مبروك ... وبجد إحنا طيبيين قوى

أولا: مبروك فوز منتخبنا والأداء الرائع والتأهل للنهائى

ثانيا: بجد إحنا شعب طيب قوى ..ليييييه؟ شوفوا بقى..

أنا كنت بتفرج على الماتش كعادة الماتشات المهمة مع أصحابى 

فى كوفى شوب فى فلوريدا مول مساكن شيراتون 

المهم,

كنت بتفرج مع إتنين أصحابى وكان قاعد جنبنا إتنين رجالة فى أواخر الأربعينات

طول الماتش وإحنا قاعدين نشجع ونهزر ونتريق .... العادى يعنى

وكان كل شوية واحد من الإتنين دول يدخل معانا فى تعليقاتنا و هزارنا

فى الإستراحة حكيت لأصحابى على رسالة من واحد صاحبنا شغال فى الجزائر

(المصريين فى الجزائر بيشجعوا الجزائر وإحنا معاهم

إنا لله وإنا إليه راجعون)

إصحابى ضحكوا جامد ولقيت الإتنين رجالة دول سمعونا وعمالين يضحكوا

أول الماتش ما خلص, الراجل اللى كان بيتجاذب معانا أطراف الحديث قالنا

عارفين الراجل ده ساكت ليه؟ (يقصد الراجل اللى معاه)

أصله جزائرى, وفضل يضحك

المهم إحنا إتكسفنا قوى من كتر التريقة طول الماتش وبعض الألفاظ اللى مش ولا بد

قعدنا نتكلم مع الراجل الجزائرى وعزمنا عليه ندفع له الحساب

فضحك وقال إن هو وصاحبه المصرى إتفقوا إن اللى يتغلب يدفع

قولت له الجزائر فى كاس العالم ومصر تاخد كاس أفريقيا

قالى كده عدل برضه

وهو ماشى سلم عليتا إحنا التلاتة وإعتذرنا له إذا كنا قولنا كلام ضايقه أثناء المباراة

إتبسط جدا وقالى إننا شعب طيب ودمه خفيف

ومانسيش إنه يقولى وهو ماشى

(الجزائريين فى مصر بيشجعوا مصر وإحنا معاهم

إنا لله وإنا إليه راجعون)

ضحكنا كلنا قوى 

وقولت له بالتوفيق فى كأس العالم

وهو رد بالتوفيق فى النهائى

السعادة

عن السعادة أتحدث

نحن نقنع أنفسنا بأن حياتنا ستصبح أفضل بعد أن نتزوج,

نستقبل طفلنا أول, أو طفلا أخر بعده.

ثم نصاب بالإحباط لأن أطفالنا مازالوا صغارا,

ونؤمن أن الأمور ستكون على ما يرام بمجرد تقدم الأطفال فى السن.

ثم نحبط مرة أخرى لأن أطفالنا وصلوا مرحلة المراهقة الأن,

ونبدأ فى الإعتقاد أننا سوف نرتاح بعد مرور هذه الفترة من حياتهم.

ثم نقنع أنفسنا أننا سنكون بحال أفضل حينما نحصل على سيارة جديدة,

ورحلة سفر وأخيرا أن نتقاعد.

الحقيقة أنه لايوجد وقت للعيش بسعادة أفضل من الان

فان لم يكن الان , فمتى إذا؟

حياتنا مملوءة دائما بالتحديات

ولذلك فمن الأفضل أن نقرر عيشها بسعادة أكبر بالرغم من كل هذه التحديات

منقول للأمانة ولكن القائل مجهول

مش عايز نلاعب الجزائر

أغلب الناس بيقولوا عايزين نلاعب الجزائر 

علشان نرد إعتبارنا و نثبت إننا أحسن

أنا بقى بختلف معاهم للأتى:

