Recent Posts

الثلاثاء، 9 مارس 2010

يا ترى الجواز وهم كبير؟


وأنا بدور على حاجة فى إميلاتى القديمة خبطت فى الميل ده 
شايفين الصورة حلوة إزاى؟ ياترى حتفضل كده؟
طيب تعالوا نشوف بعد كام سنة جواز كده:
و كا ن حلم و لا و هم كبير

 المصايف 

الرجل ينبهر بهذا الممثل الأجنبي الذي يحتضن زوجته على الشاطئ وهي ترتدي مايوه قطعتين

ثم يرتميا سويا على الرمال ويتدحرجا إلى أن يصلا إلى البحر

ثم يعودا ويتدحرجا بالعكس على الرمال على الشاطئ الهادئ الخالي من أي بني آدم،

ولذلك يحلم الرجل بأن يكون هو هذا الممثل صاحب العضلات والذي يرتدي البوكسر

وأن تكون معه هذه الفتاة الرشيقة الجميلة التي ترتدي هذا الكاش مايوه وتضع 'صن بلوك' على يديها،

ولكن في الزواج يا عزيزي انسى كل هذه الخيالات تماما،

فسوف تذهب إلى شاطئ يعج بآلاف المواطنين الذين يبحلقون لأي دراع معدي أمامهم،

كما أنك لن تأخذ راحتك معها لأنها مشغولة بإعداد الساندويتشات وكأنها في الجونينة يوم شم النسيم،

بالإضافة إلى أن الكرش الذي سيظهر لك بسبب أكلاتها سيمنعك من ارتداء البوكسر،

فضلا عن أنها سوف تتحول إلى كائن غير متناسق التضاريس

يجبرها على ألا ترتدي الاختراع الذي يسمى كاش مايوه

وستكتفي بجلابية مليئة بالتطريز إذا كانت حالتها مستعصية،

أو ترتدي بنطلون برمودا ضيق إذا كانت روشة طحن ومعه شبشب بلاستيك بصباع

وعادة ما يكون بمبي أو لبني وستجلس على كرسي صغير على الرمل أمام البحر مباشرة

وتدلدل رجليها وترفعهما مع كل موجة ببلاهة غريبة وستكون في قمة السعادة ثم تلف وتنظر لك وتقول

' المية حلوة قوي النهاردة .. تعالى خد شاندوشت بلوبيف'
 
كل هذا وأنت جالس خلفها على الكرسي الأخضر الكبير تحت الشمسية وتنظر لها من فوق الجورنال

وتتحسر على الكاش مايوه والكرة الشاطئية لأن الوضع أصبح حلل محشي وطاولة وجلابية. 


زوجته في المطبخ 

يستيقظ الرجل صباحا على السرير الأبيض النظيف وشعاع الشمس ضارب في عينيه،
 
ويمسح وجهه بيده استعدادا للفوقان ثم ينزل من على السرير وهو يرتدي التي شيرت البادي الأبيض

مع شورت كاروه قصير ويبحث عن زوجته ليجدها في المطبخ تجهز التوست والجبن المطبوخ

وترتدي فقط تيشيرت أبيض طويل يصل حتى فوق الركبة بعشرين سنتيميتر وترتدي فوقه

مريلة مطبخ ربما أطول من التيشيرت الأبيض من الأمام ثم يقف الرجل خلفها مباشرة ويقبلها

ويرمي نفسه على الكرسي المجاور لترابيزة المطبخ ليصنع الكابتشينو حتى يصحصح. 

