Recent Posts

الجمعة، 15 يناير 2010

35 سنة...............؟!!!!



مراتى فكرتنى إن عيد مبلادى كمان كام يوم
حاجة لذيذة خالص 
تورتة و هدية وفسحة والذى منه
تمام تمام
فكرت كده حتم كام
لاقيتهم 35 سنة
حتم كام يا ولاد؟ 35
بتقولوا كام؟ 35
كاااااااام؟ 35
المشكلة بقى بالنسبة لى 35 دى كتير ولا قليل؟
يعتى المفروض أكون عملت فيهم إيه يبقى كويس؟
أنا مابتكلمش على المستوى الشخصى خاااااااااااااااالص

أنا بتكلم عنى و عن جيلى
يعنى
الناس دايما بتهاجم الشباب والجيل البايظ والكلام ده
بسمع الكلام ده من وانا فى إعدادى
لغاية دلوقتى (من الناس الكبار)
طيب يا حلوين إنتوا عملتوا إيه؟
إيه هي إنجازاتكم الفظيعة اللى حتورثوهالنا؟
الجيل ده لغاية دلوقت ما قعدش على الدركسيون علشان يسوق
وماحدش علمه السواقة
وماحدش عايز يعلمه السواقة
ويوم ما حيستلم الدركسيون مش حيعرف يسوق
وبعدين كنتم فين لما الشباب (اللى بتقولوا إنهم بايظين باظوا؟)
ومين اللى رباهم؟
ومين اللى علمهم البوظان؟

أرجع لمشكلتى ومشكلة جيلى
هما دلوقتى فى النص
شايفين الكبار خربوها وحيسلموهالهم خربانة
وشايفين (للأسف) إن الجيل اللى طالع مش مسؤل!!!!!
بيكرروا نفس اللى كان ولا يزال بيتقالهم
نفسى أعرف وانا عندى 35 سنة 
إيه اللى كان مفروض أكون عملته
وإيه اللى مفروض أعمله السنيين الجاية؟
لو حد عنده إجابة ياريت يرد عليا


4 التعليقاااااااات:

الـسـيـدة نـون يقول...

ازيك يا احمد
الف مبروك على المدونة
وكل سنة وانت طيب مقدما يا رفيق برج الجدي


بتسال ايه المفروض تكون عملته عند سن الخمسة وتلاتين سنة
المفروض تكون اتخرجت واشتغلت وكونت نفسك واتجوزت وخلفت
ده من الناحية الدنيوية
اما من الناحية الدينية
المفروض تكون حفظت القران او على الاقل بتعمل بيه فى حياتك الدنيوية
اسال نفسك
هل انت قدوة لاولادك
هل انت قوام على مراتك فعلا وقادر تحتويها
هل انت انسان ايجابى وسط بيئتك ولا عايش على مبدا الطناش
هل وانت ماشى ولاقيت ورقة فى الارض بتشيلها ولا بتقول وانا مالى
هل بتعامل جيرانك المسيحين بسماحة نفس ولا بتديهم وش خشب
هل انت انسان معطاء ولا بتاخد وبس
هل انت انسان راضى بحالك ولا متذمر على طول من كل حاجة

هل انت بتزرع ما يرضى ربك فى دنيتك علشان تحصد ما يرضيك انت فى اخرتك؟
ولا هو كلام وبس بتكتبه فى البوستات


انا على فكرة مش بتريق
وفعلا عاجبنى اوى بوست ازرع لكى تحصد
وبعد اذنك هاخد منه نسخة وانشره عندى فى السايد بار


بص يا ابو حميد
اسال نفسك الاسئلة اللى فوق دى وزود عليها من عندك كل الاسئلة اللى تيجى فى دماغك ومن خلال اجابتك على اسئلتك هاتعرف انت عملت ايه وهاتعرف ايه اللى ناقص انك تعمله علشان تكمل حياتك بصورة مشرقة اكتر وتكون راضى عن سنين عمرك وعن انجازاتك فى سنين عمرك


سلام يا رفيق برج الجدي

وكل سنة وانت طيب
اختك خيخة

saragebaly يقول...

اولا ... كل عام وانت بكل هير

وكل عام وانت الى الله اقرب واتقى على عبادته ادوم


*******

اماعن الاجيال

من ناحية الدريكسيون .. فبسم الله ما شاء الله الجيل متخصص فيه واتعلم ازاي يسوق ويطير ويموت في الناس الي ماشية على الارض

مهو آخره يمسك دريكسيون عربية

بس للأسف ميقدرش يمسك دريكسيون مسؤليه

هيضغف في اول عرض مغري هيتقدمله

اصله مش عرف قواعد واساسيات القيادة صح


بس برضو .. برغم كدة

فيه قلة قليله ( جدا ) منهم فيهم وميض امل

وربنا يستر عليهم

*******

معلش .. رغيت كتير


عامك سعيد .. إن شاء الله

تحيااتي

سارة

الجواز و سنينه يقول...

اولا كل سنه و حضرتك طيب
ثانيا المدونه تحفه همه 3 موضوعات اللى شفتهم بس الصراحه احلى من بعض
بتدل ان فيه شخصيه جميله ورى الكلام ده
ثالثا بقى
اقولك على حاجه تعملها السنين الجايه
تقعد السنين الجايه تقول للجيل الجاى ياللى ما عملتوش
و يا جيل مستهتر و ياللى جيلنا كان كله اخلاق
متهيألى ان كل جيل بيورث الجيل اللى بعده نفس الكلام
علشان كده انا مش بهتم بموضوع الجيل ده
بس المهم ان يكون الواحد فى حياته هدف او حلم يسعى ليه
يعنى هدف انه يكون اب ناجح زوج ناجح و موظف ناجح
علشان عندنا فى مصر مع الاسف مش عندنا اهداف عامه بنسعى ليها

أحمد عبد الحميد يقول...

و حضراتكم كلكم طيبيين

بت خيخة
أنا مهندس كهربا من 12 سنة
بشتغل فى مكان ممتاز و راضى عن شغلى ومركزى فيه
متجوز من 7 سنين وعندى ولدين
عندى شقة و عربية ومشروع عربية كمان

باقى الأسئلة لو رديت عليها بإيجابية حتصدقينى؟؟

سارة
لو الجيل مش عارف أساسيات القيادة الصح أكيد أكيد ده مش ذنبه ,ده ذنب اللى أكبر منهم و ماعلمهمش وأنا واحد منهم

الجواز وسنينه
شكرا ليكى يافندم
عمرى ما أقدر أقول كده لأنى ماكنتش راضى عن اللى بيقولوا علينا كده

إرسال تعليق