Recent Posts

الاثنين، 18 يناير 2010

لو ممكن تغير حاجة .... هى إيه؟


لو عندنا الإمكانية إننا نرجع بالزمن لورا
ونغيرحاجة فى حياتنا
تعليم , شغل , جواز , أصحاب.......... إلخ
أى حاجة بس هى حاجة واحدة فقط لا غير
ياترى ممكن تكون إيه؟ 

12 التعليقاااااااات:

الجواز و سنينه يقول...

يا مساء الموضوعات الجميله
بص يا هندسه
انا كان مفروض ادخل اعلام
مش عايزه اقوله هايله حتى تحليل البرج بتاعى بيقولى كده
رغم انى مش بقتنع بالحاجات دى بس فى دى طلع صحيح
حتى الناس اللى مش بتعرفنى بيقولولى انتى مذيعه
يلا بس مكتب التنسيق و صراحه مش عندنا ثقافه انت مبدع فى ايه فاتدخله
ده بالنسبه للتعليم
بالنسبه للجواز اكيد مش كنت هاغيره
بس كان ممكن اغير اسلوب تعاملى فى حبه حاجات كده
الاصدقاء الحمد لله انا اعتبر محظوظه فى اصدقائى و بحبهم كلهم
اى حاجه تانيه احب اغيرها
احب احوش كل حد ماكانش يستاهل انى اعامله كويس من حياتى و من ذاكرتى
سؤال جميل يا باشمهندس و صعب

خواطر شابة يقول...

انا عن نفسي دائما بقول اني نفسي ارجع بطن امي ولو رجعت والله محأطلع لي الدنيا دي ولو بالطبل البلدي ده الاوبشن الاول لومش ممكن نفسي ارجع بالزمن للوراء لحظة تكويني واختار اني اكون ذكر مش انتى لان مجتمعنا الانثى فيه درجة تانية مها عملت ولو الاوبشن ده كمان مش موجود فخلاص مش عاوزة اغير حاجة ماهو ياكده يابلاش هههه
تحياتي لك وان شاء الله يدوم التواصل

هي وظروفها يقول...

والله يا باشمهندس ما عارف اختار انهي واحده

بس انا لسه مجوزتش فافتكر دي الوحيده اللي لسه مخرجتش من تحت سيطره الاختيار

تفتكر اننا لو رجعنا بعمرنا هنغير حاجه افتكر لأ

لأننا هنرجع بدماغ زمان

تفكير زمان

جنون زمان

عدم مسئوليه زمان

فبالتالي هنختار اللي عملناه ونكرره

انما لو رجعنا لزمان بدماغنا يا نهار ابيض

ده اموت نفسي لو عملت اللي فات تاني

Unknown يقول...

اغير التعليم اذاكر زيادة وادخل ادب او دار العلوم مش تجارة

اصحاب ناس بتذاكر و رجالة اكتر

حاجات كتير مش فى بالى دلوقت

ميرام يقول...

مش هغير حاجة
بجد
حتى لو غلط
كل موقف غلطت فيه علمني مااغلطش بعدها
وكل حاجة وجعتني خلتني اقوى كتير
مش هغير بجد !

فاتيما يقول...

يا لهوى يا باشمهندس أحمد
دا سؤال مرعب
بس هجاوبك عليه
لأنى جاوبت من قبل على نفس السؤال
بس كان مصاغ بشكل تانى


كان سأله المراكبى صاحب مدونة
يا مراكبى بشكل غير مباشر
كان بيتكلم عن ال restore
بتاع الكمبيوتر
و هل البنى آدم محتاجه يعمله لحياته
كل فترة و لا لأ


ساعتها انا رديت عليه
و قولتله


انا مش عاوزة أعمل ريستور لحياتى
رغم كل الفشل اللى كان فيها


لأن لو عملت ريستور
لمرحلة ما قبل الزواج مثلاً
يبقى مش هتجوز طليقى


و رغم انه كان اختيار اكتر من سىء
لكن دا معناه
انى مكنتش هخلف يوسف
و انا مش عاوزة كدا
و لا يتخيل حياتى من غيره



