Recent Posts

الأحد، 25 أبريل 2010

القدوة والأمل



النهاردة وأنا بسمع الراديو

سمعت أغتية بحبها جدا عن مصر

وهى أغنية أم الدنيا

بس لاحظت حاجة غريبة شوية

الأغنية بتتذاع بمناسبة عيد تحرير سيناء

وبتتكلم عن الرموز المصرية وذكرت:

عم نجيب : أديب

زويل: عالم مصرى أمريكى

ثومة: كوكب الشرق - مطربة

العندليب: مطرب

داليدا: مطربة

بليغ: ملحن

الخطيب: لاعب كرة

عمر الشريف: ممثل

عادل إمام: ممثل

حسن شحاتة: لاعب كرة ومدرب

جميل جميل.. كل دول أنا بحبهم وبحترمهم بجد والله 

لكن....

ماعندناش رموز تانية؟

مافيش علماء ومخترعين؟

أطباء ومهندسين وعسكريين؟

أدباء وإعلاميين؟

مدرسين ومحاميين؟

ناس بسطاء وشرفاء نضرب بيهم المثل؟

أكيد فى ناس كتييييييير ممكن يكونوا قدوة ومثل أعلى لينا ولولادنا

أكيد البلد زى مافيها الإسود فيها الأبيض

أكيد فى نماذج نفتخر بيها

علشان كده أنا بفكر أعمل مدونة أسميها القدوة والأمل

ننشر فيها السيرة الذاتية للناس

اللى شايفين إنهم قدوة

واللى يدونا أمل إننا لسه كويسيين

لو حد يحب يشترك معايا فى المدونة دى أهلا وسهلا

لو حد عايز يبعتلى مواضيع أنشرها فيها أهلا وسهلا

لو الفكرة مش قد كده ياريت تقولولى

فلا خاب من إستشار


6 التعليقاااااااات:

الجواز و سنينه يقول...

فكره جميله يا ابو حميد
انا لسه النهارده بقول عملوا هيصه اد ايه على مقتل السندريلا
طيب مين سمع عن اغتيال اكتر من عالم مصرى

و لا حد كأن السندريلا حدث و هم لا ؟؟؟؟
سلم مقلوب
و لو لقيت حاجه ينفع تنشرها هابعتهالك ان شاء الله
بس المهم كمان الاسلوب يعنى بلاش حكايه حدث فى مثل هذا اليوم
يعنى اللى يكتب حاجه بلاش حكايه كوبى و بيست من اى حته على النت
و كمان ماتكونش كبيره كفايه علشان الزهق
الاهم اكتر انها لو طويله تتنشر على اكتر من بوست
دى اقتراحات ممكن تاخد بيها او لاء
او يكون عند اى حد رأى تانى

ستيتة يقول...

كل ده مقصود
متعمد مع سبق الإرصاد والترصوووودي :)
بذمتك يعني نعلي قيمة العلم؟
نعلي قيمة الجندية وانها شرف والكلام ده؟
احنا نحبط العيال
سمية الخشاب بتاخد في المسلسل ستة مليون
نلاقي البنات عايشة تحلم بالقدوة
تامر الهارب من الجيش ده نجم الجيل
يبقى جيش ايه وبتاع ايه يا عم

تدمير منظم مخطط

حلو جدا فكرة المدونة بتاعتك ربنا يوفقك
علشان تشد الناس لقراءة سير العظماء لازم تحاول تختصر
يعني تدينا سير ترانزيستور علشان الجيل الطائر يقرأ
ربنا يوفقك

أنا - الريس يقول...

انت حضرتك ممكن تعمل مدونة تانية ,, للمشتركين وخلي دي لأفكارك بس ..
ثانيا ربما يذكر التاريخ رجل ليس اهلا مثل الساسة ويبقي بسطاء في طياته رغم أن حياتهم مثيرة ,, فلا تنشغل بالتاريخ علي قدر انشغالك بجعل نفسك قدوة ,, تكرم

صيدلانيه طالعه نازله يقول...

تخيل انا سمعت نفس الاغنيه النهارده
فى الراديو و استغربت انهم ما جابوش سيره الرموز زى مشرفه و سميره موسى و غيرهم و غيرهم

حاجه غريبه فعلا
و على رأى الجواز و سنينه لسه حيرانين على من قتل السندريلا
و باقى رموزنا فى مزبله النسيان

موضوع المدونه دى جميل و ربنا يسهل و احاول ابعتلك مواضيع

sony2000 يقول...

والله فكره حلوه وانا أويدك فيها وبشده
لاننا محتاجين ليها اوي فعلا
وبالذات فالوقت ده
ربنا معاك:)

سواحة يقول...

حتحيرونى وراكم
مدونة من مدونة
طيب ما تكتب القصص هنا و لما يتلم عدد كبير يتعملوا نسخة فى مدونة ثانية
اصل التاريخ بحسب الى من يروية مفيش مؤرخ محايد 100% ، و عليه لما برد على الموضوع فى التعليقات حعرف أرد على الى كتب و انا بعلق بعد ما بفر كام موضوع سابق اشوف دماغ صاحب الموضوع فعلا فيها فكرة و لا نسخ الموضوع من حتة ثانية

الاغنية حلوة
و الفكرة حلوة
بلدنا عايزة كله الادباء و المهندسين ، بتوع الفن و بتوع الجيش و الشرطة ، العلماء و المكانيكية
كله مهم و الانسان مهم كله بكيانه
الاغنية ذكرت الناس دول لانهم مشهورين و العيال عرفينهم
يعنى شدنى لما قولت قصاد زويل مصرى امريكى :-)) هو صح بقى اثنين يتحسب علينا و عليهم
بس تفتكر لو قالوا فى الاغنية الباز ؟؟ حيتمشى الاغنية :-))
أنا لما سمعت الاثنين الباز عندى ب 10 زويل
بس الشهرة و الشنه و الرنة لزويل اكبر

فاكرتنى بفيلم الساموراى الاخير
لما توم كروز ابدى ملحوظة ان اليابانين بيصحوا الصبح و يعيشوا يومهم انهم يعملوا حاجة بكل اتقان
اى كانت حتى لو كوبية شاى (متخيل المعنى ) يعنى حتى بتاع الشاى مهم مدام بيعمل شغله صح
و ادى اليابان بقيت ايه بعد ما الحرب العالمية الثانية فتحتها على العالم :-))

إرسال تعليق