1- مهما كانت نتيجة المباراة حتزود الخلاف والإنشقاق بين الجمهورين

2- إحتمال كبير تحصل إحتكاكات بين الجمهورين فى أنجولا

3- لو مصر خسرت من الجزائر حتبقى قاسية جدا

خبطتين فى الراس توجع

وعمر ما حد حينسى إن فى نفس السنة الجزائر خرجتنا من البطولتين

4- لو مصر كسبت ... وإيه يعنى

الجزائريين حيقولوا مش مهم إحنا تركيزنا على كاس العالم

يعنى فوز مصر مش حيمحى مرارة فشل التأهل لكاس العالم

ولهذه الأسباب أفضل ألا يتقابل الفريقان

يا الجزائر تخسر من كوت دى فوار, يا مصر تخسر من الكاميرون

معايا يا جماعة ولا لأ؟

إشتغلت مع يابانيين قبل كده؟

حد إشتغل مع يابانيين قبل كده؟

أنا اشتغلت حوالى 5 مشاريع 

لو حد جرب ده حيعرف الفرق بينا وبينهم

وممكن يستغرب من بعض الكلام اللى حقوله عنهم

ملحوظة مهمة جدا....

أنا اللى لابس تي شيرت مخطط :)

1- الفكرة إن اليابانيين أذكياء خاطئة

هما متعلمين و متدربين على شغلهم  كويس قوى

2-الوقت و احترام المواعيد شىء مقدس

3- الريس كلامه أوامر ومافيش مرؤس يقدر يناقش ريسه فى أوامر الشغل مهما كان الشغل كتير

4-كبار السن عندهم ليهم احترامهم و مهابتهم حتى لو ملهمش سلطة عليهم

5- النظاااااااام يا عزيزى النظام

المشروع ليه جدول زمنى باليوم , يوميا أول نص ساعة بتبقى إجتماع للمجموعة لتحديد عمل كل فردطبقا للجدول الزمنى

اخر كل يوم اجتماع لمناقشة ماتم تنفيذه وهل هو موافق للجدول الزمنى

لو فى مشكلة (و90% بيبقوا عارفين حلها) لازم يرجعوا لمديرهم فى اليابان

إحنا حصلنا موقف معاهم كانوا شايفين إننا مخابيل

تفتكروا إيه؟

يوم خلصنا شغلنا فى نص اليوم وكان عندنا نص اليوم التانى فاضى

زوغنا؟

لأ

لعبنا؟

لأ

طلبنا منهم نبدأ معاهم فى إختبارات اليوم التالى

الراجل بصلنا بمنتهى الإستغراب ورفض

قلنا له ليه؟

وشو إحمر وقالنا

nooo, time schedule

الجدول الزمنى

طيب ليه؟

الجدول الزمنى

يهديك يرضيك

الجدول الزمنى

لأ وايه راح حكى لزمايله كلهم ويخرب بيت الإستغراب اللى كانو فيه

6-التخصص عندهم فظيع

وما أقصدش ان اللى يعرف حاجة ما يعرفش غيرها

لأ, أقصد إن كل واحد بيتكلم و يرد على الجزء بتاعه بس حتى لو يعرف  الباقى

لكن عندنا كل واحد بيتكلم فى كل حاجة فى المشروع والمشاريع اللى مش تبعنا كمان

7- أغلبهم مدخنيين بشراهة

8- الشرب عندهم شىء أساسى

9- عنصريين شوية (لأ شويتين) وفكرتهم عن العرب و المسلمين زفت

10- اللى منهم مازارش مصر متخيل إننا عايشين فى خيم وبنركب جمال و حمير

(بجد مش هزار)

11- الجدية فى العمل بالنسبة لهم شىء طبيعى, العادى يعنى

12- مافيش حاجة اسمها فشل , طالما تم تكليفه بعمل يبقى حيتعمل يعنى حيتعمل

13-ساعة الغدا مقدسة حتى لو الدنيا والعة

أنا اشتغلت معاهم كتير

بس لسه بينا وبينهم كتيييييييييييييييييييييييييييييييييير

ملحوظة مهمة عن اليابان كبلد:

مافيش عندهم موارد طبيعية زى البترول والمعادن

بس عندهم عقول وماعندهمش فهلوية

عندهم ناس بتحب بلدها وبتحب شغلها

عندهم اللى بيشتغل بياخد حقه تالت ومتلت

بيستوردوا كل المواد الخام ويصدروها للعالم كله عربيات وأجهزة ومعدات وكل ماتتخيله

وكل ده ليه؟

النظام والجدية فى كل شىء

هما عندهم كل 100 فيهم واحد ذكى ماشى وراه ال99

إحنا عندنا كل 100 فيهم 10 أذكياء وال90 عايزنهم يمشوا وراهم

بس خلاص

 

لو ممكن تغير حاجة .... هى إيه؟

لو عندنا الإمكانية إننا نرجع بالزمن لورا

ونغيرحاجة فى حياتنا

تعليم , شغل , جواز , أصحاب.......... إلخ

أى حاجة بس هى حاجة واحدة فقط لا غير

ياترى ممكن تكون إيه؟ 

35 سنة...............؟!!!!

