Recent Posts

الاثنين، 31 مايو، 2010

يخرب بيت الكرة


شوية شباب صغيرين متحمسين بيحبوا فرقتهم زيادة شوية (الأهلى)
غلطوا فى الفريق المنافس (الزمالك)
وكتبوا يافطة كبييييييرة فيها إساءة
فبدل ما الناس العاقلة تفهمهم بالراحة كده
ويحاولوا يفهموهم إن الرياضة ماينفعش فيها كده
يطلع نائب رئيس نادى الزمالك ويقول إن الجماهير
بتعمل فتنة طائفية بين المسلمين والمسيحيين
لأنهم رسموا صليب إشارة إلى أن نادى الزمالك أقلية
وماخدش باله المحترم إن الجماهير كانت راسمه علم إنجلترا
اللى هو لونه أبيض وفيه صليب أحمر

الدور والباقى بقى على الكاتب الكبير
ذو الأراء العريضة والشنب العريض
الذى خرج ليؤكد لنا
أن نادى الزمالك هو نادى الوطنية
وأن مؤسس النادى الأهلى هو مؤسس الماسونية فى مصر
وهو الذى كان يدعو لإقامة دولة إسرائيل وهدم المسجد الأقصى
(أنا بتكلم بجد والله)
وأن النادى الأهلى إستمد كتمان الأسرار من تعاليم الماسونية
وأن جماهيره غير مثقفة وقليلة الأدب
وكلام هفلطة كده كتير

طيب يا عم الكاتب الكبير
دول شباب متحمس مش لاقى حاجة يشغل بيها وقته
ولا حاجة ينتمى ليها غير ناديه
وجماهير الكرة دايما بتغلط فى بعض
حاول توعيهم وتاخد بإيدهم بالراحة
لكن تعمل زيهم؟!!!!
مش قادر أفهمها خااااالص

هو إحنا لسه ما إتعلمناش من درس مصر والجزائر
علشان نوقع بين أبناء الوطن الواحد بسبب الأهلى والزمالك
بجد... يخرب بيت الكرة
ويخرب بيت الناس اللى ماسكة أقلام وميكروفونات 
بس ماعندهاش مخ



9 التعليقاااااااات:

فاتيما يقول...

عين الصح يا أبو حميد

للأسف الكاتب اللى انتا جبت سيرته دا
زملكاوى متعصب بمعنى كلمة التعصب بأسوأ ما فيه
و عموما اعتقد ان اللى يقراله كتير بيفهم كدا ضمنياً و يبطل يحترم ارائه خصوصا فيما يختص باللى مش هيكون حيادى فيه
هوه الدور و الباقى ع الفضائيات اللى هتروج للكلام دا عشان تعمل شوو
لأن قراء الصحف هم طبقة متعلمة مثقفة معندهاش تعصب مماثل
لكن المتفرج ع الفضائيات كل النوعيات
و ما اكثر متطرفينها

معاك ف آخر جملة و دعاء ف البوست

و تحياتى ليك جداااا

ستيتة حسب الله الحمش يقول...

اولا بصفتي اهلاوية اشجب مش العلم ابو صليب اللي خرج
لأ
اللي ورا العلم
واللي ورا اليافطة المريعة الكبيرة الرهيبة المكتوب عليها الى مزبلة التاريخ
اه
اللي حاصل ده لهو ومعمول للهو الناس بواسطة اللهو الخفي

ايوه العلم لبريطانيا ومش صليب
بس دي قلة ادب سواء كان كده او كده
انا في حياتي ما تخيلت ان يصل بنا الإنحلال الأخلاقي لدرجة اتهام ابناء العمال والفئات "اللي هم طبعا أعضاء في نادي" بأنهم اقلية او ذوي توجهات غير مصرية
كما اتعجب من ان يخرج برهومي فيقول اننا ماسونين
يالهويز
إذا
فاليكن

تحياتي يا ابو حميد

محمد فؤاد (صاحب عمود النور) يقول...

هو ابراهيم عيسى كدا
بيظيط فى الظيطة
انا مش عارف هو المفروض الراجل دا مش رئيس تحرير جرنال المفروض انه كبير ؟؟
ازاى بقى مش عارف ان دا علم انجلترا
وكمان انا مش فاهم هو كل حاجه بقيت مسلمين ومسيحين؟؟؟
ايه العلاقة ؟؟هى العملية ناقصة فتنه تاااااانى؟
ياجدعان ارحمونا وارحموا البلد الامين
كفاية بجد حتى الكورة اللى هى المنفس الوحيد لينا داخلوا فيها السياسة
اتقوااااااااااا الله

صيدلانيه طالعه نازله يقول...

مين ده اللى يتعلموا
قلبك ابيض انت خالص
احنا من ينطبق عليه المثل يعلم فى المتبلم يصبح ناسى
و الباشا اللى بيهلل ده
مش هو برضه بتاع الاهلى زى الحزب الوطنى
و؟؟
و المصيبه ان الناس مصدقاه و ماشيه وراه
حاجه تقرف

كيــــــــــــارا يقول...

افضل حاجه الصمت اصل بجد


إِذَا نَطَـقَ السَّفِيـهُ فَـلا تُجِبْـه

فَخَيـرٌ مِنْ إِجَـابَتِهِ السُكُـوتُ

فَـإِنْ كَلَّمْتَـهُ فـَرَّجْـتَ عَنْـهُ

وَإِنْ خَـلَّيْتَـهُ كَمَـداً يَـمُـوتُ


ودول حسبنا الله ونعم الوكيل

ربنا يهدى

خواطر شابة يقول...

الجميع منشغل في هذه المعارك نخرج من معركة لندخل اخرى من معارك جماهير مصر وجماهير الجزائر الى معركة جماهير الاهلي وجماهير الاسماعيلي ومن معركة التراس الاهلي و مجلس ادارة الزمالك الى معارك مشجعي عمرودياب وتامر حسني وكل هذا يسهم الاعلام بشكل كبير في اذكائه ورفع حدته بدل الاصلاح
انظر الى نشطاء سفن الحرية بعضهم لايجمعه بنا لا لسان ولا دين ومؤمنون بقضيتنا اكثر منا ويدافعون عنها اكثر منا ويضحون لاجلها أكثر منا أما أن لنا أن نخجل من انفسنا

Wanda يقول...

مع انى مش عارفة مين الكاتب و زى الطرشة فى الزفة و ده ميزة :-)))) بس بجد
يارب تمطر عندكم علشان الادمغة بدات تبوظ من الحر خلاص

ghada mOhsen يقول...

بجد ياأبو حميد كلامك كتير صح وفي مكانه ...

أنا بجد بدأت اصلا أكره الكوره والمتعصبين ليها

لأن في فرق بين المتعصب والمشجع ...

والكاتب ده بجد أنا إتصدمت كتير .. بس هانقول إيه جت عليه يعني

ربنا يصبرنا

تحياتي

فتاه من الصعيد يقول...

:))))

ههههههههههههههههههه

يخرب بيت العبط.... ماسونيه مره واحده

بس ايه حكايه الصليب دي صحيح؟؟..قصدوا بيها ايه المتخلفين دول ؟؟

تحياتي

إرسال تعليق