Recent Posts

الأحد، 26 سبتمبر 2010

أبى

أغلب اللى بيدخلوا مدونتى مايعرفونيش
أو يعرفونى معرفة سطحية
لكن أكاد أجزم أن أغلبهم يعرفوا أبى رحمه الله
وخصوصا اللى قريبين منى فى السن
ليه؟
فاكرين مسلسل بابا عبده بتاع عبد المنعم مدبولى
فاكرين كان طيب قد إيه
فاكرين كان بيحب الناس كلها إزاى
فاكرين كان بيعامل ولاده إزاى
فاكرين تسامحه
فاكرين لعبه وحبه لأحفاده
فاكرين حنيته
أهو لو حد منكم كان شاف بابا عبده
يبقى كأنه شاف أبويا بالظبط
لأنه كان أكتر واحد طيب ومتسامح قابلته لغاية دلوقتى
من يوم ما مات لغاية دلوقتى
مافيش حد يقابلنى غير لما يقولى أبوك كان راجل طيب عمره ما زعل حد
أبويا ماكنش يعرف حاجه غير شغله وبيته وولاده وصلاته فى المسجد
ولما طلع معاش ماكنش قاعد يناقر اللى فى البيت 
زى ما رجالة كتير بتعمل
كان أغلب وقته فى المسجد أو بيشترى طلبات البيت
---------------------------------
بحاول أفتكر إنه مرة ضربنى
أو شتمنى أو أهانى
مش فاكر خااااالص
ومش علشان أنا كنت مثالى
لآ أنا كنت بعمل بلاوى أكيد
بس علشان هو كان طيب وحنين
كان بيعرف يوجهنى من غير ضرب أو إهانة
------------------------------------
ياما ضحى وحرم نفسه علشان يعلمنا كويس 
ويعيشنا كويس على قد مايقدر
وطبعا لا يمكن إنكار دور أمى الرائع
كانوا هما ماشيين بسفينة
وشايفين طريقهم
وبيعملوا اللى عليهم
ومتوكلين على ربنا إنه يوصلهم بر الأمان
-------------------------------------
يوم الخميس 16-9-2010
صلى العشاء فى المسجد
ووقف مع أصدقاءه وجيرانه
وعند ناصية شارعنا وقف مع واحد جارنا
صاحبه من أكتر من 50 سنة
وفضل يكلمه عن الموت
وإن الموت يأتى بغتة
وحكى له عن ناس كتير كان يعرفهم ماتوا فجأة
وإن الموت سهل
وإنه لابد منه
وبعدين روح البيت وقعد مع أمى وإخواتى
وكان عندنا إتنين من بنات خالاتى
قعد يتكلم ويضحك معاهم
كل ترمس وشرب الشاى وكان مبسوط قوى
ويعدين قال لبنت خالتى
سلميلى على بابا وماما وكل اللى فى أسيوط
وخرج قعد فى الصالة
خمس دقايق ونده لأمى وكان ماسك صدره
وقالها إنه تعبان ومش عارف ياخد نفسه
كان رافض يروح المستشفى أو يخرج من البيت
أمى خرجت تنده حد من الجيران
بنت خالتى بصت عليه من بعيد لقته بيستغفر ويتشاهد
جه إتنين من جيرانا وخدوه مع أمى على المستشفى
حاول الدكتور يحطله جهاز تنفس 
بس كان السر الإلهى طلع
فى الوقت ده أختى كلمتنى وهى بتعيط وقالتلى بابا تعب وودوه المستشفى
حسيت إن دى النهاية
دخلت الحمام وإتوضيت
صحيت مراتى وقولتلها إن بابا فى المستشفى وأنا رايحله
نزلت طلعت العربية وكلمت جارنا
قالى تعالى على البيت هو بقى كويس وإحنا راجعين البيت
فهمت على طول.. وطلبت أكلم أمى
قالتلى بابا مات موتة الأنبيا والبركة فيك يا حبيبى
نزل عليا هدوء غريييييييب وكنت سايق طول الطريق بالراحة خالص
كلمت أختى الصغيرة علشان أقنعها ماتنزلش دلوقتى علشان إبنها الصغير
اللى ماكملش شهرين
وجوزها كان لازم يسافر تانى يوم وماعرفش يأجل سفره
وصلت البيت وفضلت أواسى أمى وإخواتى البنات
أنا عندى 4 إخوات بنات وأنا ولد وحيد
كان نفسى أترمى فى حضن أى حد وأعيط
بس كان لازم يكون فى حد فايق ومركز علشان نخلص كل حاجة على خير
الصبح جه بسرعة على غير المتوقع
أختى بتشوف وش بابا الصبح
لاقيتها بتندهلى بصوت عالى وبتعيط
كان مبتسم ووشه منور
سبحانك يا رب
غسلنا وكفنا قبل صلاة الجمعة
صلينا الجمعة ثم صلاة الجنازة
ماقدرتش أصلى إمام وخليت الشيخ هو اللى يصلى
الجامع كان مليان على أخره وكان فى ناس بره كمان
الستات صلوا ورجعوا على البيت
وإحنا روحنا دفنا
بعد الدفن الشيخ قال خطبة قصيرة 
عظة عن الموت
ثم قال إنا لا نزكى على الله أحدا
ولكن الفقيد كان طيب وعلى خلق
وكان هاشا باشا
وكان يسلم على الكبير والصغير
لم تحدث مشكلة بينه وبين أحد أبدا
وكان حريصا على ألا يغضب منه أحدا
وقال فى نهاية كلمته قبل الدعاء
عاش بيننا كالنسمة وذهب كالنسمة
-----------------------------------
رحمك الله يا أبى وأسكنك فسيح جناته