مراتى فكرتنى إن عيد مبلادى كمان كام يوم

حاجة لذيذة خالص 

تورتة و هدية وفسحة والذى منه

تمام تمام

فكرت كده حتم كام

لاقيتهم 35 سنة

حتم كام يا ولاد؟ 35

بتقولوا كام؟ 35

كاااااااام؟ 35

المشكلة بقى بالنسبة لى 35 دى كتير ولا قليل؟

يعتى المفروض أكون عملت فيهم إيه يبقى كويس؟

أنا مابتكلمش على المستوى الشخصى خاااااااااااااااالص

أنا بتكلم عنى و عن جيلى

يعنى

الناس دايما بتهاجم الشباب والجيل البايظ والكلام ده

بسمع الكلام ده من وانا فى إعدادى

لغاية دلوقتى (من الناس الكبار)

طيب يا حلوين إنتوا عملتوا إيه؟

إيه هي إنجازاتكم الفظيعة اللى حتورثوهالنا؟

الجيل ده لغاية دلوقت ما قعدش على الدركسيون علشان يسوق

وماحدش علمه السواقة

وماحدش عايز يعلمه السواقة

ويوم ما حيستلم الدركسيون مش حيعرف يسوق

وبعدين كنتم فين لما الشباب (اللى بتقولوا إنهم بايظين باظوا؟)

ومين اللى رباهم؟

ومين اللى علمهم البوظان؟

أرجع لمشكلتى ومشكلة جيلى

هما دلوقتى فى النص

شايفين الكبار خربوها وحيسلموهالهم خربانة

وشايفين (للأسف) إن الجيل اللى طالع مش مسؤل!!!!!

بيكرروا نفس اللى كان ولا يزال بيتقالهم

نفسى أعرف وانا عندى 35 سنة 

إيه اللى كان مفروض أكون عملته

وإيه اللى مفروض أعمله السنيين الجاية؟

لو حد عنده إجابة ياريت يرد عليا

طفل صغير ولكن.........

موقف بيحصلى كتير

راجع من فسحة حلوة مع مراتى و الولاد, مراتى قاعدة جانبى والولاد فى الكنبة اللى ورا بياكلوا حاجة حلوة أو بيشربوا عصير و تروح الإشارة قافلة ويجيى ولد صغير زى اللى فى الصورة يخبط على الإزاز بيشحت, بصراحة ماببقاش عارف أعمل إيه؟

الولد ده مش شغال من نفسه دا فى وراه منظومة مشغلاه. يعنى اديله فلوس علشان صعبان عليا وأشجع المنظومة الحلوة اللى مشغلاه ولا أقوله ربنا يسهلك  و أكسر يخاطره؟ دى واحدة.............. التانية بقى العيال دول ذنبهم فى رقبة مين؟ الحكومة ولا أهاليهم اللى رامينهم ولا العصابات اللى مشغلاهم ولا إحنا اللى بنقفل إزاز العربية ونعمل نفسنا مش واخدين بالنا؟...........التالتة, الولد ده حاسس بإيه ناحيتى و ناحية ولادى وناحية المجتمع كله؟ يعنى لما يكبر شوية يا ترى مش حيفكر ينتقم من الولاد اللى قاعدين فى الكنبة اللى ورا بياكلوا حاجة حلوة  ودفيانيين ومش حاسين إنه موجود أصلاّ؟

إزرع لكى تحصد

إذا زرعت الأمانة فستحصد الثقة

إذا زرعت الطيبة فستحصد الأصدقاء

إذا زرعت التواضع فستحصد الاحترام

إذا زرعت المثابرة فستحصد الرضا

إذا زرعت الاجتهاد فستحصد النجاح

إذا زرعت الإيمان فستحصد الطمأنينة

إذا زرعت ما يرضي ربك في الدنيا فستحصد ما يرضيك في الآخرة

منقول