Recent Posts

الأربعاء، 17 مارس، 2010

العاقل


-يا إبنى حرام عليك اللى بتعملوه فيا وفى نفسك ده

- فيه إيه بس يا أمى.. حياتى وأنا حر فيها

-الكلام ده كان زمان قبل ما تتجوز وتخلف وتبقى فى ناس مسؤلة منك

-معلش .. دى حياتى وأنا عارف مصلحتى

-يعنى عايز تطلق مراتك وإنتم معاكم تلت عيال وتتجوز غيرها وتقول مصلحتك؟

- هى اللى طلبت الطلاق لما عرفت إنى عايز أتجوز

-حقها طبعا .. (باكية) أنا مش عارفة إيه اللى جرالك دا إنت طول عمرك عاقل

**********

- حسبى الله ونعم الوكيل فيك

- ..........

- ده أنا كنت بعاملك زى إبنى وأكتر تقوم تبهدل بنتى كده

- أستغفر الله العظيم.. بهدلة إيه بس؟

بنتك واصلها حقها تالت ومتلت وحتوصلها نفقتها ومصاريف العيال أول كل شهر

وأى حاجة تلزمهم أنا كفيل بيها

عايز إيه تانى

- يعنى إنت مش شايف إن الطلاق وعيشيتها ببنتين وولد لوحدها مش بهدلة

وكل ده علشان عايز تتجوز تانى .. يا أخى إتقى الله فى ولادك

- اللهم طولك يا روح.. يا عمى كل شىء قسمة ونصيب

أشوف وشكم بخير

- مش عايزين نشوف خلقتك خالص

- لأ.. دا غصب عن التخين علشان أشوف ولادى

**********

بعد 15 سنة

- ماما أنا فى واحد كده...

- واحد ماله ياختى

- بصراحة زميلى فى الشغل وعاوز يتقدملى

- كويس

- قوى قوى يا ماما

- طيب إحكيلى كل حاجة عنه

- ماشى

**********

- أختك جايلها عريس

- إيه ده ..داحنا كبرنا أهو وبنتخطب

- أومال.. المهم عايزين نرتب علشان عايز يتقدملها

- ماشى .. نكلم خالو علشان يجى يحضرويتفق معاه

- لأ طبعا أبوك هو اللى لازم يحضر

- مين؟ وهو أبويا ده يعرف إيه عننا غير إنه بيشوفنا مرة ولا مرتين فى الشهر

- الأصول كده.. وبعدين ده أبوكم وهو راجل طيب ومحترم

مش معنى إننا إختلفنا زمان وإنفصلنا يبقى هو وحش

-  زى مانتى عايزة ...(وقام غاضبا)

********** 

بعد أن عاد إلى منزله الذى يعيش فيه وحيدا

كان سعيدا جدا بعد أن قابل عريس إبنته ووافق عليه عن إقتناع

كان سعيدا لسعادة إبنته

وسعادة إخوتها

وتذكر ماضيه وتضحيته من أجل أبنائه وخاصة البنات

تذكر حين عاد مرة من عمله فى منتصف اليوم

وشاهد زوجته بين أحضان رجل غريب

وهاج وماج

وكاد أن يفتك بهما

لولا تذكره لأبنائه

لم يخشى على نفسه من السجن أو الفضيحة

ولكنه خاف على أبنائه وخاصة البنات

بكت زوجته وقبلت قدماه لكى يسامحها وهو جالس صامت تماما

بكت وأقسمت أنها أول وأخر مرة

صدقها ولكنه لم يتحمل أن يعيش معها بعد أن شاهدها هكذا

أخبرها أنه سيطلقها وسيخبر الناس ان سبب ذلك هو رفضها لزواجه من أخرى

توسلت إليه ألا يتركها

ولكنه لم يستطيع.. وطلقها

إبتسم بعد قراءة الفاتحة مع عريس إبنته

لأنه كان يعلم من زماااان أن هذا اليوم كان من الصعب أن يأتى

إذا قام بفضح أمها أو أعلن اسباب الطلاق الحقيقية

إبتسم وترحم على أمه ودعا الله أن تسامحه

فقد ظلت حزينة بعد طلاقه لزوجته

وكانت دائما ما تقول له

نفسى أعرف إيه اللى جرالك... دا إنت طول عمرك عاقل

15 التعليقاااااااات:

sony2000 يقول...