كل هذا بالطبع لا يحدث في الواقع، ولكن يحدث فقط في الأفلام والمسلسلات الأجنبية

التي يتربى عليها الرجل ويعتقد أنه فور زواجه سيفعل ذلك وستكون زوجته على هذه الشاكلة،

ولكن الصورة الواقعية ستختلف تماما عن الصورة السابقة،

فسوف يستيقظ الرجل من تحت اللحاف المشجر ويجد الحجرة ضلمة كحل لا داخلها شمس ولانور

لأن زوجته مقفلة الشبابيك عشان محدش يجيله نزلة برد رغم أن نزلة البرد مكمكمة في المنزل

ونفسها تلاقي باب شباك اتفتح عشان تخرج منه،

ثم يمسك الرجل أنفه بسبب ريحه البصل وغلي اللحمة وهبو المطبخ

ثم ينزل من على السرير وهو يرتدي ترينج التوحيد والنور ليذهب إلى زوجته في المطبخ

لتنظر له نظرة الضحية للذئب البشري وكأنه السبب في العيشة الضنك،

ثم تحدف له الفوطة المتسخة المصرية الشهيرة وتقول له ارفع اللحمة من ع النار

فهي تجهز طعام الغداء منذ الصباح،

وبالطبع كل ذلك وهي ترتدي جلابية وتحتها بنطلون وتيشيرت هاي كول صوف
.
.
.
طبعا الموضوع فيه شوية مبالغة لكن ماحدش يقدر ينكر إن الأحلام والأمنيات حاجة والواقع حاجة تانية خاااااااااااااااااااااااااااالص
وطبعا أنا بحمد ربنا وببوس إيدى شعر ودقن إن مراتى مابتقراش مدونتى  :)

14 التعليقاااااااات:

خواطر شابة يقول...

اكيد احمد ربنا انها مبتقراهاش واوعى في يوم شيطانك يوزك تدلها على طريقها انا حذرتك اهه ههه.
خلي اللي لسه متزوجوش يحلموا بلاش تصدمهم بالواقع من دلوقت لما الطوبة توقع في المعطوبة حيشوفوه بنفسهم مستعجل عليهم ليه
دمت بكل اود

سواحة يقول...

:-))))
طيب ليه يا راجل حرام عليك
منفسهاش تضحك هى طيب ؟؟؟

و بعدين حتفطر توست بالجنبة :-)) حتشبع و لا حتتخانق على فين باقية الاكل يامدام ؟؟

ستيتة يقول...

ههههههههههههههههههههههههههههههه
لو اللي انت بتوصفه ده هو الجواز
أنا خالعة يا فندم

بقى دي مبالغة بسيطة؟
بسيطة
بسيييييييييييييييييييييطة؟
انا راضية ذمة أي مواطن ها يقرأ كلام أخوه المواطن ابو حميد

لأ يا فندم هي فعلا الحياة مش فيلم اجنبي
بس فيها ساعات حاجات أحلى من مائة فيلم اجنبي

يعني لما جوزي بيجيب لي النسكافيه وعصير البرتقال الفريش كل يوم الصبح في السرير ده بقى مش ها تلاقيه غير عند المصري الجدع
اللي برضه بيلبس ترننج التوحيد والنور عادي جدا :)

قال كاش مايوه قال
هههههههههههههههههههههههههههههههههه

أحمد عبد الحميد يقول...

خواطر شابة
----------
أنا طبعا عمرى ما أغلط الغلطة دى... هى حتعرف لوحدها وهى بتدعبس فى الجهاز بتاعى :)
وعلى رأيك خلى الشباب عايش الوهم لحد ما يتصدم بالواقع

خالص تحياتى

أحمد عبد الحميد يقول...

Wanda
-----
هو مين جاب سيرة إنى حفطر توست بالجبنة؟ دى بتحضر الفطار بتاعها علشان تفضل رشيقة :)
أنا ليا سيستييييم تانى خالص فى الفطار
منورانى

أحمد عبد الحميد يقول...

ستيته حسب الله الحمش
------------------
طبعا يا دكتورة مش اللى أنا واصفه ده هو الجواز.. أنا أعقل من كده شوية :) بس دى مبالغة ساخرة علشان الناس اللى بتحب تعيش الوهم وبعدين ده مش رأيى الشخصى ده ميل جانى غير إن فى حااجة مهمة.. انا مش عارف يعنى إيه كاش مايوه؟!!
سؤال مهم أرجو الإجابة عليه: جوز حضرتك بيجيبلك النيسكافيه والعصير مع بعض ولا ده فى يوم وده فى يوم؟
الحمد لله.. أنا مابلبسش ترنجات التوحيد والنور خاااااالص :)

تحياتى يا دكتورة

فاتيما يقول...

