Recent Posts

الجمعة، 12 فبراير، 2010

الزلانطين داى


أولا الصورة دى عجبانى قوى

ثانيا أنا كنت ححط صورة ساخرة

بس للأسف الصورة دى عجبانى قوى

ثالثا أموت وأعرف مين اللى دخل الزلانطين ده مصر؟

لغاية من حوالى 10 سنين فاتوا (فاتوا هوا والله)

ماكانش ناس كتير تعرف يوم الفلانتين ده

أنا عجبتنى قوى كلمة زلانطين من شوقية (ست كوم تامر وشوقية)

أنا أول معرفتى بيه كانت من 9 سنين

كنت خاطب ماكملتش سنة

ومراتى اللى كانت خطيبتى (نفسى أعرف إزاى استحملتنى وكملت وإتجوزتنى)

كانت مصرة إنى أروح لها اليوم ده

ياستى أنا عندى شغل

-ماليش دعوة

طيب مانا باجيلك الجمعة (كانت بتشوفنى يوم واحد فى الأسبوع

ربنا يكون فى عونها البنية دى)

-ماليش دعوة لازم تيجى النهاردة

المهم ......ماكدبتش خبر وطلعت من الشغل عليها

قعدنا شوية وبعدين لاقيتها بتدينى ظرف

بفتحه (للأسف ماطلعش فيه فلوس)

لاقيت كارت شكله جميل وبيتفتح

فتحته ... أتاريه بيعمل موسيقى ومرسوم فيه قلوب

وكاتبالى فيه كلمتين حونينين

ولاقيتها بتقولى : كل سنة وانت طيب

هه

-كل سنة وانت طيب (بنبرة غيظ)

وانت طيبة بس أنا عيد ميلادى كان الشهر اللى فات

-عيد ميلاد ايه بس ... دا علشان الفلانتين

وده مين ده؟!!

طبعا هى ماستحملتش وانفجرت فيا

-كل صحباتى النهاردة عمال يجيلهم فى ماسجات

واللى خطيبها يعدى عليها جايب لها ورد

واللى خطيبها عازمها بره

وأنا ماعبرتنيش حتى بكلمة.

طبعا أنا أزبهليت 

وقعدت أهدى فيها 

وقلتلها نتكلم بعدين تكون راقت

تانى يوم لفيت على أصحابى كلهم فى الشغل

وسألتهم عن الزلانطين

لاقيت تلات تربعهم ماسمعش عنه ولا حتى فى طبق اليوم

فعلا المهنسين دول مالهمش غير فى الشغل

سألت إخواتى وأهلى وحبايبى (والمجتمع والناس)

لاقيت أربع تخماسهم مايعرفوش حاجة عنه

فرحت جدا لأنى كنت متأكد كنت متأكد مع إنى كنت شاكك

إن الزلانطين ده مش كل الناس عارفاه

المهم دورت ورا الموضوع

وعرفت إنه عيد القديس فالانتين

ففهمت مراتى لما كانت خطيبتى

إنى لأسباب دينية ماحبش أحتفل بالعيد ده

وكنت سألت وقرأت وكونت رأيى فى الموضوع

وهى فهمت وإحترمت رأيى

ولغاية النهاردة ماشيين على إتفاقنا (ربنا يستر ونكمل كده)

بس للامانة هى مرة جابتلى هدية كنت حموت عليها

حاجة من الحاجات اللى بعشقها

الكلام ده من سنتين أو تلاتة

وقولتلها إحنا مش متفقين؟

-لا والله بس هما عاملين عرض جامد علشان الزلانطين

وأنا برضه فى خلال أسبوع قبل أو أسبوع بعد الزلانطين

باجيبلها بوكيه ورد معتبر

ومن غير نق وقر أنا بجيب ورد كل كام إسبوع كده

بيعمل جو رومانتيكى فى البيت

وللحديث عن الزلانطين بقية

19 التعليقاااااااات:

ستيته حسب الله الحمش يقول...

