.jfif)
أولا: مبروك فوز منتخبنا والأداء الرائع والتأهل للنهائى
ثانيا: بجد إحنا شعب طيب قوى ..ليييييه؟ شوفوا بقى..
أنا كنت بتفرج على الماتش كعادة الماتشات المهمة مع أصحابى
فى كوفى شوب فى فلوريدا مول مساكن شيراتون
المهم,
كنت بتفرج مع إتنين أصحابى وكان قاعد جنبنا إتنين رجالة فى أواخر الأربعينات
طول الماتش وإحنا قاعدين نشجع ونهزر ونتريق .... العادى يعنى
وكان كل شوية واحد من الإتنين دول يدخل معانا فى تعليقاتنا و هزارنا
فى الإستراحة حكيت لأصحابى على رسالة من واحد صاحبنا شغال فى الجزائر
(المصريين فى الجزائر بيشجعوا الجزائر وإحنا معاهم
إنا لله وإنا إليه راجعون)
إصحابى ضحكوا جامد ولقيت الإتنين رجالة دول سمعونا وعمالين يضحكوا
أول الماتش ما خلص, الراجل اللى كان بيتجاذب معانا أطراف الحديث قالنا
عارفين الراجل ده ساكت ليه؟ (يقصد الراجل اللى معاه)
أصله جزائرى, وفضل يضحك
المهم إحنا إتكسفنا قوى من كتر التريقة طول الماتش وبعض الألفاظ اللى مش ولا بد
قعدنا نتكلم مع الراجل الجزائرى وعزمنا عليه ندفع له الحساب
فضحك وقال إن هو وصاحبه المصرى إتفقوا إن اللى يتغلب يدفع
قولت له الجزائر فى كاس العالم ومصر تاخد كاس أفريقيا
قالى كده عدل برضه
وهو ماشى سلم عليتا إحنا التلاتة وإعتذرنا له إذا كنا قولنا كلام ضايقه أثناء المباراة
إتبسط جدا وقالى إننا شعب طيب ودمه خفيف
ومانسيش إنه يقولى وهو ماشى
(الجزائريين فى مصر بيشجعوا مصر وإحنا معاهم
إنا لله وإنا إليه راجعون)
ضحكنا كلنا قوى
وقولت له بالتوفيق فى كأس العالم
وهو رد بالتوفيق فى النهائى
5 التعليقاااااااات:
أثلجث صدري والله هذا هو المفروض ان يكون
تعرف والله كنت محتاجة لهذه الكلمات كي لاأفقد ايماني بوجود حل أمس مصطفى عبده على دريم رفع ضغطي الى أقصى حد لانه ماهكذا يكون الفرح ولاهكذا يكون التعبير عنه لهذا شكرا جزيلا لك اثبث لي ان الدنيا مازالت بخير
تحياتي لك
الجزائريين فى مصر بيشجعوا مصر وإحنا معاهم
عاجبتنى اوى
والله دة المفروض الى نبقى عليه كلنا اقصد على مجمل البوست
طيب والله راجل محترم
يارب الناس تعقل بقى و تكبر دماغها
حلوه اوى الجزائريين فى مصر بيشعوا مصر و احنا معاهم
صراحه مش المفروض اننا ناخد كل الجزائريين بذنب بعض
بس الاعلام عندهم كان ينرفز و كمان اللى حصل فى السودان كان يحرق الدم
نفسى بجد نتجمع تانى كدول عربيه
صعبه اوى الفرقه
بس مه غلطوا و كان لازم يكون فيه رد
مبروك لكم الفوز :)
إرسال تعليق