Recent Posts

الأحد، 7 مارس 2010

63 جنيه


يوم الجمعة اللى فات كنت فى بيت العيلة

وكانوا بيتفرجوا على برنامج على قناة المحور أظن إنه 48 ساعة... مش عارف بصراحة

المهم جت فقرة عن مواطن مصرى رب أسرة معاشه

63 جنيه

الست المذيعة إتكلمت مع الراجل اللى بصراحة حاله يصعب على الكافر

المعاش ده بيكفى الإيجار والكهربا والمياة

اما الأكل فده اليوم بيومه

علشان يدبر مصاريف الأكل

بيجيب أنبوبة البوتاجاز ويعبى منها أنابيب صغيرة

وده شىء فى منتهى الخطورة ممكن تنفجر وتموته هو وكل اللى فى البيت

وده كلام الراجل نفسه.. بس يعمل إيه؟

الست مراته بتقول إن لما بيجيلهم تلاتة جنيه فى اليوم بتفرح

بتشترى بجنيه عيش وجنيه فول وتشيل جنيه

وقالت إن عندها نص كيلو سبانخ مش و مش عارفه تطبخه

عاشان مافيش طماطم وبصل

الراجل ده عنده ولد صغير وبنت كبيرة حوالى 18 سنة

كل اللى فات ده كوم وسؤال المذيعة للبنت كوم تانى

بتسألها : والدك ووالدتك بيقولولى إن نفسيتك تعبانة.. ممكن تقوليلى ليه؟

عاااااااااااااااااااااااااااااااااااااااااااااااااااا

ده سؤال ياناس يا تييييييييييييييييييييييييييييييييييييييت

طيب...

ياترى ذنب الناس دى فى رقبة مين؟

- الحكومة اللى بتدفعلهم معاش 63 جنيه بالتمام والكمال

- المليارديرات اللى فى البلد وشايلين فلوسهم ومحدش بيسأل عن الغلابة اللى زى دول؟

- أصحاب الأعمال اللى مفروض يكون عندهم فى مؤسساتهم جزء إجتماعى ويشغلوا الناس اللى زى دول

- الناس اللى مابتدفعش زكاتها أو لو بتدفع مابتتحراش الدقة علشان توصل للى يستحقها

- إحنا اللى الحمد لله ربنا ساترها معانا وكتير بنفنطظ وندفع فلوس فى كلام فارغ

- جميع ماسبق
- جميع ماسبق بنسب متفاوتة

فى النهاية نقول

اللهم إرفع مقتك وغضبك عنا

ولا تؤاخذنا بما فعل السفهاء منا

15 التعليقاااااااات:

محمد فؤاد (صاحب عمود النور) يقول...

لا حول ولا قوة الا بالله
الحمد لله على النعمة اللى احنا فيها

الناس دى هتروح فين من ربنا ..يتسالوا يوم القيامة عن الراجل دا من اول الكبير لحد اصغر مسؤل

صيدلانيه طالعه نازله يقول...

انا مش عارفه الناس دى و الله عايشه ازاى
انا البرامج دى بتتعب قلبى و باحس ان اللى بيستضيفوهم من المذيعيين بيبقوا عندهم تخلف عقلى مزمن لان اسئلتهم بتوضح ده
ربنا يرحمنا برحمته و يرزق الناس من حيث لا يحتسبوا

ستيتة يقول...

يعني يا ابو حميد هم دول بس اللي كده
ياإلاهي على موظف الحكومة
موظف محترم بالدبلوم او يا سيدي بالبكلوريوس
صدقني انا لما عرفت مرتباتهم تعجبت
حاولت بأي وسيلة احسب بيعيشوا ازاي لم تفلح جميع النظريات انها تخليهم عايشين
ربنا الرزاق ذو القوة المتين يجبر خاطرهم ويرزقنا واياهم رزق طيب نصون به وجوهنا عن سؤال الناس

كلمة تحري الناس مستحقة الزكاة دي ها تدهشك
يا عزيزي اعطي زكاتك لأي حد في طريقك
صدقني كله محتاج
كله محتاج
طلع فئات محدودة على صوابع اليد هم بس اللي مش محتاجين فعلا

تحياتي

ستيتة يقول...

انا عاوزة اضيف تعليق بس خايفة الناس تفهمه غلط
بس الشغل مش عيب ابدا
الأب اللي بيعبي انابيب وبيعرض اسرته للتهلكة ممكن يكون مش قادر خالص يشتغل
بس الأسر المصرية طول عمرها اسر متعاونة
الست مش بتشتغل ليه؟
هي كمان مريضة والله اعلم
طب البنت مش بتشتغل ليه
18 سنة
اللي قدها بره بيشتغلوا عادي جدا وبدون اي فقر مدقع
بياخدوا الثانوي وبيشتغلوا واللي عاوز يكمل تعليم بيكمل وهو بيشتغل
يعني الشغالة المنزلية يا ابو حميد بتاخد من 60 - 80 جنيه في اليوم الواحد وبتدخل البيت ثمانية وبتخرج اتنين الضهر
لو البنت دي اشتغلت يومين اتنين في الأسبوع
وربما الأم كمان تقدر
والله اعلم بمقدرة الأب لأني مشفتش الحلقة
تأكد ان فلوس الحكومة مش ها تلزمهم
الشغل كتير يا ابو حميد بس الناس عاوزة تقعد في مكانها
انا اسفة لو اعتبرت تعليقي فظ او غير مراعي لأحوال الناس
بس المحتاج يركب الصعب
ولما يكون يومية البنت 60 جنيه في اي بيت مصري ولا ها تتأخر ولا تبات
يبقى مش معقول اسيب نص كيلو سبانج علشان معنديش بصل او طماطم
انا مش بتكلم عن اللي انت شفتهم بس
انا بتكلم في العموم

عندي فراشين في القسم يوميتهم 5 جنيه فقط لاغير
وأيام الأجازات لا تحتسب
لو على يوميتهم من الحكومة مكنتش كفيتهم مواصلات
لكن كل واحد بيشغل نفسه وبيجري شمال ويمين على أكل عيشه

وحسبي الله ونعم الوكيل في بلد مليئة بالموارد ولكن منهوبة

تحياتي واسفة على الإطالة

sony2000 يقول...

