.jfif)
الخميس 9 مساءا
زفة رائعة فى بهو الفندق الكبير
عامل الفندق لزميله: شايف الناس الأغنياء دول.. أدى العيشة ولا بلاش
الزميل: يا سيدى دى كلها أرزاق.. فى ناس معاها فلوس بس عندها بلاوى
عامل الفندق: على رأيك ربنا يديم علينا الستلا والصحة
الخميس 11:50
زفة الختام والعريس تبدو عليه بعض علامات التوتر
الجمعة 1
صباحا عامل الفندق يصعد بالعشاء للعرسان
الجمعة 1:15 صباحا
عامل الفندق ينزل مهرولا
زميله: خير يا عم مالك
عامل الفندق: إستغفر الله العظيم دى حاجة مقرفة
زميله: هو إيه ده
عامل الفندق: طلعت أودى العشا للعرسان بتوع فرح النهارده أقوم ألاقى ... إستغفر الله العظيم
زميله: خير؟
عامل الفندق: خبط على الباب وإستنيت شوية وبعدين الباب إتفتح ومالاقيتش حد
دخلت حطيت الأكل ولاقيت العريس واقف مستخبى ورا الباب وكان...
زميله: يا عم كان إيه خلصنا
عامل الفندق: وكان لابس بيجامة حريمى
زميله: يا عم تلاقيك إنت اللى بيتهيألك وهى بيجامة رجالى بس مدلعة شوية
عامل الفندق: بقولك حريمى .. كت وبفيونكات وبنطلون قصير وعليها قطط ودباديب
زميله: إخس على الرجالة
الجمعة 1 ظهرا
العريس ينصرف مرتديا بدلة الفرح والعروس بادى عليها الحزن وعيناها محمرتان
عامل الفندق لزميله: مش قولتلك.. تلاقيها يا عينى إتصدمت لما عرفت الحقيقة
زميله: راجل عايز الحرق.. ولا بلاش راجل دى
الخميس 9 مساءا
العريس والعروسة فى الزفة فى منتهى السعادة
الخميس 11:50
زفة الختام والعريس متوتر بعض الشىء بسبب مشادة حدثت منذ دقائق بينه وبين حماته
الجمعة1
العريس بعد ما خد دش يطلب من مراته تطلعله هدوم
العروس: حبيبى أنا مكسوفة منك بس ماما نسيت تطلع شنطتك
العريس: نعم؟ هى أمك دى مش حاتجيبها البر معايا
العروس: حقك عليا أنا حشوفلك بيجامة من عندى تلبسها
العريس: إنت بتهزرى
العروس: طيب أعمل إيه ما قولتلك حقك عليا
الجمعة 1:15 صباحا
باب الجناح بيخبط
العريس: أعمل إيه دلوقتى قومى إفتحى إنت
العروس: أفتح إزاى باللى أنا لابساه ده؟ بص.. إنت إفتح الباب وإدارى وراه
العروس: أفتح إزاى باللى أنا لابساه ده؟ بص.. إنت إفتح الباب وإدارى وراه
....
....
بعد خروج عامل الفندق... شوفتى بقى يا ست هانم عمايل أمك شكلى إيه دلوقتى قدام الناس
العروس: إنت كل حاجة أمك أمك يل أخى حرام عليك تنكد عليا فى يوم زى ده
العريس: هى قاصدة ما تطلعش شنطتى علشان تعكنن عليا
العروس: عاااااااااااااااااااااااااا
العريس: .................
الجمعة 1 ظهرا
العريس ينصرف مرتديا بدلة الفرح والعروس بادى عليها الحزن وعيناها محمرتان
7 التعليقاااااااات:
على فكرة الموقف ده حصل لواحد صاحبنا بس طبعا أنا مزود فى القصة شوية
الخلاصة هي ان بعض الظن اثم وان اصدار الاحكام من الظواهر امر خاطئ ويعطي نتائج خاطئة بل وظالمة
دمت بكل ود
أنا اللي شاغل بالي
ايه علاقة ام العروسة بشنطة العريس
ده أول باشتان
وتاني باشتان كيف سمحت هذه العروسة الخرقاء إن الواد جوزها يجيب سيرة الحاجة والدتها ؟ :)
ما كلنا عارفينها
شعب مظهري
بيحكم بالمظاهر
وبيخاف من نظرة الناس اكتر من خوفه من رب الناس
يعني العريس ده لو يمشي حسب القواعد المصرية كان لازم يقابل السيرفس بلبوص ولا يستر نفسه ببجامة حريمي
قصة دع الخلق للخالق مجرد كلام غير قابل للتطبيق
ازيك يا ابو حمييييييد
اخبار حضرتك ايه ؟؟
طبيعى جدا جدا ان النا بتحكم بالمظاهر ويتمادو في الحكم بتاعهم ويفسرو كل الامور بناء على هذا الحكم الخاطئ
بس انا لو العروسة كنت اتصلت بمامتى او اى حد ممكن يجيب شنطة العريس
وانا بصراحة حاسه ان العريس دا طيوب
وعاجبنى اوى كومنت ستيتة مع انه يا ستوتة مش جاب سيرة مامتها دا راجل طيب ولبس البيجاما الحريمى وهو ساكت
مهو دي بقي بتيجي من اختلاف وجهات النظر
بس للاسف ادنا بنشوف الصوره ذي ماعوذين نشفها
لو واحد بيظن خير هتلاقي بيشوف الموضوع من نظره كويسه والعكس صحيح
بصرف النظر عن حوار الاخذ بالمظاهر دة لكن شكل ام العروسة ماكانتش موافقة على العريس من اصله وشكله هو كمان مخنوق منها من الاول
ههههههه
تحياتى لك يا جميل وكل سنة وانت طيب وبخير
ههههههههه
شوف سوء الظن :)
حلوه اويييييي
تحياتي
إرسال تعليق