Recent Posts

الاثنين، 11 أكتوبر 2010

رد قلبى


- شوفت إمبارح فيلم رد قلبى؟
- لا .. ليه؟
- أصل الفيلم ده أنا بموت فيه
- أه طبعا هو فيلم قديم بس جامد
- جامد موت .. كان كل مايجى وأنا صغير لازم أشوفه
بس إمبارح أول مره أشوفه ومافهموش
- إزاى يا عم إنت ... هو كيميا؟
- بس خليك معايا.. هو الراجل أبوهم ده - حسين رياض - مش كان جناينى؟
- أه
- وكان عايش مبسوط فى حياته
- أه
- وولاده بيتعلموا فى المدارس؟
- أه
- وولاده واحد دخل حربية والتانى كلية البوليس؟
- أيوه أيوه ... إنت حتسمعلى الفيلم... -حمادة إتنين شيشة قص هنا-
- طيب هو ينفع دلوقتى واحد جناينى يدخل إبنه حربية أو شرطة؟
- متهيألى لأ - كررررررررررررر-
- أومال ظلم إيه اللى الفيلم بيتكلم عنه؟
- مش إنت شوفت لما الواد الكبير كان عايز يتجوز إنجى وأبوها مارضيش؟
- أيوه -كرررررررررررر-
- وشوفت لما ضرب عمك حسين رياض وطرده أهو هو ده الظلم
- طيب بذمتك ودينك لو واحد إبن جناينى أو إبن بواب وكان متعلم ومثقف ومتدين
وطلب إيد واحدة أبوها من الناس الهاى حيعمل فيه كده؟
- لأ طبعا -كرررررررررررر- مش حيعمل كده
- أومال إيه يا فالح- كررررررررر-
- الباشا فى الفيلم طرد الراجل وقطع عيشه من عنده
لكن دلوقتى حيقطع عيشه عنده وعند أى حد تانى وحيشرد ولاده 
وإحتمال يقطع رقبته
- عندك حق.. شد شد -كررررررررررررررررر-
- بطل بقى تتفرج على الأفلام الفاكسانة دى تانى- كرررررررررررررررررررررر-

4 التعليقاااااااات:

فتاه من الصعيد يقول...

ايه اللي بيعمل كررررررررررررررر ده :))

انت بتشيش وانت بتناقش في سياسه البلد؟

تحياتي

الحب الجميل يقول...

البقاء لله
ان لله وان اليه لا راجعون
اسفه على تاخيرى فى العزاء بس لسا عارفه حالا لما دخلت المدونه
ربنا يصبركم
ـــــــــــــ
أحنا اللى بقينا فى فيلم الحياة فيها القوى والضعيف وبنتفرج على نفسنا
حاجات كتير كانت زمااااان ممكن تحصل وبسهوله لكن دلوقتى من الصعب تتنفذ
شوفت الفيلم دا بس بحس انه بعيد عن الواقع شوى
حتى الحب اللى فيه .

تحياتى

ستيتة حسب الله الحمش يقول...

النهاردة وانا ماشية في الشارع انا والسيد كونتينر السيد اخويا
لقيتني بتدور له وبقول
مصر بقت سلطة بابا غنوج كبيرة قوي يا بني
بص لي بنظرة صادقة وقال لأ هي سلطة خضرا بجرجير من ابو الحزمة بربع جنيه وطماطم الكيلو بعشرة جنيه
اما عن الكرررررررررررررررررررر فكله مضبوط مضبوط مضبوط
وكان ابراهيم عيسى في ذكرى الثورة ناقش الفيلم ده على بلدنا بالمصري
لو كنت شفته كنت كرهت الفيلم .. وابراهيم عيسى كمان :)

sony2000 يقول...

اهو كلو كدا
كرررررررررر وبس:)

إرسال تعليق