11 التعليقاااااااات:

P A S H A يقول...

ربنا يرحمه برحمته الواسعه ويسكنه فسيح جناته ويلهمكم الصبر والسلوان اللهم آمين
البقاء لله
شد حيلك

هي وظروفها يقول...

ربنا يغفر له ويرحمه يا احمد ويتقبله ف عباده الصالحين واسال الله يجعل اخرته خيرا من دنياه وجنه عدن داره ومثواه ربنا يبارك فيك ويجعلك ابن بار ليه بعد موته كما كنت قبل موته

sony2000 يقول...

ربنا يرحمه ويسكنه فسيح جناته
اللهم امين

فاتيما يقول...

الله يرحمه يا احمد
و يبارك ف عمرك

انا حاسة انك امتداد ليه
بجد
انتا انسان طيب قوى
و دلوقتى عرفت الطيبة دى والأحترام اللى فيك
جاى منين

ربنا يوصل ف عمرك و تدعيله
و تربى ولادك زى ما رباك كدا

البوست آية ف الرقة
و الحنية
و الابوة
و البنوة
و كل حاجة ربنا مبارك فيها


تسلم يا غالى
و ربنا يصبركم جميعاً

حفيدة عرابى يقول...

الله يرحمه ويحسن اليه
ويوسع مدخله ويرزقه دارا خيرا من داره وأهلا خير من أهله
ويبارك فى عمركم
وتتقابلوا بعد عمر طويل ان شاء الله فى الجنة تنعموا بدون فراق
جميل قوى ان حضرتك تفضل تحكى عنه كتير وخصوصا لولادك
وتفكرهم بيه دايما
ربنا يلهمكم الصبر
اللهم آمين

غير معرف يقول...

الله يرحمه ويغفرله يا رب ... يصبرك انت وكل إخواتك ووالدتك على فراقه

البقاء لله

خواطر شابة يقول...

الله يرحمه ويغفر له ويقبله بالقبول الحسن وزي ما بتقولوا بالمصري اللي خلف ماماتش انت امتداد ليه تقدر تبره في والدتك وفي اخواتك ربي ما يحرمكمش من بعض
البقاء لله

ستيتة يقول...

الله يرحمه يا باشمهندس
تسمح لي اقول لك حاجة بس
لا تؤجل البكاء عليه بحجة ان عندك اشياء كتير لازم تعملها الأول
تراكم هذه المشاعر مش صحي خالص
ابكي
فقد بكى من هو خيرا منا لفراق حبيبه
وقال
ان العين لتدمع
وان القلب ليحزن
ولا نقول الا ما يرضي ربنا
وانا لفراقك يا ابراهيم لمحزونون

ربنا يراضيك
ويجعل من خلفك عوض ورضا قلب
ويجعلك للوالدة والأخوات عوض ورضا قلب

تحياتي

خواطر شابة يقول...

ابو حميد ممكن تدخل لمدونة الليالي للاهمية

غير معرف يقول...

أسكنه الله فسيح جناته
اللهم امين

الجواز و سنينه يقول...

هناك مواقف لا تنفنا فيها كل الكلمات و لا المواساه
منها فقدان الاحبه
لقد انزل الله فى قلبك الكسينه من عنده
و لن يستطيع كل الناس و لو ارادوا ان يطمأنوك كما طمنك الله
انسان بهذه المواصفات نحسبه عند الله فى الجنه
قد يكون الموت هو الحقيقه الوحيده التى لا نحب ان نراها
و لا نتوقعها
انها آلام البعاد و ليس الفراق
فالذكره العطره باقيه و كلما تذكرنا احسسنا بالاطمأنان
البقاء الله يا باشمهندس انا فى العادى مش بكتب كتير فى الوفاه بس كلامك عنه عظيم

إرسال تعليق