و يمكن اللى شوفته ف العشر سنين
اللى فاتوا
كان تمن هين و رخيص جدا
لأمومتى اللى بعتبرها اغلى من أن تقدر بشىء


فانا راضية
و مش عاوزة اغير حياتى الماضية
إلا لو خليت يوسف فيها
و طبعا دا ضد قواعد اللعبة


الشغل نفس الحكاية
عمرى ما اشتغلت حاجة و ندمت عليها


الدراسة اطلاقا
انسب حاجة ليا المكتبات
و بحبها جدا

الاهل
لأ برضو
ناس غيرهم
كانوا إتبروا منى مثلاً
او حبونى بدرجة اقل


مش عاوزة اغير حاجة يا أحمد
انا بس بحاول
أفكر ف اللى جاى
اختاره
مش هوه اللى يختارنى

و إن كانت دى كمان
فيها قولان
لأن كل شىء نصيب
و اختك فاتيما
من المؤمنين بالقدر جدا
و المكتوب ع الجبين من قبل ما نتولد


قصره عاوزة اقولك


الف مبروك ع المدونة
و يجعلها عتبة سعد عليك
سلامنا لأسرتك الجميلة

أحمد عبد الحميد يقول...

الجواز وسنينه
------------
معلش على موضوع الإعلام ده... إحنا اللى خسرنا مذيعة متميزة

خواطر شابة
----------
شكرا ليكى
بس موضوع اننا نتولد أو نختار نوعنا ده مش بإيدينا
أنا بسأل عن الحاجات اللى لينا فيها إختيار

هى و ظروفها
-----------
نورتنى يا باشا
أنا بقول لو نرجع و عندنا خبرة دلوقتى

العيسوى الصغير
------------
يا فندم لو الحاجات الكتير جت فى دماغك ياريت تقولهالنا

ميرام
-----
أحترم رأيك بشدة

فاتيما
------
سعيد بمرورك يا فندم و بمباركتك ليا على مدونتى المتواضعة
ومن الحاجات الحلوة إن الواحد يكون راضى

mostafa rayan يقول...

حاجات كتير هحب اغيرها
بس يمكن اهم شيئ تجربه غلط دخلتها وانا صغير قوي وماكنتش احب ادخلها لأنى اثرت عليا سلبا لوقت طويل
لك كل التحيه يا اخى

ماتخافوش يقول...

بصراحه انا شايف ان الواحد لازم كل فترة يبقي له وقفة محاسبة ومراجعه مع ربنا عشان يشوف هو بيقرب من ربنا ول بيبعد

Soooo يقول...

ارجع الزمن الماضي والحق امي - الله يرحمها - في أوائل ايام مرضها .. وادخل بيها المستشفى قبل ما الحالة كانت تتدهور وتموت

الحمدلله على كل شيء
وربنا يرحمها ويرحمنا جميعا يارب

Remas يقول...

انا اول مره هنا
المدونة حلوة والبوست دا حلو اوى بجد

يمكن الحاجة اللى كنت غيرتها انى كنت استمر في كلية هندسة ومش اروح تجارة

كنت قعدت مع اختى الله يرحمها وقت اطول

لكن غير كدا الحمد لله مش كنت غيرت حاجة لانى راضية جدا عن اللى ربنا كتبه ليا

كل سنة وانت طيب وعقبال 100 سنة

dreem يقول...

سلامو عليكو يابوحميد انا جيت اهه
واجاوب علي سؤالك واقول : انا الحمد لله مش هغير ايوها حاجة ابدا !
ممكن اكون مقتنعة ب.. لو علمتم الغيب لاخترتم الواقع , واكيد مقتنعة بما ال اليه حالي وراضية الحمد لله وبالرغم من ........ حاجات كتير

إرسال تعليق