.jfif)
التدخين هل هو إدمان أم عادة سيئة؟
أنا رأيى الشخصى إنه عادة سيئة
ده أولاً
ثانياً بقى
أنواع المدخنين
نوع حابب الموضوع وما بيفكرش يبطل
نوع تانى مش حابب الموضوع ومتهيأله إنه مستحيل يبطل
نوع تالت بيدخن دلع ومنظره وحركات
نوع رابع بيدخن دلع فى المناسبات
ثالثا أنا بتكلم فى الموضوع ده ليه؟
علشان حاجة تانية خااااالص
أنا فى حاجة غيظانى مووووووووووت
وعارف إنى حفتح على نفسى بوابة جهنم
وإنت رجعى وإنتم مجتمع إبن تيت وكده
وهى إيه بقى؟
هى إنتشار
تدخين البنات علنى
وأظن إن أغلبهم بيعملوا كده منظرة
عايزة تبان ستايل وبنت ناس
يعنى الواحد بقى يقعد فى أى حتة تلاقى البنات مولعة
فى الشارع راكبين العربيات ومولعين
فى المولات واقفين مع بعض ومولعين
لأ وتلاقيها قاعدة مع ولادها وعمالة تقولهم ده صح وده غلط
وبتشوح بإيدها وفيها السيجارة
طيب إنت زعلان ليه يا عم الحاج؟
أصل الأخت اللى بتدخن وسط الناس دى مش شايفة نظرة الناس ليها
هى محترمة وبنت ناس وزى الفل
بس الناس شايفينها متحررة ومتمردة وكده
حيروح حد قايلى طز فى الناس
ماااااشى طزين
طيب يا حاجة لما ولادك يشوفوك كده
تقدرى تقوليلهم ما يدخنوش؟
طيب حتقوليلهم بمناسبة إيه
طبعا الكلام ده ينطبق على الأب كمان
يعنى لازم هو كمان يكون قدوة
إنت إنسان رجعى ومتزمت
وتدخين المرأة لا يفرق فى شىء عن تدخين الرجل
يا حلاوة المولد
لأ يفرق بقى...
إحنا مجتمعنا رافض ده
زى ماهو بيرفض البنت ترجع البيت لوحدها فى إنصاص الليالى
ده عرف.. والعرف يؤخذ به طالما ليس ضد الشرع
ومتهيألى رفض الناس لتدخين المرأة مش ضد الشرع
والمساواة مش فى كل حاجة
يعنى مثلا لو لو دكتور جامعة راح المحاضرة بشبشب بصباع
ده مش حرام ولا ضد الشرع بس مش ده عرف المكان
ولو أنا روحت الشغل ببنتاكور ده مش ضد الشرع بس ضد عرف المكان
يعنى
هى بس الفكرة غايظانى قوى
وإنتشارها وفخر البنات بيها
وإحساسهم إن ده عادى
منرفزنى
لأ مش عادى
ونظرة أغلب الشباب والرجالة للبنت دى
مش عادية
8 التعليقاااااااات:
يختييييييييي
بردو نفس ذات الموضوع اللي نرفذني وخلني اقطع علاقتي بواحدا صحبتي انها عوذا تقلد خطبها وخلاص
بجد بتنررررررفذ من منظرهم جدا جدا
لانهم فدماغ الكل
بيبقوا بنات مش كويسين ودول......