ياعم ابو حميد
كل زلانطين ومصر مش لاقية حاجة تعملها
ماهو لو كان حيلة مصر حاجة تعملها
مكناش غرقنا في دباديب حمرا وقلوب وحاجات نفسي اعرف بيعملوا بيها ايه
على رأي بنتي
يا ماما كفاية قوي وردة
ويقول لها بحبك يا مراتي
وتقوله وانا كمان يا جوزي
طيب يا حلوة قومي شوفي لنا حاجة ناكلها ودمتم :)

Bookmarks exchanger يقول...

والله عندك حق وربنا يعافينا من الاحتفالات الكدابة اللى مالهاش لازمة دى

خواطر شابة يقول...

اناوالله ضد تحديد يوم واحد تنفتح فيه شلالات العواطف والهدايا وبعده بح وعلينا وعلى السنة الجاية لو لينا عمر انا مع مشاعر دائمة طوال السنة معبر عنها طوال السنة انا مع هدية ايا كانت قيمتها لايهم في أي وقت من السنة وعلى رأي محمد فؤاد هو ده الحب الحقيقي

فاتيما يقول...

و الله يا باشمهندس كتر خيرك على حركات الشياكة دى

و يا جماعة متزعلوش روحكوا كدا

المشكلة مش ف الحب أصله ملوش مواعيد
و لا مناسبات

بس هوه زى عيد الام كدا أو اى مناسبة تانية

تحديد يوم و معاد بس
عشان نخلد فيه المعنى الحلو دا

انا يا ستوتة مش مع الدباديب و لا الورد
لأنهم فعلا مش حاجة عملية
و لا مفيدة

بس هدية بسيطة من حد بيحب حد و حاسس انها ممكن تنفعه و تسعده ...
يبقى ليه لأ

ممكن تبقى قبل الفالنتين لو مش حابب يكون فى نفس التوقيت أو بعده مجراش حاجة

المهم انك تعبر عن حبك دا بأى شكل و ف أى وقت

لو مراتك بتحبك و حاسة بتقديرك ليها
مش هيفرق معاها اليوم

بس وقت الموكف اللى حكيته كانت البونية لسه خطيبتك و طبيعى تكون لسه فى مرحلة أهيم شوقا و كدا


ربنا يخليكم لبعض يا رب

و كل زلانطتين و انتوا طيبيييييييييين

مهندس مصري يقول...

والله خير ما عملت
أنا برضه ارفض الإحتفال بعيد الفلانتاين
و ده ما ينفيش حبي لخطيبتي
ياريت برضه تقرأ التدوينة دي
http://6azbeet.blogspot.com/2010/02/blog-post_12.html

مصطفى ريان يقول...

بعيد عن النظر للامر من الناحيه الدينيه
انا اراي انه شيئ جميل نحتفل باللي بيحبونا ونجبلهم ورد ودباديب ونستعيد ذكرياتنا الحلوة
لان طبعا ظروف الحياه مش هتسمحلك تعمل كده كل يوم بس طبعا اللي بنحبهم لازم نحاول نعبر لهم عن حبنا ليهم على طول مش يوم واحد بس
كل زلانطين وانت طيب وتعيش وتجيب ويتجابلك
ادام الله عليك سعادته يا اخي

أبو حميد يقول...

ستيته حسب الله الحمش
------------------
إتشرفت بتعليقك عندى يافندم

دى دباديب وقلوب وورد وشمع ولبس أحمر ولا كأن الأهلى خد دورى كوكب الأرض والكواكب المجاورة

أبو حميد يقول...

Bookmarks exchanger
-------------------
عندك حق فى كلمة الإحتفالات الكدابة

أبو حميد يقول...

