Recent Posts

الثلاثاء، 22 يونيو 2010

مواقف

** إمبارح وأنا مروح بالليل تاكسيين زنقوا على بعض
واحد أبيض والتانى أبيض فى إسود
المهم مسكوا فى بعض والناس حاشوا بينهم
بس سواق التاكسى الأبيض وقف عربيته قدام التاكسى الأبيض فى إسود
وطلع محموله وطلب نمره وقال للسواق التانى
أنا حوريك إنت بتكلم مين يا إبن ال..تييييييييت


** أول إمبارح بالليل (برضه) روحت أنا ومراتى والعيال سوبر ماركت
خلصنا وخرجت أنا والعيال بالمشتريات قبل مراتى
لقيت واحدة ست منقبة مستنية جنب العربية (الساعة كانت 12)
وطلبت مساعدة قولتلها ربنا يسهلك يا أمى
قالت تانى فرديت بنفس الرد
لقيتها بتقولى ربنا يسهلك ربنا يسهلك
ودى أعمل بيها إيه؟ هو إنتوا دايما تيجوا على الغلبان
تشتروا حاجات قد كده وتستخسروا فى الغلابة
و...... كلام كتيييييييييييير
المهم ركبت العربية وكانت مراتى وصلت
إديتها فلوس وقولتلها إديها للست دى
إديتهم لها بس لما رجعت قالتلى دول كتير
قولتلها لأ عادى
بصراحة أنا كنت خايف موووووت من كلام الست
مع إنى ما عنديش ثقة فى شحاتين الشارع
وبحب أدفع فلوس فى مكان مضمون
يوصلهم لمحتاجين حقيقيين

** من فترة كان جماعة أصحابى قاعدين على قهوة جديدة وماكانتش لسه شغالة قوى
واحد صاحبنا طلب من الواد اللى جالهم شيشة
(الواد ده عنده 9 أو 10 سنين)
الولد ده بقى قال إيه؟
شوفلك يا باشا طلب تانى
الفحم لسه حولع عليه والمعلم حيبعتنى أجيب معسل
صاحبى حب يدى الولد درس
قاله أومال إنت شغلتك إيه؟ مش تولع على الفحم وكده يعنى
الولد شاور بإيده على دماغه وقال
يا باشا أنا هنا مقضييييها

2 التعليقاااااااات:

فتاه من الصعيد يقول...

ههههههههه
الناس اتجننت والله....الناس موش مركزه غير في السهل من غير تعب

تحياتي

خواطر شابة يقول...

الموقف الاول معتاد لان كل من يعرف صاحب سلطة يعتقد انه اصبح فوق القانون وفوق كل الناس طاما هو تحت مظلة من يعرفه
الموقف التاني انا ايضا لو كنت مكانك كنت سأحس نفس الاحساس وفي النهاية الله يجازي كل واحد حسب نيته وهي ان كانت تكذب فجزائها عند خالقها
الموقف الثالث انا لم افهمه ولم افهم ما يقصده الولد
تحياتي وودي

إرسال تعليق