.jfif)
إزيكم
تصدقوا التدوين ليه وحشة برضه؟
النهارده حتكلم فى موضوع عاطفى
طبعا فى وسط الهناء والرخاء اللى إحنا عايشين فيهم
مافاضلش حاجة نتناقش فيها غير المواضيع العاطفية
بهزر والله يا جماعة بلاش حد يزعق
المهم
أولا إكتشفت بالصدفة إنهم عملوا إذاعة لعبد الحليم حافظ
ثانيا بقالى ثلاثة أيام كل ما أفتح الراديو أسمع أغنية فاتت جنبنا
والنهاية السعيدة وتصفيق الجمهور
طبعا هى أغنية جميلة جدا
ومن ألحان موسيقار الأجيال محمد عبد الوهاب
بس وأنا بسمعها نط فى دماغى سؤال غريب
وسط إنبساط المستمعين بالنهاية السعيدة دى
حد فكر فى صاحبه حصل له إيه؟
يعنى من كلام الأغنية واضح إن صاحبه هو كمان مغرم ولهان
وهو ماقالوش
وكلمها من وراه وطلعت بتحبه هو
طيب
فى الحياة الحقيقية بقى
لو واحد بيحب واحدة ولقى صاحبه بيحبها
وهو مش عارف هى عايزة مين
المفروض يعمل إيه؟
طيب لو إرتباطه بيها حيجرح صاحبه
يعمل إيه؟
مايرتبطش ويبقى التلاتة خسرانين
ولا طظ فى صاحبه والمهم سعادته
ولا يعمل إيه بالظبط
حد عارف؟؟
17 التعليقاااااااات:
يعني علشان صاحبه بيحبها
وعلشان ميزعلش صاحبه
يقوم يسيبها؟
الكلام ده لو مكنش فيه طرف تالت مهم جدا في الاغنية :)
الا وهي اللي بتضحك للاسمراني
هي لها قرار وقلب اختار
نموتها هي ونجيب لها اكتئاب لأن الأسمراني ها يسيبها وفاءا لصاحبه؟
مش مشاعر ام ضحكة حلوة دي لها حق مثل الصديق "واكتر وحياتك لو فكرت شويتين"
كمان الحب والزواج غريزة
والصداقة كماليات لطيفة مهدئة لمصاعب الحياة
ومعلوم للكل ان الغريزة تسبق الكماليات بمراحل
وهنا يحضرني المثل المفتخر
معرفة الرجال كنوز
واذا حضرت الست
يغور الرجالة
وده مثل مطلعه رجالة يلخص حدوتة ماذا سيفعل الأسمراني بالضبط
لأ معنديش اجابة بصراحة على السؤال
لان الاجابة اللى فى دماغى نموذجية قوى ومش واقعية
بس حصل قدامى موقف يشبه من بعيد كده وكان واحد فكر ولمح انه يخطب زميلة ليه وحصلت ملخبطة شوية فالفكرة اتلغت
وبعد فترة قرر يخطب صاحبتها ولما حس ان تليمحه القديم والناس عارفاه حاول ينكر ان كان فى حاجة زمان فالدنيا باظت
والاخت اللى قرر يخطبها حديثا لغت الفكرة كلها تعاطفا مع صديقتها وانكاره انه لمح زمان
انا كلامى مش مفهوم مش كده ؟ :$
مش مشكلة
انا فكرت فى الاغنية زمان وأنا فى ثانوى مثلا بطريقة مختلفة
استغربت انهم بيتكلموا عادى يعنى امال ايه اللى عمالين يقولوه لينا ليل نهار ده
وانها كمان بجبروتها بتضحك لهم
وطبعا بعنصريتى البغيضة تعاطفت جدا مع سى عبده
لما قال ( حبيتها ... ايوه انا حبيتها ..مش قادر انسى ضحكتها )
وكنت مع السعداء لما صرحت انها من الاول أصلا أصلا بتضحك له هو الاسمرانى وده مبرر قوى طبعا :):)
مدام هو بيحبها و هى بتحبه يبقى يرتبط بيها
و يهج بيها برة البلد :-))) بعيد عن صاحبه
علشان لما تلعن عيشته متقدرش ترجع لصاحبه تعيطله :-)
يا سلام يا دكتورة
تحليل علمى معملى فذ
أنا ماقولتش على فكرة إنه يضحى علشان صاحبه
وما نفيتش دورها الأساسى فى القصة
أنا كنت بتكلم إنه شايف صاحبه هو كمان بيحبها
وعمال يلف ويدور من وراه .... طيب هو كان حيبقى مبسوط لو صاحبه هو اللى عمل كده؟
حفيدة عرابى
وإنت إزيك كده
والناس دول دلوقتى راحوا فين؟ ما علينا