ليه يا ابو الحماميد كدا
هتخلينى اصنفك فى فئة اعداء الجمعية كدا ؟؟؟

دنت شكلك راجل طيب
و ربنا ما يوقعك فى سكتنا يا باشمهندزززز



طيب مبدئيا عاوزة اتفق مع ستوتة
فى ان الحياة الحقيقة كدا

بس ما الذى يمنع ان الواقع
يكون مبهج برضو
و فيه سعادة و لو نسبية

على فكرة بقى

اخويا الكبير لما ييجى يزورنا
بنقعد كلنا فى المطبخ
نعمل شاى و نسكافيه
و نحضر الاكل و هوه قاعد على ترابيزة المطبخ
يحكى و يرغى معانا
انا بقعد اربع على الأرض
و اشرب النسكافيه بتاعى
و القطط تجرى قصادى و تيجى تقعد على حجرى
و ساعات التليفون يرن و ماما ترد و نسمع حواديت


ونس
ونس كدا و دفا متلقهوش
فى مكان تانى فى البيت



الملخص عشان مطولش عليك
الجواز يا باشمهندس علاقة تشبه الاخوة
و الامومة و الأبوة


فيه حد يزهق من اخوه ؟؟
آه بيحصل
ساعات كدا
بس مش علطول

بيبطل يحبه ؟؟
يتونس بيه؟؟
بيصحى الصبح يجرى يغسل وشه و يتوضب
عشان يعرف يشوفه رايق و متهندم ؟؟
مبيشوفهوش و هوه مكشر
و متنرفز و معيط ؟؟

كل دا بيحصل فى العلاقات الانسانية الحميمة
و الناس مبتزهقش من بعضها
اشمعنى الجواز ميبقاش بنفس الدرجة ؟؟
و يعامل نفس المعاملة و يبقى اوهام ؟!!



قلت مش هرغى
و رغيت برضو



المهم بقى ان اهم حاجة
المدام متوصلش للمدونة حرصا عليك


و كمان ما شاء الله
انتوا بتفطروا كل يوم؟!!!

sony2000 يقول...

طب هل ياافندم بذمتك بذمتك
وانت اهو متجوذ
هل يحدوث ذلك فعلا في حياتك
ولا شويه كدا وشويه كدا
سؤال فنفوخي
هههههههه
تقبل مروري وتحياتي

أحمد عبد الحميد يقول...

فاتيما
------
أنا بس اللى عايز أقول حاجة مهمة إن البوست ده ساااااخر مش أكتر وأنا كمان مايتريقش على الزوجات بس لأ ده كمان على الأزواج...وما ذكرتش إن الناس بتزهق من الجواز
هو في إيه النهارده؟ الماس ها مش شايفه الجزء الساخر والمبالغة فى البوست وتعليقى عند حضرتك لاقيت واندا بتسألنى عليه أشئلة مالهاش دعوة من وجهة نظرى بالتعليق
شكلى مهيس وبكتب كلام مش مفهوم

أحمد عبد الحميد يقول...

sony2000
--------
لأ طبعا أنا مابيحصليش الحالتين لأن
1- مراتى مابتلبسش مايوهات ولا جلاليب مطرزة
2- الشمس بتدخل الأوضة من غير ماتضرب فى عنايا
3- مابلبسش ترنجات من التوحيد والنور
4- مراتى ما بتطبخش وأنا نايم لأنها بتطبخ بالليل أو ما بتطبخش أساسا
5- بصحى الصبح ألاقيها عملالى سندوتشات (أيام المدارس مع العيال) وغالبا بلاقى القهوة جاهزة يدوب أصبها فى المج الحرارى واخدها معايا
6- الحمد لله أنا سعيد بالجواز جدا جدااااااا

سواحة يقول...

