش كفاية دى؟

أنا كان عندى إقتراح تانى ممكن يتعمل بالفلوس دى

؟؟

كنا نزرع أكبر مزرعة فى العالم

ودى فين دى إن شاء الله؟

السودان.. شوف بقى الحلم ده.. كنا بالفلوس دى وشباب كتييييييير مش لاقى شغل وبأرض خصبة مش محتاجة مجهود كبير كنا زرعنا اللى يكفى الوطن العربى كله وعملنا مزارع ماشية وكنا أكلنا الوطن العربى كله لحمة ورخيصة كمان

وإيه المشكلة إحنا بناكل اللحمة دى كل يوم

أه طبعا.. بس فى ناس عندنا فى مصر بيشوفوها من العيد للعيد ودول يحمدوا ربنا

لأن فى ناس فى السودان والصومال ودول تانية بيموتوا من الجوع

وده بجد مش مبالغة 

:(

طيب شوف كمان ممكن نعمل إيه.. ممكن نعمل مراكز أبحاث ونشجع العلماء والمخترعين ونديهم فلوس تخليهم مايطفشوش على بلاد بره.. ونعمل عندنا نهضة علمية وتكنولوجية

همممم ممكن

طيب بلاش دى.. إحنا بالفلوس دى نعمل مصانع كتير كبيرة ونعمل مصانع أكتر صغيرة ونشارك بيها ألاف الشباب .. نخليهم يشتغلوا ويكسبوا ويكسبونا ويتجوزوا ويتحولوا لناس منتجة يرفعوا بلدهم فوق ويرفعونا كلنا معاهم.

إيه يا عم الحقد ده.. كل ده علشان بنينا البرج اللى بنفتخر بيه كلنا كعرب؟

لأ ده مش حقد ولا حاجة بس ممكن تجاوبنى على الكام سؤال دول

- الفلسطينيين المحتلين اللى مش عارفين ياخدوا حقوقهم بيفتخروا بالبرج ده كعرب؟

- السودانيين اللى بعضهم عندهم مشاكل وبيعانوا من المجاعة  بيفتخروا بالبرج ده كعرب؟

- الصوماليين..  بيفتخروا بالبرج ده كعرب؟

- الموريتانيين....  بيفتخروا بالبرج ده كعرب؟

- أى مواطن فى أى دولة عربية مش لاقى قوت يومه  بيفتخر بالبرج ده كعرب؟

إستنى شوية.. وأنا مالى بكل اللى بتقوله ده؟

أومال إيه كعرب دى؟.. طيب سايبنى ورايح فين؟

رايح أبدأ فى بناء مدينة دبى الرأسية اللى قد البرج ده مرتين

إنا لله وإنا إليه راجعون

ملحوظة مهمه: أنا بحب الشعب الإماراتى جدا جدا يعنى البوست ده مش هجوم عليهم بس هما ممكن مايكونوا مش واخدين بالهم لأنهم عايشين فى عالم تانى وممكن لو كنا مكانهم كنا عملنا كده وأكتر

وأنا بعبر عن مجرد أحلااااااااااااااااااام

سؤال مش عارف إجابته: هى ليه دول كتييييير أغنى وأكثر تقدما مابتحاولش تبنى أعلى برج فى العالم؟!!

4 التعليقاااااااات:

ستيتة حسب الله الحمش يقول...

شوف يا عم ابو حميد
صلي على النبي
لو بنتكلم عن الإمارات أيام الشيخ زايد الله يرحمه والشيخ راشد آل مكتوم الله يرحمه هو راخر "لأني بصراحة معرفش اللي خلفهما شكلهم ايه في المعاملات العربية عربية" ها نقول ها يعمل الأتي
ها يروح للسودان ويقول ها نعمل مشروع رزاعة في بلدكم الشكيك
السودان ها يرد ويقول ها نشكل لجنة
ها يجي لمصر ويقول ها ناخد من عندكم عمالة
ها ترد مصر أمممممممممم طيب ها نشكل لجنة ومتعملش المشروع اساشا عندنا ليه ده احنا الأرض كتير بس اللي يزرع .. من عينينا يا شيخ زايد ها نشكل لجنة حاااااااااااالا
السودان ترد عمالة من مصر أممممممممممم طب استنى نلحق لجنة بالجنة الأولانية
يروح للسعودية والكويت يقول ما تيجوا تدخلوا معانا في المشروع العربي عربي ده يا ابو العربي
يردوا: أمممممممممممممم .. ويتقال إن إنت أبو العرب والعروبة يا أبو خليفة؟
طب استنى ها نشكل لجنة ده احنا عندنا قواعد عسكرية والأمور عندنا معقدة شويتين .. يصير خير يصير خير
في الأخر كل اللجان تستشير بابا امريكا اللي محدد مين يزرع إيه في كام كيلو متر بالضبط
بابا يقول لهم معندناش بنات تخرج بره

ترد خارجية السودان : نأسف أراضينا مشغولة حاليا نرجو الإتصال في وقت أخر بيب بيب بيب
ترد خارجية مصر : عمالتنا كلها بتشتغل دلوقت وأرضنا فايضة بالخير مش عارفين نوديه فين .. نرجو الإتصال في وقت أخر .. بيب بيب بيب
وطبعا كل الباقين فجأة ها يطلع حداهم خير كتير جدا ومش محتاجين معونات عربية عربية
فقد كفاهم خير المستعمر وغطى وفاض

نسيت اقول ان سوريا ها تنشكح جدا بالمشروع وها تساهم فيه بكل قوة
ها تعمل عشرتلاف مؤتمر شيعبي حاشد بالهتافات للأسد اللي منغنغهم ومطلعهم زينا فواعلية في الدول العربية الشكيكة

سوداوي شوية؟
معلش يعني اعتبرني بهزر بس كوميديا سوداء :)

أبو حميد يقول...

شوفى يا دكتورة أنا كنت بقول عن الموضوع ده حلم..
وكان الهدف أشوف هو المفروض نبنى أطول برج فى العالم ولا فى أولويات؟
طيب بلاش بره الإمارات.. نعمل فى الإمارات نفسها نهضة صناعية وتكنولوجية ونطلع علماء ومخترعين ونمول البحث العلمى.. لكن لو حنقول إن أمريكا بتتحكم فى كل حاجة معلش أنا مش مقتنع وشايف إن اللى عايز يعمل حاجة بيعملها بطريقة أو بأخرى
اللى عايز أقوله إحنا إستفدنا إيه من البرج ده؟

خواطر شابة يقول...

انت تتسائل ماذا جنت الامارات من برجها العالي الجواب بسيط لقد جنت ازمتها المالية التي تتخبط فيها الان لانها اعتمدت في مشاريعها العمرانية على الديون.
دمت بكل الود

sony2000 يقول...

ههههه
لااااااااا دا هيبقي مفخره فعلا
اهو ياعم نقول عملنا حاجه (كدا وكدا مهو اصلا اللي هيعملواه خبرا من بره موش من العرب)
وتحيا الوحده العربيه

إرسال تعليق