بجد مبقاش الواحد عارف يقول ايه من كتر اللي بيحصل
موش هقدر اقول غير
يااااارب ارحمنا برحمتك ولطفك يارب

غير معرف يقول...

ربنا يعافينا

و يا ترى مين هيسأل عن الناس دي يوم القيامه ؟؟ خمنو ميييييييييين ؟؟؟

انا مش هقول عن نفسي

بس ان شاء الله ربنا هيكرمهم و هتتغير حياتهم مدام ظهرو في البرنامج

أول زياره ليا و ان شاء الله اكيد مش الأخيره و هكون من متابعين حضرتك

و اتمنى تشرفني و تزورني هنا

http://ahmedabdulmohsin.blogspot.com/2010/01/blog-post_25.html

خواطر شابة يقول...

انا ايضا شفت البرنامج وثأثرت بالحكاية هؤلاء هم المتعففون الذين ينبغي على اصحاب الزكاة والصدقات التحري والبحث عنهم
تعرف عندنا نكتة تقول ان الموظف يأخذ أجرة 2000 درهم ويصرف في الشهر 5000 درهم وكثر الله خير الدولة عمرها ما بتسألو جبت الفرق منين.
تحياتي

أحمد عاطف يقول...

انا مش هاقولك اكتر من ان الكلام دا غير منطقي

اعذرني

مش عشان انا تبع الحزب الوطني لا لا يلعن ابو الحزب الوطني

ولا عشان حسني مبارك لا لا الهي يارب ما يرجع ولا يقوم من نومته اللي هو فيها

بس السادات سنة 78 كان عامل حد ادنى للمعاشات كان 80 جنية وقتها

غير ان الحد الادنى للاجور الحكومية حاليا هو 300 جنية مصري فلو الراجل دا على المعاش وبيقبض 40% من اخر اجر حصل عليه بافتراض انه 300 جنية

يبقى بيقبض 120 جنية تقريبا او اكتر

هو دا اللي اقصده ان البرنامج بيبالغ حبتين غير ان قناة المحور قناة تعبانة نفسيا

مش هاقولك ان الناس مرتاحه والله في بيوت ما بيكفيها ولا 1000 جنية في الشهر وكمان ماشيه على اد الاد

والبلد بقت عايزة الحرق ب 63 جنية رقم غير منطقي يابو حميد

تحياتي

أحمد عبد الحميد يقول...

محمد فؤاد (صاحب عمود النور)
--------------------------
صح يا محمد.. بس تفتكر إحنا مش مسؤلين إحنا كمان عنهم؟

أحمد عبد الحميد يقول...

صيدلانيه طالعه نازله
-------------------
أنايا دكتورة مابتفرجش على البرامج دى خالص لكن أبويا وأمى مدمنين البرامج دى بسبب تخلف مقدميها

أحمد عبد الحميد يقول...

ستيته حسب الله الحمش
-----------------
دكتورة.. تعليقك صح تماما وماحدش ينفع يفهمه غلط لكن إحنا مش عارفين ظروف الناس إيه يمكن الراجل خايف على بنته مثلا أو شىء من هذا القبيل
دايما منورانى يا دكتورة بتعليقاتك الرائعة
خالص تحياتى يا فندم

أحمد عبد الحميد يقول...

sony2000
---------
ربنا يسترها علينا جميعا لأن ربنا حيحاسبنا كلنا على الناس دى بدرجات متفاوتة

أحمد عبد الحميد يقول...

أحمد .. لو مخانتنيش الذاكره
-------------------------
ناشى يا احمد دول حتتغير حياتهم.. طيب مئات الألاف أو الملايين اللى زيهم حتتغير حياتهم إزاى؟

أحمد عبد الحميد يقول...

خواطر شابة
-----------
يااااه فينك من فترة مش باينة

شوفى يا ستى أصل النكتة:
رئيس عربى بيتكلم مع أوباما فالراجل بيقول إحنا فى أمريكا دخل الفرد فى المتوسط 10000 دولار ومصاريفه 5000 فالرئيس العربى سأله طيب بيعملوا إيه فى الباقى؟ رد عليه يحوشوه يتفسحوا بيه يشربوا بيه خمرة إحنا بلد ديمقراطى مالناش دعوه
قام الرئيس العربى قاله إحنا عندنا متوسط الدخل 200 والمصاريف 1000 الرئيس الأمريكى إستغرب ياااه طيب بيجيبوا الفرق منين الرئيس العربى قاله إحنا بلد ديمقراطى مالناش دعوة يسرق يشحت يرتشى هو حر

أحمد عبد الحميد يقول...

أحمد عاطف
---------
أستاذ أحمد طبعا تعليقك منطقى بس الراجل ده ماكنش موظف حكومة ده كان فران وأنا مش عارف المعاش ده بتاع إيه
تحياتى

إرسال تعليق