Recent Posts

الأربعاء، 10 فبراير 2010

دى بلد تستاهل إننا نشجعها؟


السؤال ده سأله واحد من أصحابى

بعد ماتش مصر وموزمبيق فى بطولة أفريقيا الماضبة

كنت بتفرج على الماتش مع 2 أصحابى فى كوفى شوب

الماتشات دى فرصة إننا نشوف بعض ونتكلم

المهم

لما سأل السؤال ده إحنا بلمنا شوية وبعدين فلناله

طبعا لازم نشجع فريقنا حتى لو كان وحش

قال: أنا مابتكلمش على الفريق أنا بتكلم عن البلد

قلتله مش فاهم؟؟!!

قالى : شايف الزحمة والتلوث والفساد اللى عايشين فيه؟

فلت: ماشى بس دى برضه بلدنا

قالى: الواحد ليه فى بلده أهله وصحابه

يعنى لو أعرف أخدهم وأعيش فى أى بلد تانى

حتبفى بلدى ومش عايز من البلد دى حاجة

صاحبى التانى قال لأ طبعا الكلام ده غلط

يعنى أنا من الإسماعيلية ومهما عشت فى القاهرة بحن للإسماعيلية

وببقى فرحان جدا لما برجعلها

صاحبى الأول فاله: علشان الإسماعيلية أروق وأنضف من القاهرة

المهم إتناقشنا شوية وبعديها غيرنا الموضوع ورجعنا للكرة

بس الكلام ده فضل فى دماغى

وفكرت فيه كتير مع إنى عارف الإجابة

أكيد بلدنا مش أهلنا وصحابنا وبس

لأ

دى الشوارع والحوارى

محلات الأكل وعصير القصب

القهاوى البلدى

زينة رمضان وكحك العيد

الصعايدة والفلاحين

الوجوه السمرا الطيبة

إسكندرية وريحة البحر

ريحة المطر فى الشتا

أغنية فريد الأطرش فى الربيع أدى الربيع عاد من تانى

البيض الملون والفسيخ فى شم النسيم

الناس العواجيز وهما نازلين يصلوا الفجر

دعاء أمهاتنا من على سجادة الصلاة

التمشية فى وسط البلد

أكل الترمس والدرة المشوى على الكورنيش

.

.

.

.

وحاجات تانية كتير

وإذا كان فى حاجات وحشة

أكيد فى حاجات حلوة كتير

ممكن أكون متفائل زيادة عن اللزوم

بس أنا بحب البلد دى

 

4 التعليقاااااااات:

خواطر شابة يقول...

تعرف حالنا مع اوطانا ايه حالنا هو حال الام لما تقول أدعي على ابني وأكره اللي يقول امين فنحن ايضا لانملك الا ان نحب وطننا في كل الظروف بفقرها بتخلفها بجهلها بكل ما فيه لاتملك الا ان تحبها لانها بلدك وهذا الشعور عام ستحسه انت المصري ناحية مصر واحسه انا المغربية ناحية المغرب ويحسهاأيضا الموزمبيقي ناحية بلده

فاتيما يقول...

كلنا تقريباً
زيك يا باشمهندس

بنحبها

و المفروض اللى يحب
يحب الحاجة أى حاجة
بكل ما فيها
و ميقعدش ينقى


ياخدها بعبلها


و معلش مع احترامى لرأى صديقك ...
مساوىء البلد مين السبب فيها ؟؟
الشارع و البيوت و لا الناس ؟؟

احنا كشعب من وجهة نظرى
منقمسين قصاد الوضع الحالى لبلدنا
لأربع اصناف


صنف بيتكلم ....و ثورته ايجابية
وصنف بيتكلم ... و ثورته سلبية

و صنف ساكت ... و بيغير نفسه لأنه قادر عليها
و صنف ساكت ... و مش فارقة معاه الدنيا خالص


صديقك فيما أزعم ...من النوع التانى
اللى بيتكلم و مبيعملش حاجة
غير اعلان سخطه و بس


حب الوطن شىء فطرى
انتماء الإنسان لأرضه
و ايام صباه بكل تفاصيلها


البنى آدم نفسه
لو استعرض حياته
هيلاقى فيها اشياء حلوة و اشياء سيئة
يبقى بناء على السيىءمنها
نحكم عليه انه ميستاهلش ينحب ؟؟

فما بالك بالبلد دى
اللى احنا بهدلناها قوى
سواء بسلبيتنا
أو بالظالمين مننا ...
و حتى المخلصين برضو بيحاولوا قدر عشقهم فبلاش يعمم


قوله فاتيما بتقول
البلد دى أحسن من غيرها
بس انت اللى مش واخد بالك

تحياتى ليك

Unknown يقول...

حال الوطن من حال المواطن

مين اللى بيلوثها الاتراك ولا الامريكان
مين اللى برمى الزبالة
الاسرائيين هما اللى بيرموها بليل يعنى مثلا

والفساد
الموظف اللى بينام فى المكتب ماهو ابويا و اخويا و عمى وابن عمى وانا

Bookmarks exchanger يقول...

بس برضه بنحبها ....

ودمتم

إرسال تعليق