.jfif)
بقالى كتير مادونتش
مشغول أو ماليش نفس أو بتابع الأحداث
أفكار كتير بتتصارع فى نافوخى وحاسس إنى بهلوس
قولت أهلوس هنا
1- قنا
ماعنديش أى مشكلة إن الناس تعترض على المحافظ ويعبروا عن رأيهم
لكن عندى مشكلة إنهم يقطعوا شريط القطر والخطوط البرية
شايفها بلطجة... ولو نفعت كله حيبلطج
نقطة شاغلة تفكيرى... مش الحكومة والمحافظين دول كلهم مؤقتين لغاية الإنتخابات
يعنى الرئيس الجديد حيشكل حكومة جديدة ويغير المحافظين؟ طيب لازمتها إيه دلوقتى؟
وحازز فى نفسى قوى إن الموضوع ليه أبعاد طائفية
2- د.عصام شرف
شايف إن الراجل ده مخلص وبيشتغل بجد وبيعمل اللى عليه وزيادة
هو بشر يصيب ويخطئ
مش عاجبنى الناس اللى بتهاجمه وتقول عليه بيمثل التواضع
ياجماعة هو لما نزل ياكل مع ولاده ماراحش نشر الكلام ده
الشباب اللى قابلوه وإتصوروا معاه حطوا الصورة على الفيسبوك وكتبوا الخبر
والصحافة كتبت بناءا على كده
ولما جاب الجزمة للست الفلاحة الحاضرين هما اللى حكوا الموقف
هو إحنا ليه مستخسرين فى نفسنا بنى أدم متواضع ومحترم؟
3- السلفيين
قالوا الأول إن المظاهرات حرام والخروج على الحاكم حرام
وقالوا إحنا بتوع دين ودعوة مالناش فى السياسة
هى ليه دلوقتى السياسة بقت حلوة والمظاهرات مش حرام؟
4- المطالب الفئوية وإعتصامات العمال
الناس دول بيقولوا دلوقتى يا إما فلا
كل واحد بيدور يزود مرتبه قرشين زيادة وخلاص
بقاله سنين بياخد على دماغه وساكت وأول ماجاله حد محترم بدأيتمرد
يا جدعان طيب إشتغلوا وطالبوا بحقوقكم
لو الدنيا إتظبطت كلنا كسبانين
يعنى مرتبك يزيد دلوقتى ويفضل التعليم بايظ وماعندكش رعاية صحية وشوارعنا زبالة
ولا تصبر شوية وتشوف إحنا رايحين على فين؟
ولا تصبر شوية وتشوف إحنا رايحين على فين؟
5- الزغلول الكبير.. الجيش
الجيش جميله على راسنا من فوق
الجيش رفض يضرب المتظاهرين
ناس كتير بيهاجموا المجلس العسكرى
وماله ماهم أكيد مش أنبيا وأكيد الفساد طايل البلاد طولها وعرضها
بس مش وقته أى صدام مع المجلس والجيش
دول إعتقلوا الضباط المعتصمين فى التحرير بالقوة... يا سلام؟ المفروض يعتقلهم بالراحة.. صح؟
وياسلام بقى على الناس اللى بتحسد ليبيا وبيقولوا إن الثورة فى ليبيا أحسن من ثورة مصر..!!!!
وبيقولوا كمان الثورة فى مصر فشلت علشان الجيش هو اللى مسك
كفاية هلوسة بقى.. كفاية
2 التعليقاااااااات:
ونعم الهلاوس يافندم
لو هلوست فى مدونتى يبقى هلوسات هنا كانت محفزة ومشجعة
موافقة حضرتك جدا
بالنسبة لقنا والطائفية وبرغم ان الحكاية تزعل فعلا لكن مصر يافندم بتقولنا انا كده ...انا اهو
مين مستعد يشتغل ويصلح ولو الاصلاح هياخد بدون مبالغة عشرات السنين
الايام الجاية وفى مشكلة زى الطائفية بالذات محتاجين قوى سياسة النفس الطويل وربنا يقوينا
الزغلول الكبير ..عجبتنى فيه جدا جملة ندى الياسمبن ان الفساد داخل الجيش ليه روووووقة :)
وكده صح فعلا فى المستقبل ان شاء الله لما يكون عندنا ريس ودولة وبرلمان يبقى الريس على أقل من مهله يخلص من فساد المؤسسة العسكرية براحة خالص وربنا يقويه
مينفعش بأى طريقة وأيا كانت الاسباب اشجع على انقلاب فى الجيش ..اهو ده اللى مش ممكن ابدا
ثقافة الهزيمة .. العتبة الخضراء
و تقول الحكومة المصرية التعيسة أنها تسعى لبناء أربع محطات نووية بحلول عام 2025، على أن يبدأ تشغيل أولاها في 2019 ، وأن يضيف البرنامج النووي الجديد ما يصل إلى 4000 ميجاوات !!! علما بأن تكاليف بناء 4 مفاعلات نووية حوالى 20 مليار دولار.
و نشرت جريدة المصرى اليوم فى 20 سبتمبر 2010 تصريح د.حسن يونس وزير الكهرباء و الطاقة جاء فيه سيتم إيفاد 67 مهندساً مصريا إلى كل من الولايات المتحدة، وروسيا، وفرنسا، وكوريا الجنوبية، للتدريب على التكنولوجيا النووية. وبالفعل هذا مفيد لأرسال الأصدقاء و المعارف فى رحلة مدفوعة الأجر على حساب الشعب المصرى الفقير. ..تكلفة مفاعل نووى جديد يبلغ 5.52 مليار إيرو ، و 300 من مراوح توليد طاقة الرياح تنتج ما يعادل مفاعل نووى و تتكلف 900 مليون إيرو فقط!!!
باقى المقال ضمن مقالات ثقافة الهزيمة بالرابط التالى www.ouregypt.us
إرسال تعليق