علشان عيد المرأة الى فات
يارب تكون افتكرت تجيب لمدام وردة

و علشان خاطر عيد الام الى جاى :-))
و شخلل جيب يابو العيال

عفونا عن طلب الرد على التعليق
متتقمصش قوى كده :-)
انا كده ساعات بهزر هزار جد ثقيل حبتين

ده مش اتهام دا استفهام
بس يظهر معندكش اجابة على السؤال
و لا يهمك
نمسحه كله من اوله لاخره :-)))

و انا الى هيست من الجدول و الارقام الى مخولانى من الصبح لحد دلوقتى :-(

خليى بالك من العيال بس فى زمن العجايب الى جاى
و تصبح على خير

أحمد عبد الحميد يقول...

Wanda
-----
لا ياشتى أنا مش مقموص ولا حاجة ودى ردودى
- مراتى بجيبلها ورد من غير منلسبات
- بجيبلها هدايا فى المناسبات وفى غير المناسبات
- لما يكون معايا فلوس زيادة بديهالها تجيب اللى هى عايزاه
- مابخليهاش تحط فلوس فى مصروف البيت لكن هى ساعات تكون عايزة تشترى حاجة زيادة للبيت أو تجيب حاجة عجباها لنفسها او للولاد فبتصرف من فلوسها
- لبسها ولبس الولاد من مصروف البيت
- أى حاجة تخصنى على حسابى مش على حساب المصروف


الولاد
- أنا عندى ولدين وماعنديش بنات
- ساعات بيضربو لما بيعملوا حاجات خطيرة
- مابضربش على الوجه
- الضرب مش عنيف
- بعلم الكبير إن اللى يضربك إضربوه وده مش كلام من دماغى اللى قال كده دكتور ياسر نصر فى حلقات عن تربية الأطفال قال إن الطفل لازم يتعلم الأول ياخد حقه وبعدين نعلمه التسامح و العفو وده مش قبل 7 سنين

تحياتى يا فندم وانا مابزعلش من الهزار ولا الحوارات العنيفة حتى

سواحة يقول...

ابو حميد سؤالى كان فى الضرب بس انت ما سدقت تقر بكل حاجة :-)))
بس ياسيدى ربنا يباركلكم فيما اعطاكم

انا حسبنى من كل ده و امسك فى نقطة يعنى لو سمحت

دكتور ياسر نصر فى حلقات عن تربية الأطفال

مين ده ؟؟؟

و بعدين قصدك بتعلمه الدفاع عن النفس
اصلها تفرق
بين تعلم الضرب و تعلم عدم الانضراب

طيب لو ربنا رزقك ببنت حتعلمها برضة؟؟؟
مش حقها هى كمان
تتعلم الأول تاخد حقها وبعدين نعلمها التسامح و العفو:-) و لا ايه ؟؟
و الموضوع مش مقتصر على سن :-) اظن يعنى :-)

أحمد عبد الحميد يقول...

Wanda
-----
لا يا فندم أنا ماصدقتش ولا حاجة :)
بالنسبة للدكتور ياسر نصر حضرتك إعملى سيرش على اليوتيوب وحتلاقى حلقات كتير عن تربية الطفال وبرنامج تانى إسمه فجر أمة
أنا بعلم إبنى ياخد حقه يعنى اللى يضربك إضربه وماحدش ياخد منك حاجة غصب عنك يعنى مايبقاش إنسان مستسلم وبعد ما يقدر يعمل الكلام ده اعلمه فضيلة التسامح والعفو .. لأن التسامح والعفو للقوى لكن بالنسبة للضعيف بيبقى إستسلام وقهر
وإن شاء الله إذا رزقنى ربنا ببنت حعلمها برضه تاخد حقها وبعدين أعلمها التسامح (والكلام ده أنا سمعته بالتفصيل فى حلقة من حلقات البرنامج)
أظن كمان إن الموضوع حسب السن يعنى لو واحد كبير مش حعرف أعلمه إزاى ياخد حقه.. كل سن ولي الأشياء المناسبة والتى يجب تعلمها

تحياتى يا فندم

إرسال تعليق