هو ضحي
بس ربنا كرمه بالرغم من انه وحيد
كويس انه فكر فكدا
لاقدر الله لو اتعملت فضيحه
بنته او اولاده مكانوش هيتجوذو
ربنا معاه
تقبلو مروري وتحياتي

خواطر شابة يقول...

انا ايضا تحاملت عليه في البداية الى ان فوجئت بحجم تضحيته في النهاية لن تعرف ينبغي ان تكون ملاكا لتتصرف بهذا الشكل ونحن لسنا ملائكة لذا استبعد كثيرا ان تكون مثل هذه القصة في الواقع خصوصا بكل تفاصيلها يمكن اجزاء منها تحدث لكن كلها كتركيبة هي من مدينة افلاطون الفاضلة انا هنا اتحدث عن الزوج
تحياتي لك

فاتيما يقول...

حلو قوى البوست يا ابو حميد

الحلو اكتر

أسلوبك ف السرد
خلتنا نبتدى معاك دمنا محروق من البطل
و بعدين ف النص بنقول كان عليك من دا بإيه
و انتهينا لأننا اكبرناه و احترمناه جدا


حلوة بجد

الله ينور


اما عن الموقف
قالدنيا فيها الأغرب الف مرة
و فيها اللى يتحمل و يبقى جبل كدا
و فيها اللى يشيب و يلا يجعلنا نتوقف عن الإندهاش


تحياتى ليك

ستيتة حسب الله الحمش يقول...

كل سنة وانت وكل بابا طيب
انا عارفة وفاهمة
قصة عيد الأم بتقلب عليكم المواجع والبطاطس
وبصراحة وإحقاقا للحق إنتوا تستاهلوا عشر اعياد متتالية
الأب المصري الصح
اللي قائم بشئون بيته واهل بيته
اللي عارف ان كلكم راع وكلكم مسئول عن رعيته
حقيقي يستاهل وسام الشرف والأمانة
ومن حقه يوم يكرمه

بس يا ابو حميد
ماهو الأباء في منهم نماذج كتيييييييييير وحشة قوي
انانية
رمى العيال وذهب مع الريح
بخيل حتى في المشاعر

علشان كده القصة اللي انت كاتبها فعلا من مدينة افلاطون الفاضلة
لأنها لو مش يوتوبيا
كان على الأقل ها يتجوز تاني

ياراجل ده بيدفنها الصبح
وبتكون حبيبة عمره
وبليل يقول حاسس بالوحدة :))

أثرت فيا جدا
ربنا يكرمك
تحياتي

Baskouta يقول...

مش ممكن البوست ده
ومش ممكن تأثيره عليا
انا جاتلي صدمة ...صدمة صدمة يعني من تصرفه
الاول كنت فكراه زيه زي كتير غيره ممكن يكون حب واحدة وعاوز يتجوزها ...ممكن يكون اصابه ملل من جوازه ...ممكن اي سبب دفعه لانه يقرر ينفصل ...لكن ولا كان ممكن ابدا يجي على بالي السبب ده
ايه ده؟؟؟؟
هو في كدة....ااااااه
اكيد في كدة...اكيد زي ما في ام بتضحي بشبابها علشان ولادها ...اكيد في اب بيحب ولاده للدرجة اللى تخليه يضحي التضحية دي... يفضل طول العمر في نظر ولاده رجل اناني تخلى عنهم علشان يتجوز وهو في الحقيقة داس على جراحه وتغاضى عن ثورته علشانهم وعلشان مستقبلهم
لا لالا انا قلبي وجعني ..وجعني من الحب ده
هو الحب ممكن يعمل كدة بجد؟؟؟
مش عارفة تعليقي ملخبط بس ده بجد اللى جوايا بعد ما قريت البوست ...لخبطة واحترام فظيع لبطل القصة
روعة بجد
تسلم ايدك
تحياتي البسكوتية المتلخبطة اخر حاجة

reem يقول...