تعرفى أنا بقى زمان كنت بحب الأغنية دى ليه؟
علشان أسمرانى
وأمشى فى الشارع إن واحدة تيجى تضحك!!!!!!!! أبدا
واندا
مبروك الجواز يا دكتورة
هى بصراحة حتى لو إتجوزت مين حتلعن عيشته بس حتعيط لأمها ........ نياهاهاهااااااااااااااا
ولا بلاش نحبطك من الأول كده
وإنت إزيك كده؟
انا الحمد كويسة
وهما راحوا لحالهم
بس رأيى بجد ان فى حاجات مينفعش ابقى ندل فيها ومينفعش ابقى قلقان
يعنى مع الاسف سى عبده تصرفه كان أى كلام ولو اتجوزها مش هيخطر على باله فى مرة ابدا حكاية صاحبه ؟
ولا مش هيحاول يتعامل معاه تانى
طب وداء الندالة يعالجه ازاى ؟
لو انا مكانه الحكاية دى هتنغص على حياتى وهى الحكاية مش ناقصة منغصات بصراحة :))
فكرتني بأحمد عيد ي فيلم ظرف طارق لما قال لآحمد حلمي انا كنت بحب واحدة من طرف ثالث
تصدق انا من عشاق هذه الاغنية لكن وللامانة لم افكر يوما في هذا الصديق وحاله ولا في مشاعره كانت دوما تأسرني حكاية الاسمراني وافرح بالنهاية السعيدة أليس هذا غريب
حفيدة عرابى
عندك حق
طبعا طبعا
خواطر شابة
شوفتى بقى؟
تخيلى صاحبه الغلبان ده اللى ملايين الناس اللى سمعوا الأغنية دى فرحانين بالنهاية السعيدة ومتجاهلينوه هو ومشاعره.... ده زمانه إنتحر
لو مش ارتبط بيها هيتعسوا هما التلاته ..
لو ارتبط بيها هيتعسوا هما التلاته برضو
فهي هي النتيجه ما تقلقش :)
حضرتك سبت الهندس وشغال محلل نفسانى
يا عم سيب الملك للمالك وسيب الناس تحب وتتحب يا معلم
الله يرحم الاغانى والزمن الجميل
تحياتى
هو فى حل واحد انى استاجر حد يذبحهم هما الاثنين وبعد كده اذبح اللى ذبحهم وانتقم لاعز اصحابى اللى ذبحهم
وبس واستريح وهما يستريحوا للابد
فتاة من الصعيد
يعنى هى كده كده تعاسة؟
يلا يستاهلوا هما التلاتة
شوف هو انا رايي ان البنت هي الى تحسم الامر لو الاثنين بيحبوها او معجبين بيها على وجه ادق عشان اناشايفه ان الحب ما ينفعش يبقىمجرد نظره وابتسامه
المهم
لو حصل كده يبقى الى البنت نفسها تختاره يكملوا سوا والطرف التالت يعوض عليه ربنا ويتجوز ست ستها
انما لو البنت اساسا منفضه للاثنين ده يبقى ميه ميه ويسبوها الاثنين ونستريح
بس كمان احيانا ومادام الحكايه مجرد اعجاب وواحد بقى صاحب عمره مش عايز يخسره وشايف انه وقفة الراجل بميت ست
برضه ممكن يقرر انه يسيبها خالص عن انه يخسر صاحبه
فى العموم هى ملعبكه
بس لو واحد عارف ان صاحبه بيحب واحده ومافيش هو بينه وبينها حاجه ويروح يلف من ورا والحركات القرعه دي هنا تكمن المشكله وتتمثل النداله والعقد النفسيه المركبه
وبلاش تسمع عبد الحليم تاني كفايه عليك كده ههههههه
هى الاخت اللى فى النص دى مش ليها راى برضه و لا منظر و خلاص
رايها اكيد حيبقى الفيصل فى استمرار طرف و انهاء العلاقه لطرف اخر
مش صعبه يعنى
الصعب انى ابوظ حياتى و اضيع سعادتى من ايدى
الواحد مش بيعيش غير مره واحده بس
يبقى لازم يتعب نفسه اوى و يضحى بكل حاجه عشان يعيشها سعيد
انا بقول برضه انه يخلي ضميره على جنب لحد ما يشوف راي البنت اصلا ايه
واللي تختاره تتجوزه :) :) :)
حاجة محيرة اوي انا شفتها حقيقة والبنت كبرت دماغها متجوزتش حد منهم رغم انها بتحب التاني
حد يقولي مين الاولاني ؟ اقوله بلاش تركز
D:
امر محير فعلا بس يعتبر ده انسب الحلول
إرسال تعليق