بس
معااااااااك فى كل كلامك
فعلا التدخين عادة سيئه وادمان فى نفس الوقت
عن نفسى انا بشعر بضيق لما اشم ريحة دخان السجاير دى
انما البنات اللى بتشرب السجاير بقا دى حاجه تانيه وقصه مزعجه
ومش عارفه ازاى اصلا بتحصل
وازاى اهليهم بتسمح بكدا
وياريتها على السجاير وبس
دى الشيشه كمان انتشرت بين البنات انتشار رهيب
وملحوظ وبقا عادى جداااا بينهم
فعلا الموضوع ينرفز ومش عادى
ربنا يحافظ على بنتناواولادنا
تحياتى
انت اتكلمت عن موضوع منرفزنى من زمان
انا ايام قبل ما اتجوز كنت بارفض اى حد يتقدم مدخن
لان التدخين ده عاده مقرفه
و كل اللى جنب المدخن بيبقى مريض زيه
لانه مدخن سلبى
فمابالك البنت
انا اما بشوف بنت بتدخن باتنح فيها كأنى شفت عجبه
اه و الله
واما بفوق كده الاقيها سابت السيجاره و متنحه فى بصتى ليها
و اعتقد انا كده ببقى وصلتلها انطباعى
و سواء هيا قدوه و لا لا
العاده دى سيئه لبنت او ولد كله عندى سواء
اوباااا جيت على الحاجه الى بتعصبنى وبتضايقنى ... باكره التدخين جداااا جدااا جدااا.. وبتفرق معايا جدا لما اعرف ان حد باحبه واعتز به بيدخن .. ممكن يجيلى اكتئاب واتخنق يومين ثلاثه على ما اتقبل الموقف
بصرف النظر عن حكاية المجتمع والعرف دي عشان مش مقتنعه بيها اوي
اصل لو مشيت ورا المجتمع هايجيلى تخلف عقلي
انما انا شايفه ان التدخين ده حاجه مقرفه ومنظر الدخان وهو طالع من بؤهم بيبقى يع اوي
فالمصيبه السوده لما يكون بنوته الى بتعمل كده باشوف الست دي كائن رقيق وامور كده ما ينفعش يطلع من بؤه يع كده
وفى حكاية القدوه بقى يا حلو سيان الام والاب فيها
لكن عموما انا اكره التدخين بكل صوره واشكاله
التدخين سواء للرجل او الست عادة سيئة جدا
لو كانت مسالة التدخين حرية شخصية فبئس الحريات هى
اجمل ما عجبنى فى البوست
يعنى الواحد بقى يقعد فى أى حتة تلاقى البنات مولعة
فى الشارع راكبين العربيات ومولعين
فى المولات واقفين مع بعض ومولعين
هههههههههه
البنات مولعة الحق هات المطافىء يا عم ولا اقولك براحتك خليهم يولعوا كمان كمان
ههههههه
تحياتى
هو فى نقطة صغيرة مهما انكرناها بس موجوده
ان المجتمع بيحاسب البنت كتير قوى عن الرجالة حبايبه ونور عينيه
وكمان فى العموم مهما كان المجتمع قوة كبيرة ومؤثرة لكن لازم فى اوقات تانية اقوله شكرا ماتضغطش على اكتر من كده المهم بس ده مايكونش فى حاجة اخلاقية
أما بالنسبة للتدخين فانا حسيت ان حضرتك خايف من اتهامك بالرجعية والتزمت بس احنا أهالينا لو اتقدم لبناتهم مدخن بيبقوا بيتمنوا الموضوع مايكملش وطول ماهما قاعدين يعدوا فى عيوبه و يقولوا باستنكار شديد
ده بيشرب سجاير !!
تدخين البنات قياسا على ده من علامات القيامة عندنا والحمد لله انه كده عند ناس كتير
الابشع بقى الشيشة لانى كنت شايفة زمان ان اللى بيشربها سن ومستوى اجتماعى معين لكن الهبل اللى الشباب فيه دلوقت وشايفينها شياكة واتعودوا عليها حاجة بايخة جدا
مش عارفة انا مابحبش اعمل الغلط وأعلنه لازم ادارى نفسى شوية واعرف انى غلطانة ولازم هتغير فى يوم ما حتى لو اليوم ده لسه مجاش لكن ابقى فرحانة بنفسى وانا بشرب سجاير او شيشة كتير قوى بصراحة
انا بحس انى عايزة اعيط لما اشوف منظر مستفز كده ده طبعا بعد مااتنح شوية واعانى من الازبهلال شوية كتير زى تعليقات الاصدقاء فى المدونة والبنت اللى بتعمل كده بتحس بمدى اعجابى بتصرفها الرائع وبيبقى نفسها تقوم تخنقنى
انا موافق معاك في كلامك دة .. ممكن يكون نوع من التمرد او التقليد او حب المساواة بالراجل او نوع من الهبل والفراغ لكن في كل الحالات انا مش موافق على الست اللي بتدخن سجاير ولا شيشية منظرها بيستفزني ببقي عايز اديها خمس ست اقلام على وشها واقولها احترمي نفسك ومنظرك قدام الناس
خاصة لما تلاقي واحدة قاعدة في القهوة مع اصحابها الولاد في القهوة وتفضل تشيش منظرها بيبقي مستفز جدا
ربنا يعافينا ويصلح الحال
كل سنة وانت طيب يا جميل وينعاد عليك بالخير
كل سنة وانت طيب ياابو حميد
إرسال تعليق