مش ممكن البوست دا

انت بدلت مشاعرنا واحساسنا من النقمة الشديدة على الاب الى التعاطف الشديد والاحترام في ثوانى

بجد ماشاء الله عليك

اسلوبك رائع

هو صحيح راجل زى دا نادر وجوده وان لم يكن مستحيل
بس تفكيرة بجد عقلانى وعاجبنى جدا

norahaty يقول...

والله برافو عليه
مثلها ما تستاهل
حد يسجن علـشانها
أو تروح حياته علشانها
بس كام واحد مثله
يقدر يمسك اعصابه
لو شاف منظر زى
اللى شافه دا؟

Wanda يقول...

ده الاستاذ بيومى صح حفيد بيومى افندى
:-))

بس طبيعى قوى الابن الى لسه مش مسامح ابوه

الجواز و سنينه يقول...

هايله و الله يا باشمهندس
بجد تحفه
انا قلت عليه فى الاول عادى زيه زى اى راجل عايز يتجوز تانى بعد ما كبر مع مراته و الغدر فى دمه و عايز يتجوز عليها

بس آلمتنى اوى النهايه
عارف فكرتنى بفيلم ملك و كتابه
لما محمود حميده دخل على مراته و لاقها فى نفس الوضع
و اللى بستناه طول الفيلم مشهد قرب النهايه
لما بيمثل انه بيكلم مراته و بيقولها انا ليه كنت متخيل اننا قريبين من بعض كنت مش شايف و لا كنت خايف اشوف
الحته دى بتعجبنى جدا
ليه الناس بتكون فاكره ان اللى امعاها بيحبها و فجأه تكتشف انها كانت مش عايزه تشوف
و ياترى الخيانه طبع و لا رد فعل
يعنى هو أثر معاها اوى لدرجه انها تخون
و لا هيه طبعها الخيانه
طيب لو كانت هيه اللى دخلت و لقته بيخونها
هاتطلق برضوا و لا هايتزرع بحكايه النزوه و خلاص خلصت الحكايه و سامحى و تعالى على نفسك علشان العيال
الخيانه عنكبوت كبير و لازم نشوف كل اسبابها
و كل نتايجها
المهم فى الموضوع ان سردك هايل
صحيح هو كان بيجيبلها ورد ؟

Haytham Alsayes يقول...

الله عليك يابو حميد

فعلا قصة جميلة راجل ضحي عشان ولاده واستحمل الطلاق ويعيش لوحده لو في الواقع كان زمانه في ابو زعبل


تقبل تحياتي

كلمات من نور يقول...

أبو حميد

دي أول مرة أدخل مدونتك و بأمر الله يبقى التواصل ....قليلين مثل هذا الرجل وليتنا نجد منه الكثيرون ....تحياتي

Sameh Ezzat - (خواطر خاطر) يقول...

قد تكون اول زياره لي في مدونتكم..

كم هو رائع اسلوبك في السرد الملخص لقصه سنوات وسنوات
.. انا ايضا وقعت في فخ وضع اللوم علي الزوج في البدايه ,., حتي عرفت مدي تضحيته العظيمه التي لربما تكون غير مقبوله في مجتمعنا الشرقي ,, فالشرف اولا واخيرا ,., لكنه..كان يستحق ان يقال عليه اكثر من وصف العاقل !

سلمت يداك

صيدلانيه طالعه نازله يقول...

ياااااااااااااااااه

على قد ما اتغظت منه فى اول القصه

على قد ما احترمته و دموعى نزلت فى اخرها

من ستر مسلما ستره الله فى الدنيا و الاخره

و ده بالضبط اللى عمله بطل القصه

قصه جميله قوى يا ابو حميد

Lady E يقول...

اول زيارة لمدونتك

وعجبتني القصة جدا

انا بقى لي 4 سنين بدرس الادب الانجليزي وفي كل قصة لازم ندرس المظهر والجوهر

كتير المظهر بيبقى غير الجوهر زي القصة دي

دمت بخير

أبو حميد يقول...

شكرا لجميع من علق على البوست وأسف على تأخير الرد
حرجع أرد على جميع التعليقات خلال يومين
شكرا لكم

إرسال تعليق