خواطر شابة
----------
هى بتبقى شلالات هدايا لكن أشك فى موضوع شلالات العواطف لأن ناس كتير بتعمل كده أداء واجب
وعلى فكرة أحلى هدية الهدية الغير منتظرة وبدون مناسبة

أبو حميد يقول...

فاتيما
------
دايما بتقوليلى ياباشمهندس ومحسسانى إنى فى الشغل :)
بس إيه رأيك فى الموكف الجامد ده؟
البونية دى إستحملت (ولسه مستحملة) منى كتير

إنت ماقريتيش البوست للأخر ولا ايه؟
مش أنا قولت إنى بجيب ورد كل كام إسبوع كده؟
قولت ولا ماقولتش؟

أبو حميد يقول...

مهندس مصري
----------
يا هندسة لازم تحط القواعد من أيام الخطوبة (حاتستمر بعد الجواز ولا لأ إنت ونصيبك)
انت كده تمام
التدوينة اللى باعيتلى لينكها رائعة

أبو حميد يقول...

مصطفى ريان
----------
حلو الكلام يا مصطفى
بس أى حاجة فى حياتنا لازم نراعى فيها الناحية الدينية ولا يمكننا تجاهلها

العيسوى الصغير يقول...

يعنى ليه ميكونش يوم عشوراء مثلا

أو اول يوم من العيد الصغير لو لازم كل سنة يعنى

و ممكن يوم الجمعة...

الجواز و سنينه يقول...

ياااااااااااه
يااااااااااااااه
ياااااااااااااااااه
فكرتنى بأيام الخطوبه
اه و الله
هو اظاهر كل المهندسين كده و اظاهر كمان شارع المهندسين كده هو كمان
انا بقى الباشمهندس بتاعى و لله الحمد
ما اختلفش كتير عن حضرتك
برضوا انه حرام و الكلام ده
حتى القلب اللى جبتهوله ايام الخطوبه
مش عارفه راح فين
و لا ماسيدجات و لا حاجات من دى خاااالص
بس الصراحه و علشان الافترى وحش بيعوضهالى برضوا
اظاهر بيدرسوا تكنيك المهندسين فى كليه هندسه
بس ليه تدى مهندس مصرى خلاصه خبراتك
سيبه يمكن يغلط و يحتفل بالظلانتين
و اهه يبقى واحد منكم خرج عن القاعده
و كمان الصوره تحفه عجبتنى اوى النقوش اللى على الشمع و كمان لونها رائع
و كل فالنتين و انت و المدام طيبين

أبو حميد يقول...

العيسوى الصغير
--------------
أنا عارف ياأخى ليه لأ؟

أبو حميد يقول...

الجواز و سنينه
-------------
طبعا بندرس الكلام ده فى كورس (النظرية الهندسية فى المسألة الزلانطينية)
سلميلى على جوزك طالما طلع زميييل
إيه أخبار الكيت كات؟ (ضحكة شريرة)

wella يقول...

والله هوة هوة الحب ملوش مواعيد ولا وقت محدد

بس فيها اية لو الواحد يبجيب لمراتة ولا خطيبتة وردة ويقولها بحبك وخلصت الحدوتة بلا دباديب بلا بطيخى
يجيب يوم الزلانطين ويجيب فى الايام التانية برضة اية يمنع بس


اعتربوة زى عيد الام مثلا

يوم لطيف لية معنى حلو

أبو حميد يقول...

wella
-----
طبعا مالوش مواعيد
وأنا زى ماقولت أنا بجيب ورد بصفة مستمرة من غير زلانطين ولا يحزنون
لالالاااالاااالااااا

صيدلانيه طالعه نازله يقول...

تانى بتكتب موضوع انك بتجيب ورد ده
انت مصر بقى تهدى النفوس
على فكره امبارح انا اللى عزمت جوزى على الغدا
عاااااااااااااااا
بس الراجل طلع اخلاق و قاللى ميرسى يا روحى

هابى فالانتين يا ابو حميد يا مهدى النفووووس

إرسال تعليق